Kia-வின் ரூ.18,750 கோடி பிரம்மாண்ட ஆலை ஆந்திராவுக்குப் போனது! மீண்டும் வாய்ப்பை இழந்த தமிழ்நாடு
சென்னை: இந்தியாவின் ஆட்டோமொபைல் தலைநகரமாகத் திகழ்ந்த தமிழ்நாடு, தனது முக்கியத்துவத்தை அண்டை மாநிலமான ஆந்திராவிடம் தொடர்ந்து இழந்து வருகிறதோ என்ற கவலை இப்போது மேலும் அதிகரித்துள்ளது. உலகப் புகழ்பெற்ற தென் கொரிய கார் தயாரிப்பு நிறுவனமான கியா இந்தியா இந்தியாவில் தனது இரண்டாவது பிரம்மாண்ட கார் உற்பத்தி ஆலையை அமைக்க ஆந்திர பிரதேச அரசுடன் அதிகாரப்பூர்வ ஒப்பந்தத்தில் கையெழுத்திட்டுள்ளது.
சுமார் 2 பில்லியன் அமெரிக்க டாலர்கள் (இந்திய மதிப்பில் சுமார் ₹18,750 கோடி) முதலீட்டில் அமையவுள்ள இந்த மாபெரும் திட்டம், தமிழ்நாட்டின் கார் உற்பத்தி மண்டலத்திற்குக் கிடைக்காமல் மீண்டும் ஆந்திராவின் அனந்தபூர் மாவட்டத்திற்கே சென்றுள்ளது.
₹18,750 கோடி முதலீடு மற்றும் 12,000 புதிய வேலைவாய்ப்புகள்
கியா நிறுவனமும், அதற்கு உதிரிபாகங்கள் தயாரித்து வழங்கும் துணை நிறுவனங்களும் இணைந்து இந்த ₹18,750 கோடி முதலீட்டைச் செய்ய உள்ளன. ஆந்திர மாநிலம் அனந்தபூரில் இதற்காக 465 ஏக்கர் நிலம் ஒதுக்கீடு செய்யப்பட்டுள்ளது. இந்தத் திட்டத்தின் முக்கிய அம்சங்கள் சாமானிய மக்களும் வியக்கும் வகையில் பிரம்மாண்டமாக உள்ளன:
2030-ஆம் ஆண்டின் தொடக்கத்தில் இந்தப் புதிய ஆலையில் கார் உற்பத்தி ஆரம்பமாகும். தற்போது ஆண்டுக்கு 4.3 லட்சம் கார்களைத் தயாரிக்கும் கியா நிறுவனம், இந்தப் புதிய ஆலையின் மூலம் கூடுதலாக 2 லட்சம் கார்களை உற்பத்தி செய்யும். இதன் மூலம் மொத்த உற்பத்தித் திறன் ஆண்டுக்கு 6.3 லட்சம் கார்களாக உயரும்.
இந்த இரண்டாவது ஆலையின் மூலம் மட்டும் ஆந்திர இளைஞர்களுக்கு நேரடியாகவும் மறைமுகமாகவும் சுமார் 12,000 புதிய வேலைவாய்ப்புகள் உருவாக உள்ளன.
ஏற்கனவே 2019-ஆம் ஆண்டு அனந்தபூரில் 945 ஏக்கரில் தொடங்கப்பட்ட கியா நிறுவனத்தின் முதல் ஆலையில், சுமார் 24,237 பேர் நேரடியாகவும் மறைமுகமாகவும் பணியாற்றி வருகின்றனர். தற்போது இரண்டாவது ஆலையும் அங்கேயே அமைவதால், ஒட்டுமொத்தமாக 1,410 ஏக்கர் பரப்பளவில் கியா நிறுவனத்தின் மொத்த முதலீடு இந்தியாவில் சுமார் 5 பில்லியன் டாலர்களைத் தொட உள்ளது.
