2 சக்கர வாகனங்களுக்கு.. எந்த காலத்திலும் ஃபாஸ்டேக் சுங்கக் கட்டணம் கிடையாது! மத்திய அரசு உறுதி
சென்னை: நாடு முழுவதும் உள்ள தேசிய நெடுஞ்சாலைகள் மற்றும் தேசிய விரைவுச் சாலைகளில் உள்ள சுங்கச்சாவடிகளில் இருசக்கர வாகனங்களுக்கு எந்தவித பயனர் கட்டணமும் வசூலிக்கப்படுவதில்லை என்பதை NHAI தெளிவுபடுத்தியுள்ளது.
இந்தியாவில் இரு சக்கர வாகனங்களுக்கு சுங்கக் கட்டணம் வசூலிக்கப்பட வாய்ப்புள்ளதாக பரவலான விவாதங்கள் கடந்த சில நாட்களாக எழுந்துள்ளன. இணையத்திலும் இது தொடர்பாக செய்திகள் உலவிய வண்ணம் உள்ளன. ஆனால் இது தொடர்பாக அரசாங்கம் எந்த முடிவும் எடுக்கவில்லை.. இது குறித்து பல்வேறு கருத்துக்கள் நிலவி வந்தாலும் அதிகாரபூர்வ அறிவிப்பு எதுவும் வெளியாகவில்லை.
இருசக்கர வாகனங்களுக்கு டோல் கிடையாது
இருசக்கர வாகனங்களுக்கான சுங்கக் கட்டணம் வசூலிப்பது குறித்து சமூக வலைத்தளங்களில் பரவி வரும் தவறான செய்திகள் தொடர்பாக சாலைப் போக்குவரத்து மற்றும் நெடுஞ்சாலைகள் அமைச்சகம் விளக்கம் அளித்துள்ளது. அதில், தேசிய நெடுஞ்சாலைகளில் பயனர் கட்டணம், 2008ஆம் ஆண்டின் தேசிய நெடுஞ்சாலை கட்டண (விகிதங்கள் மற்றும் வசூல் நிர்ணயம்) விதிகளின்படி நான்கு சக்கர வாகனங்களுக்கு மட்டுமே சுங்க கட்டணம் வசூலிக்கப்படுவதாக NHAI தெரிவித்துள்ளது.
இருசக்கர வாகனங்களுக்கு சுங்கக் கட்டணம் வசூலிக்கும் திட்டம் எதுவும் தற்போது இல்லை என்றும் NHAI திட்டவட்டமாக அறிவித்துள்ளது.
சுங்க கட்டணம் - பாஸ்ட் டேக்
இந்திய தேசிய நெடுஞ்சாலைகளில் தடையற்ற பயணத்திற்காக, FASTag வருடாந்திர பாஸ் வசதியை அரசு அறிமுகப்படுத்தியுள்ளது. இந்த பாஸ் பயணிகளுக்கு பணத்தை சேமிப்பதோடு மட்டுமல்லாமல், அவர்களின் பயணத்தை மேலும் வசதியாகவும், மன அழுத்தமின்றியும் மாற்றுகிறது. நாடு முழுவதும் சுமார் 1,159 சுங்கச்சாவடிகளில் இது செல்லுபடியாகும். இந்திய தேசிய நெடுஞ்சாலைகள் ஆணையம் (NHAI) நான்கு நாட்களில் 5 லட்சத்திற்கும் அதிகமான FASTag அடிப்படையிலான வருடாந்திர சுங்கச்சாவடி அனுமதிகளை விற்பனை செய்து, ₹150 கோடி வருவாயை ஈட்டியுள்ளது. தமிழகம் அதிக எண்ணிக்கையிலான வருடாந்திர பாஸ்களை வாங்கியுள்ளது. அதற்கு அடுத்தபடியாக கர்நாடகா மற்றும் ஹரியானா மாநிலங்கள் உள்ளன.
