நெருங்கி வரும் முரசு புயல்.. சென்னை, திருவள்ளூர் மாவட்டங்களில் பள்ளிகளுக்கு மட்டும் லீவ் அறிவிப்பு
சென்னை: வங்கக்கடலில் உருவாகியுள்ள முரசு புயல் காரணமாகத் தமிழகத்தின் பல்வேறு மாவட்டங்களில் கனமழை பெய்யும் என எச்சரிக்கை விடுக்கப்பட்டுள்ளது. இதற்கிடையே புயல் காரணமாக திருவள்ளூர் மற்றும் சென்னையில் விடுமுறை அறிவிக்கப்பட்டது. திருவள்ளூர், சென்னை மாவட்டங்களில் உள்ள பள்ளிகளுக்கு மட்டும் விடுமுறை அளித்து மாவட்ட ஆட்சியர் கவிதா உத்தரவிட்டுள்ளார்.
வங்கக்கடலில் உருவான காற்றழுத்த தாழ்வு மண்டலம் மெல்ல வலுப்பெற்ற புயலாக மாறியது. இந்த புயலுக்கு முரசு என்று பெயரிடப்பட்டுள்ளது. இப்போது இது சென்னையில் இருந்து சுமார் 420 கிமீ தொலைவில் மையம் கொண்டுள்ளது. இந்த புயல் இப்போது மணிக்கு சுமார் 25 கிமீ வேகத்தில் நகர்ந்து வருகிறது.
கனமழை அலர்ட்
இந்த புயல் காரணமாக ஏற்கனவே தமிழகத்தின் பல்வேறு மாவட்டங்களில் கனமழை பெய்யும் என எச்சரிக்கை விடுக்கப்பட்டுள்ளது. சென்னை மற்றும் திருவள்ளூர் மாவட்டங்களில் கனமழை முதல் மிக கனமழை வரை பெய்யக்கூடும் என்றும் வானிலை மையம் எச்சரித்துள்ளது. மேலும், சென்னை மற்றும் திருவள்ளூர் மாவட்டங்களுக்கு ஆரஞ்சு அலர்ட் எச்சரிக்கையும் விடுக்கப்பட்டுள்ளது.
விடுமுறை அறிவிப்பு
இதற்கிடையே முரசு புயல் எச்சரிக்கை மற்றும் கனமழை காரணமாக முதல் மாவட்டமாக திருவள்ளூரில் பள்ளிகளுக்கு மட்டும் நாளை (நவம்பர் 2) விடுமுறை அளித்து அம்மாவட்ட ஆட்சியர் கவிதா உத்தரவிட்டார். அதைத் தொடர்ந்து சென்னைக்கும் விடுமுறை அளிக்கப்பட்டது. இரு மாவட்டங்களிலும் பள்ளிகளுக்கு மட்டுமே நாளை (நவம்பர் 2) விடுமுறை அளிக்கப்பட்டுள்ள நிலையில், கல்லூரிகள் வழக்கம் போல செயல்படும்.
இதற்கிடையே முரசு புயல் முன்னெச்சரிக்கை நடவடிக்கையாக சென்னை, திருவள்ளூர், காஞ்சிபுரம் உள்ளிட்ட 7 மாவட்ட ஆட்சியர்களுக்கு தமிழக பேரிடர் மேலாண்மைத் துறை கடிதம் அனுப்பியுள்ளது. கனமழை எச்சரிக்கையை சுட்டிக்காட்டி, பேரிடர்களை எதிர்கொள்ள மாவட்ட நிர்வாகங்கள் முன்கூட்டியே தயாராக இருக்க வேண்டும் என அறிவுறுத்தப்பட்டுள்ளது.
அறிவுறுத்தல்
மழையால் ஏற்படக்கூடிய பாதிப்புகளை சமாளிக்க, பேரிடர் மேலாண்மைக்கான நிலையான வழிகாட்டு நெறிமுறைகளைப் பின்பற்ற வேண்டும் என்றும், தேவையான முன்னெச்சரிக்கை மற்றும் ஆயத்த நடவடிக்கைகளை மேற்கொள்ள வேண்டும் என்றும் கடிதத்தில் தெரிவிக்கப்பட்டுள்ளது. மாவட்ட நிர்வாகத்தின் அனைத்துத் துறைகளும் ஒருங்கிணைந்து செயல்படவும் அறிவுறுத்தப்பட்டுள்ளது. மேலும், மழை மற்றும் புயல் பாதிப்புகளால் ஏதேனும் எதிர்பாராத சம்பவங்கள் அல்லது அவசரநிலைகள் ஏற்பட்டால், அதுகுறித்த தகவலைத் தாமதமின்றி பேரிடர் மேலாண்மைத் துறைக்குத் தெரிவிக்க வேண்டும் என்றும் கேட்டுக்கொள்ளப்பட்டுள்ளது.
நாளைய தினம் நவம்பர் 2-ம் தேதி சென்னை, திருவள்ளூர் மாவட்டங்களில் கனமழை முதல் மிகக் கனமழையும், செங்கல்பட்டு, காஞ்சிபுரம், ராணிப்பேட்டை, வேலூர் மற்றும் நீலகிரி மாவட்டங்களில் கனமழையும் பெய்யக்கூடும் என தெரிவிக்கப்பட்டுள்ளது. புயல் மற்றும் மழையின் தீவிரத்தைக் கருத்தில் கொண்டு, அரசு தொடர்ந்து நிலைமையை கண்காணித்து வருகிறது.
Click it and Unblock the Notifications
Sign in with Google