மின்சார மற்றும் பெட்ரோல் கார்களின் மையமாக மாறும் அனந்தபூர்
தற்போது செல்டோஸ், சோனெட, சிரோஸ், கேரன்ஸ், கார்னிவல் உள்ளிட்ட பல்வேறு மாடல் கார்களை கியா நிறுவனம் தயாரித்து வருகிறது. புதிய ஆலையில் வாகனங்களின் உதிரிபாகங்களை வடிவமைப்பது, வெல்டிங், பெயிண்டிங் மற்றும் முழுமையாக கார்களை ஒருங்கிணைப்பது ஆகிய அனைத்துப் பணிகளும் நடைபெறும்.
இந்திய சந்தையின் தேவைக்காக மட்டுமல்லாமல், வெளிநாடுகளுக்கு கார்களை ஏற்றுமதி செய்வதற்கும் இந்த ஆலை முக்கிய மையமாகச் செயல்படும். குறிப்பாக, எதிர்காலத்திற்குத் தேவையான நவீன மின்சார வாகனங்கள் மற்றும் எரிபொருள் வாகனங்களை அதிக அளவில் உற்பத்தி செய்ய இந்த ஆலை உதவும் என்று கியா இந்தியா நிறுவனத்தின் நிர்வாக இயக்குநர் மற்றும் சிஇஓ குவாங்கு லீ தெரிவித்துள்ளார்.
தமிழ்நாட்டிற்குத் தொடரும் பின்னடைவு: எங்கே தவறு நடக்கிறது?
ஏற்கனவே ராயல் என்ஃபீல்டு, ஹையர் மற்றும் ஹூண்டாய்-கியா நிறுவனங்களுக்கு உதிரிபாகங்கள் வழங்கும் மூன்று தென் கொரிய நிறுவனங்கள் எனப் பல ஆயிரம் கோடி முதலீடுகள் தமிழ்நாட்டைத் தவிர்த்து ஆந்திராவுக்குச் சென்றுள்ளன. இப்போது ரூ.18,750 கோடி மதிப்பிலான கியா நிறுவனத்தின் இரண்டாவது ஆலையும் அனந்தபூருக்கே சென்றிருப்பது, ஆட்டோமொபைல் துறையில் தமிழ்நாடு தனது ஆதிக்கத்தை இழந்து வருவதை வெளிப்படையாகக் காட்டுகிறது.
முதல் ஆலையை அனந்தபூரில் வெற்றிகரமாக இயக்கி வரும் கியா நிறுவனத்தை, அதன் இரண்டாவது ஆலைக்காகத் தமிழ்நாட்டின் ஸ்ரீபெரும்புதூர், ஒரகடம் அல்லது ஓசூர் பகுதிகளுக்குள் ஈர்க்க தமிழகத் தொழில்துறை எந்தவொரு பெரிய முயற்சியையும் எடுக்கவில்லை என்ற விமர்சனம் எழுந்துள்ளது. அண்டை மாநிலமான ஆந்திரா, வெளிநாட்டு நிறுவனங்களுக்கு உடனடி நிலம், வரிச் சலுகைகள் மற்றும் விரைவான அனுமதிகளை வழங்கி முழுமையாகத் தன் பக்கம் இழுத்துக்கொண்டது.
பல்லாயிரக்கணக்கான தமிழகப் பொறியியல் மற்றும் பாலிடெக்னிக் பட்டதாரிகளுக்குக் கிடைத்திருக்க வேண்டிய 12,000 உயர்தர வேலைவாய்ப்புகள் மீண்டும் ஒருமுறை நம் கண்முன்னே கைநழுவிப் போயுள்ளன. தமிழக அரசு இனியாவது விழித்துக்கொண்டு புதிய முதலீடுகளைத் தக்கவைக்கத் தீவிர நடவடிக்கை எடுக்க வேண்டும் என்பதே அனைவரின் எதிர்பார்ப்பாக உள்ளது.
Click it and Unblock the Notifications
Sign in with Google
