சிங்கம் ஒன்று புறப்பட்டதே.. அண்ணாமலைக்கு ஷிப்ட் ஆன ரஜினிகாந்த் ரசிகர்கள்.. தவெக இதை எதிர்பார்க்கல

சென்னை: அண்ணாமலை தனிக்கட்சி தொடங்க ஆயத்தமாகி வரும் சூழலில், மதுரையில் ரஜினி ரசிகர்கள் அவருக்கு ஆதரவாக களமிறங்கியிருப்பது பெரும் பரபரப்பை ஏற்படுத்தியுள்ளது. நடிகர் விஜய் பாணியில் அண்ணாமலையும் சாதிக்க நினைக்கும் இந்த முயற்சி சாத்தியமா என்ற விவாதமும் இப்போது எழுந்துள்ளது. இந்த அதிரடி நகர்வு மற்றும் ரஜினி ரசிகர்களின் ஆதரவு தேர்தல் களத்தில் எந்தளவுக்கு எடுபடும் என்பதை பற்றி இங்கே சுருக்கமாக பார்ப்போம்.

தமிழக அரசியலில் அடுத்த ஒரு புதிய புயல் கிளம்புகிறதா என்ற விவாதம், தென் மாவட்டமான மதுரையில் ஹாட் டாப்பிக்காக மாறியுள்ளது. காரணம், பாஜக முன்னாள் மாநில தலைவர் அண்ணாமலை, விரைவில் ஒரு அதிரடியான புதிய அரசியல் கட்சியைத் துவங்கப் போகிறார் என்ற தகவல் கடந்த சில மாதங்களாகவே அரசியல் வட்டாரங்களில் தீயாகப் பரவி வருகிறது.

பாஜகவின் மாநில தலைவர் பதவி அவரிடமிருந்து பறிக்கப்பட்ட பிறகு, டெல்லி மேலிடம் அவருக்கு குறிப்பிடத்தக்க எந்தவொரு முக்கியப் பொறுப்பையும் வழங்கவில்லை என்றே கூறப்படுகிறது.

பாஜக மீது அண்ணாமலை அதிருப்தி

இதனால் கடும் அதிருப்தியிலும் விரக்தியிலும் இருந்த அண்ணாமலை, இப்போதைய அரசியல் சூழலில் தனிக்கட்சி துவங்கும் இறுதி நிலைக்குத் தள்ளப்பட்டுள்ளதாக அவரது தீவிர ஆதரவாளர்கள் வெளிப்படையாகவே பேசத் துவங்கியிருக்கிறார்களாம்..

தமிழகத்தில் ஒன்றுமே இல்லாத நிலையில், வலிமை இழந்து கிடந்த பாஜகவுக்கு ஒரு தனித்துவமான எழுச்சியையும், இளைஞர்கள் மத்தியில் பெரும் ஈர்ப்பையும் ஏற்படுத்திய அனுபவம் அண்ணாமலைக்கு உண்டு என்பதால், அவர் இந்த துணிச்சலான முடிவை எடுக்க வேண்டும் என்பதே அவரது ஆதரவாளர்களின் பெரும் விருப்பமாக இருக்கிறது.

இந்த பரபரப்பான அரசியல் சூழ்நிலைக்கு நடுவேதான், மதுரையை சேர்ந்த பாஜக நிர்வாகியும் அண்ணாமலையின் தீவிர ஆதரவாளருமான விஷ்ணுபிரசாத் என்பவர் ஒட்டியுள்ள ஒரு போஸ்டர் ஒட்டுமொத்த தமிழகத்தின் கவனத்தையும் ஈர்த்துள்ளது.

"சிங்கம் ஒன்று புறப்பட்டதே"

"சிங்கம் ஒன்று புறப்பட்டதே" என்ற பவர்புல்லான பாடல் வரிகளுடன், சூப்பர் ஸ்டார் ரஜினிகாந்துடன் அண்ணாமலை கம்பீரமாக இருப்பது போன்ற போஸ்டர்கள் மதுரை மாநகர் முழுவதும் ஒட்டப்பட்டு பெரும் அதிர்வலையை ஏற்படுத்தியுள்ளன.