கூடுதலாக, FASTag வருடாந்திர பாஸ்களைப் பயன்படுத்தி தமிழகம், கர்நாடகா மற்றும் ஆந்திரப் பிரதேசம் ஆகிய மாநிலங்களில் சுங்கச்சாவடிகளில் அதிக எண்ணிக்கையிலான பரிவர்த்தனைகள் நடைபெற்றுள்ளதாக NHAI தெரிவித்துள்ளது.
FASTag வருடாந்திர பாஸ்
வருடாந்திர சுங்க பாஸ் என்பது ஒரு ப்ரீபெய்ட் வசதியாகும். இதன் மூலம் தனியார் வாகன ஓட்டிகள் ஒருமுறை கட்டணம் செலுத்தி, தேசிய நெடுஞ்சாலைகள் மற்றும் எக்ஸ்பிரஸ்வேகளில் உள்ள 200 சுங்கச்சாவடிகள் வரை இலவசமாக பயணிக்கலாம். ஒவ்வொரு பாஸின் விலையும் ₹3,000. இந்த வசதி கார்கள், ஜீப்புகள் மற்றும் வேன்களுக்குக் கிடைக்கிறது.
இந்த பாஸ், செயல்படுத்தப்பட்ட நாளிலிருந்து ஒரு வருடத்திற்கு அல்லது 200 சுங்கச்சாவடி பயணங்களுக்கு, எது முதலில் வருகிறதோ அதுவரை செல்லுபடியாகும். பயண வரம்பு எட்டப்பட்டதும், FASTag தானாகவே நிலையான பயணக் கட்டண முறைக்கு மாறும். புள்ளி அடிப்படையிலான சுங்கச்சாவடிகளில், ஒவ்வொரு ஒருவழிப் பயணமும் ஒரு பயணமாக கணக்கிடப்படும், மேலும் திரும்பிச் செல்வது இரண்டு பயணங்களாக கணக்கிடப்படும். மூடப்பட்ட அல்லது டிக்கெட் முறையில், ஒரு முழுமையான நுழைவு முதல் வெளியேற்றம் வரையிலான பயணம் ஒரு பயணமாகக் கணக்கிடப்படும்.
இந்த பாஸை ராஜமார்க யாத்ரா மொபைல் செயலி, NHAI அல்லது MoRTH இணையதளங்கள், அல்லது அங்கீகரிக்கப்பட்ட FASTag வெளியீட்டாளர் போர்ட்டல்கள் மூலம் வாங்கலாம். ₹3,000 பாஸிற்கான கட்டணத்தை UPI, டெபிட் அல்லது கிரெடிட் கார்டு அல்லது நெட் பேங்கிங் மூலம் செலுத்தலாம். FASTag வாலட் இருப்புகளை இதற்குப் பயன்படுத்த முடியாது. செயல்படுத்தல் பொதுவாக இரண்டு மணி நேரத்திற்குள் முடிந்து, SMS மூலம் உறுதிப்படுத்தப்படும்.
FASTag வருடாந்திர பாஸ்
ஒரு பயணிக்கும் வாகனத்திற்கான சராசரி சுங்கக் கட்டணம் சுமார் ₹50. பாஸ் இல்லாமல் ஒரு வருடத்தில் 200 பயணங்களை முடித்தால் சுமார் ₹10,000 செலவாகும். வருடாந்திர பாஸ் மூலம், செலவு ₹3,000 ஆக நிர்ணயிக்கப்பட்டுள்ளது, இது அடிக்கடி நெடுஞ்சாலைகளில் பயணிப்பவர்களுக்கு சுமார் ₹7,000 சேமிக்கிறது.
FASTag வருடாந்திர பாஸ் செல்லுபடியாகும் 1,159 சுங்கச்சாவடிகளின் முழுமையான பட்டியல் மாநிலம் மற்றும் மாவட்டம் வாரியாக கீழே கொடுக்கப்பட்டுள்ளது. இந்த பட்டியல் NHAI ஆல் வெளியிடப்பட்டுள்ளது - உங்கள் பயணங்களுக்கு அதை சரிபார்த்து குறித்து வைத்துக் கொள்ளுங்கள்.
Click it and Unblock the Notifications
Sign in with Google