அடியோடு ஆட்டம் காணும் இரட்டை இலை... ஸ்டாலின் 2.0.. திரும்பி பார்க்க வைத்த 'இன்சைட் எலெக்ஷன்' சர்வே

சென்னை: தமிழ்நாடு சட்டசபை தேர்தல் தொடர்பாக தொடர்ச்சியாக நிறைய கருத்து கணிப்புகள் வெளியாகி வருகின்றன. அந்த வகையில் 'INSIDE ELECTION' என்ற நிறுவனம் நேற்று முக்கியமான சில கருத்து கணிப்புகளை வெளியிட்டது.

"அரசியல் களம் இப்போதே அனல் பறக்கத் தொடங்கிவிட்டது. 2026 சட்டமன்றத் தேர்தலுக்கு இன்னும் சில காலமே உள்ள நிலையில், 'யாருக்கு மக்கள் செல்வாக்கு?' என்கிற கேள்விக்கு விடை தேடி களம் இறங்கி உள்ளது 'INSIDE ELECTION' நிறுவனம். அந்த முடிவுகள் இப்போது வெளியாகி, அ.தி.மு.க தரப்பை நிலைகுலையச் செய்திருக்கிறது!"

தமிழகத்தின் 234 தொகுதிகளிலும், சுமார் 1.63 லட்சத்துக்கும் மேற்பட்ட வாக்காளர்களிடம் "நேரடி விவாதம், ரகசிய வாக்கெடுப்பு" எனப் பல கட்டங்களாக இந்த மெகா சர்வே நடத்தப்பட்டது. முடிவுகள் என்னவோ ஆளுங்கட்சிக்கு 'ஆல் இஸ் வெல்' சொல்லும் விதமாகவே அமைந்திருக்கின்றன.

திமுக: "தொடரும் ஆதிக்கம்!"

வாக்கு வங்கியில் அசைக்க முடியாத சக்தியாக திமுக உருவெடுத்துள்ளதாகச் சொல்கிறது இந்த சர்வே. சுமார் 44% வாக்குகளை அள்ளும் திமுக கூட்டணி, 159 முதல் 165 தொகுதிகள் வரை கைப்பற்றி மீண்டும் அரியணையில் அமரும் என்கிறது கணிப்பு. முதல்வர் ஸ்டாலினின் நலத்திட்டங்கள் மற்றும் தேர்தல் வியூகங்கள் கை கொடுத்துள்ளதையே இந்த எண்கள் காட்டுகின்றன. அதாவது ஸ்டாலின் 2.0 உறுதி என்று இந்த தேர்தல் கருத்து கணிப்பு தெரிவித்துள்ளது.

அதிமுக: "சரிவு... சறுக்கல்... அதிர்ச்சி!"

இந்தத் தேர்தலின் மிகப்பெரிய சோகமே பிரதான எதிர்க்கட்சியான அதிமுக-வின் நிலைதான். கடந்த தேர்தல்களை விட இந்த முறை அதிமுக மிக மோசமான தோல்வியைத் தழுவும் எனத் தெரிகிறது. அதிமுக கூட்டணிக்கு வெறும் 33% வாக்குகள் மட்டுமே கிடைக்கும் எனத் தெரியவந்துள்ளது. குறிப்பாக, இரட்டை இலைக்கு பலமாக இருந்த மண்டலங்களில்கூட வாக்குகள் சிதறி, வெறும் 64 முதல் 70 இடங்களுக்குள் மட்டுமே அந்தக் கூட்டணி சுருங்கும் என்கிறது 'இன்சைட் எலெக்ஷன்'.

மூன்றாம் இடம் யாருக்கு?

தமிழக அரசியலில் பெரும் எதிர்பார்ப்பை ஏற்படுத்தியிருக்கும் நடிகர் விஜய்யின் 'தமிழக வெற்றிக் கழகம்' (தவெக), முதல் தேர்தலிலேயே கணிசமான வாக்குகளைப் பிரிக்கும் எனத் தெரிகிறது. 18% வாக்கு வங்கியைத் தன்வசம் வைத்துள்ள தவெக, 4 முதல் 6 தொகுதிகளைக் கைப்பற்றி சட்டமன்றத்திற்குள் நுழையும் என்கிறது சர்வே. இது அதிமுக-வின் வாக்கு வங்கியில் பெரிய ஓட்டையை ஏற்படுத்தியிருப்பதாக அரசியல் நிபுணர்கள் கருதுகின்றனர்.

கவனிக்க வேண்டிய புள்ளிகள்:

சீமான் (நாதக): நாம் தமிழர் கட்சிக்கு இந்த முறையும் '0' தொகுதிகளே கிடைக்கும் எனத் தெரிவிக்கப்பட்டுள்ளது. ஆனால் அவர்களின் வாக்கு சதவீதம் சீராக உயர்ந்து வருவதாகத் தகவல்.

வாக்கு சதவீதம்: திமுக (44%), அதிமுக+ (33%), தவெக (18%) எனப் பிரிந்து நிற்பது தமிழகத்தில் ஒரு மும்முனைப் போட்டி நிலவுவதை உறுதி செய்கிறது.

"கருத்துக்கணிப்புகள் ஒரு திசையைக் காட்டினாலும், கடைசி நேரக் கூட்டணிகளும், பணபலமும், மக்களின் மனமாற்றமும் களத்தை மாற்றியமைக்கலாம். ஆனால், இப்போதைய நிலவரப்படி எடப்பாடி பழனிசாமிக்கு இது வாழ்வா சாவா போராட்டம் என்பதில் சந்தேகமில்லை. கோட்டையில் மீண்டும் கொடி ஏற்றக் காத்திருக்கிறார் ஸ்டாலின்!"

English summary

Inside Election Survey: DMK Set for Landslide Victory; Major Setback for AIADMK in TN Assembly Polls