இதுகுறித்து விஷ்ணுபிரசாத் சொல்லும்போது, "அண்ணாமலை எடுக்கும் எந்தவொரு இறுதி முடிவுக்கும் நாங்கள் முழுமையாகக் கட்டுப்படுவோம். அவர் தனிக்கட்சி துவங்கினால், அதற்கான களப்பணிகளை தமிழ்நாட்டின் அனைத்துப் பகுதிகளிலும் மிகச் சிறப்பாகச் செயல்படுத்துவோம்.

எப்போதும் ஆளும் கட்சியின் தவறுகளைத் தட்டிக்கேட்டு, அவர்களுக்கு சிம்மசொப்பனமாகத் திகழும் அண்ணாமலையை, வருகிற சட்டமன்றத் தேர்தலில் தமிழகத்தின் முதலமைச்சராக்க நாங்கள் தீவிரமாக உழைப்போம். இந்த புதிய முயற்சிக்கு தமிழகத்தில் உள்ள ரஜினி ரசிகர்கள் பலரும் எங்களுக்குப் பின்னால் இருந்து தங்களது முழுமையான ஆதரவைத் தெரிவித்துள்ளனர்" என்று ரகசியத்தையும் உடைத்துள்ளார்.

ரஜினிகாந்த் - அண்ணாமலை

தமிழக அரசியலில் ஏற்கனவே நடிகர் விஜய் தனது தவெகவை துவங்கி, சந்தித்த முதல் தேர்தலிலேயே ஆட்சியைப் பிடித்து, முதலமைச்சர் நாற்காலியிலும் உட்கார்ந்துவிட்டார். இந்த அதிரடி மாற்றம் தமிழக இளைஞர்களிடையே ஒரு புதிய அரசியல் சிந்தனையையும், மாற்றத்திற்கான தேடலையும் உருவாக்கியுள்ளது என்று அரசியல் விமர்சகர்களும் கருதுகிறார்கள்.

இந்த அலை அண்ணாமலைக்கும் கைகொடுக்கும் என நம்பும் அவரது முக்கிய ஆதரவாளர்களான முன்னாள் எம்எல்ஏ சோழன் பழனிசாமி, பாலமுருகன், கும்பகோணம் ராஜாமணிகண்டன், பி.எல்.அண்ணாமலை ஆகியோர் அண்ணாமலையின் பிறந்தநாளை முன்னிட்டும், அவரது புதிய அரசியல் பயணத்தின் வெற்றிக்காகவும் தஞ்சாவூர் பகுதியில் உள்ள புகழ்பெற்ற ஆலயங்களில் ரகசியமாகச் சிறப்பு வழிபாடுகளை நடத்தியுள்ளார்களாம்.

ரஜினி ரசிகர்கள் அண்ணாமலைக்கு ஆதரவு

இன்னொருபக்கம், அண்ணாமலையின் இந்த அதிரடி நகர்வால் பாஜகவுக்குள் பெரிய பிளவு ஏற்படும் சூழல் உருவாகியுள்ளதாகவே தெரிகிறது.. மதுரை கிழக்கு மற்றும் மேற்கு மாவட்டங்களில் உள்ள பாஜகவின் பல்வேறு பிரிவுகளை சேர்ந்த முக்கிய நிர்வாகிகள் பலரும், மொத்தமாக அண்ணாமலைக்காகத் தங்களது கட்சியை விட்டு விலகும் அதிரடி முடிவில் இருப்பதாக திருமங்கலத்தைச் சேர்ந்த நிர்வாகிகள் சிலர் அதிர்ச்சி தகவலை ஷேர் செய்துள்ளார்கள்.

ஏற்கனவே நெல்லையில் அண்ணாமலையின் பெயரில் அதிகாரப்பூர்வமாக நற்பணி மன்றத்தைத் துவக்கிய நிர்வாகிகள் சிலர், முக்கிய மாவட்ட நிர்வாகிகளுடன் இணைந்து நாளை அதாவது ஜூன் 4ம் தேதியன்று மதுரை திருமங்கலத்தில் ஒரு ரகசிய ஆலோசனைக் கூட்டத்தை நடத்தவும் திட்டமிட்டுள்ளார்களாம்.

