தேநீர் விருந்தில் கனிமொழி! பாஜக- திமுக நேரடி கூட்டணிக்கு tea party-யே சாட்சி! நிர்மல் குமார்
சென்னை: டெல்லியில் சபாநாயகர் ஓம் பிர்லாவின் தேநீர் விருந்தில் திமுக எம்பி கனிமொழி பங்கேற்றதன் மூலம் பாஜகவுடன் திமுக நேரடி கூட்டணியில் இருப்பது உறுதியாகிவிட்டது என அமைச்சர் நிர்மல் குமார் தெரிவித்துள்ளார். முன்பு மறைமுக கூட்டணியில் இருந்த நிலையில் தற்போது இரு கட்சிகளும் நேரடி கூட்டணியில் இருப்பது வெட்டவெளிச்சமாகிவிட்டது என்றும் அவர் விமர்சித்துள்ளார்.
இதுகுறித்து அவர் தலைமைச் செயலகத்தில் அளித்த பேட்டியில் கூறியிருப்பதாவது: பாஜகவுடன் திமுக தற்போது நேரடிக் கூட்டணி வைத்துள்ளது என்பது தெளிவாகத் தெரிகிறது. அரசியலில் நிரந்தர எதிரி இல்லை என கனிமொழி சோமு, வானதி சீனிவாசன் ஆகியோர் கூறியிருந்தனர்.
திமுகவை சேர்ந்த திருச்சி சிவா மத்திய அமைச்சரவையில் இடம் பெறுவார் என அனிதா ராதாகிருஷ்ணன் கூறியிருந்த கருத்தை திமுக தலைமை மறுக்கவில்லை.
டெல்லியில் யாருடன் பேசினாலும் அது மக்கள் நலனுக்காகத்தான் இருக்கும் என முதல்வர் விஜய் தெரிவித்திருக்கிறார். அதே வேளையில் தொகுதி மறுவரையறைக்கு எதிராக நாடாளுமன்றத்தில் வாக்களிப்போம் என திமுக ஒரு வார்த்தை கூட உறுதியாகக் கூறவில்லை.
இதன் மூலம் பாஜகவுடன் திமுக நேரடி உறவில் இருப்பது தெளிவாகிறது. இருக்கை மாற்றத்திற்காகத்தான் தேநீர் விருந்தில் கலந்து கொண்டேன் என கனிமொழி கூறுவது நம்பும்படியாக இல்லை.
அது போல் காவிரி நீர் திறப்பது தொடர்பான வழக்கு வரும் திங்கள்கிழமை உச்சநீதிமன்றத்தில் விசாரணைக்கு வருகிறது. தமிழகத்தின் காவிரி உரிமையைக் காக்க அரசு தொடர்ந்து சட்டப்பூர்வ நடவடிக்கைகளை எடுத்து வருகிறது?
அண்மையில் நடந்த முதலீட்டாளர்கள் மாநாட்டிற்கு ஊடகங்களுக்கு அழைப்பு விடுக்கப்படாததற்கு அங்கு நிலவிய இடப்பற்றாக்குறையே முக்கியக் காரணம். சுதந்திர தினத்தையொட்டி ஆளுநர் அர்லேகரின் தேநீர் விருந்தில் முதல்வர் பங்கேற்பது குறித்து எந்தவிதமான முடிவும் எடுக்கப்படவில்லை என நிர்மல் குமார் தெரிவித்திருந்தார்.
நாடாளுமன்ற மழைக்கால கூட்டத் தொடர் கடந்த மாதம் 20ஆம் தேதி தொடங்கியது. நீட் தேர்வு முறைகேடு விவகாரம், டெல்லியில் போராட்டத்தில் ஈடுபட்டோர் மீது போலீஸ் தடியடி, ராமர் கோயில் நன்கொடை திருட்டு உள்ளிட்ட பிரச்சினைகளை எதிர்க்கட்சிகள் எழுப்பி அமளியில் ஈடுபட்டனர்.
இதனால் எதிர்க்கட்சிகளுக்கும் மத்திய அரசுக்கும் இடையே கடும் மோதல் ஏற்பட்டது. இந்த நிலையில் மழைக்கால கூட்டத் தொடர் நிறைவடைந்ததை அடுத்து அனைத்து கட்சி எம்பிக்களுக்கும் வழக்கம் போல் சபாநாயகர் ஓம் பிர்லா தேநீர் விருந்து அளித்தார். அதில் பங்கேற்க அனைத்துக் கட்சி எம்பிக்களுக்கும் அழைப்ப விடுக்கப்பட்டது. இந்த தேநீர் விருந்தை காங்கிரஸ், சமாஜ்வாதி உள்ளிட்ட இந்தியா கூட்டணி எம்பிக்கள் புறக்கணித்தனர். ஆனால் தேநீர் விருந்தில் திமுக சார்பில் கனிமொழி பங்கேற்றார்.
பாஜகவுடன் திமுக நெருக்கம் காட்டி வருவதாகவும் தொகுதி மறுவரையறை உள்ளிட்ட மசோதாக்களை திமுக உதவியுடன் பாஜக நிறைவேற்ற திட்டமிட்டுள்ளதாகவும் தவெக, காங்கிரஸ் உள்ளிட்ட கட்சிகள் விமர்சித்து வருகின்றன.
இந்த நிலையில் தேநீர் விருந்தில் கனிமொழி எம்பி பங்கேற்றது அரசியல் களத்தில் விவாதத்தை கிளப்பியுள்ளது.
Click it and Unblock the Notifications
Sign in with Google