அண்ணாமலையின் தனிக்கட்சிக்கு நேரடியாக ஆதரவு தெரிவிப்பதே இந்த கூட்டத்தின் முக்கிய நோக்கம் எனக் கூறப்படுகிறது. மேலும், அவரது பிறந்தநாள் மற்றும் அரசியல் வெற்றிக்காகத் திருப்பரங்குன்றம் முருகன் கோயிலில் தங்கத்தேர் இழுக்க முன்பதிவு செய்துள்ள ஆதரவாளர்கள், ஜூன் 7ம் தேதி பொதுத்தேர்வில் சாதனை படைத்த ஏழை மாணவர்களுக்குக் கல்வி உதவித்தொகை வழங்கும் நற்பணிகளையும் பிரம்மாண்டமாக நடத்தத் தயாராகி வருகின்றனர்.

தனிக்கட்சி சாத்தியமா

இதெல்லாம் பார்க்கும்போது, அண்ணாமலை தனிக்கட்சி தொடங்குவது என்பது முற்றிலும் சாத்தியமான ஒன்றுதான் என்றாலும், அதற்கு ரஜினி ரசிகர்கள் அளிக்கும் ஆதரவு தேர்தல் களத்தில் எந்த அளவுக்கு வாக்குகளாக மாறும் என்பதில் சில சவால்கள் நீடிக்கவே செய்கின்றன.

நடிகர் விஜய் கட்சி ஆரம்பித்து மிகக் குறுகிய காலத்திலேயே ஆட்சியைப் பிடித்திருப்பது, தமிழக இளைஞர்கள் மத்தியில் ஒரு பலமான மாற்று அரசியல் சிந்தனையை விதைத்துள்ளதால், பாஜக மேலிடத்தின் கட்டுப்பாடுகள் இல்லாமல், அண்ணாமலை தனிக்கட்சி தொடங்கினால் அவருக்கு என்று இருக்கும் தனிப்பட்ட இளைஞர் பட்டாளம் அதற்குப் பெரிய பலமாக அமையும் என்றே தெரிகிறது.

அதுமட்டுமல்ல, நடிகர் ரஜினிகாந்த் அரசியல் வராத சூழலில் அவரது ரசிகர்கள் பல்வேறு கட்சிகளுக்கு சிதறிப் போயுள்ள நிலையில், மதுரையில் ஒட்டப்பட்டுள்ள போஸ்டர்கள் போல ஒரு பகுதியினர் அண்ணாமலையின் அதிரடி அரசியலை விரும்பி ஆதரவு தருவது ஆரம்பக்கட்ட பரபரப்பையும் ஊடக வெளிச்சத்தையும் அண்ணாமலைக்கு தாராளமாகப் பெற்றுத் தரலாம்.

அண்ணாமலைக்கு பிளஸ் பாயிண்ட்டா

இருந்தாலும் ரஜினியின் ஆன்மீக அரசியல் சிந்தனையும் அண்ணாமலையின் பாணியும் ஒத்துப்போனாலும் கூட, களத்தில் திமுக, அதிமுக, தவெக போன்ற மாபெரும் அரசியல் கட்டமைப்புகளை எதிர்த்து ஒரு தேர்தலைச் சந்திக்க ரஜினி ரசிகர்களின் ஆதரவு மட்டுமே போதுமானதாக இருக்காது.

மொத்தத்தில், அண்ணாமலை தனிக்கட்சி தொடங்குவது எளிதான காரியம் என்றாலும், ரஜினி ரசிகர்களின் ஆதரவு அவருக்கு ஒரு புதிய உத்வேகத்தைத் தருமே தவிர, அது மட்டுமே ஒட்டுமொத்த தேர்தல் வெற்றியைத் தீர்மானித்துவிட முடியாது, மக்கள் மத்தியில் அவர் உருவாக்கும் கொள்கை ரீதியான கட்டமைப்பே அதன் இறுதி வெற்றியைத் தீர்மானிக்கும்.. பொறுத்திருந்து பார்ப்போம்...!!!

English summary

Rajinikanth Fans Move Towards Annamalai? A Surprise Shift That TVK Never Saw Coming