மதுரை ஆரப்பாளையத்தில் சாலமன் பாப்பையா உடல் வைக்கப்பட்டுள்ளது.. குவிந்து வரும் மக்கள்
மதுரை: பிரபல பட்டிமன்ற பேச்சாளரும் நடுவருமான சாலமன் பாப்பையா காலமானார், சாலமன் பாப்பையா உடல் மதுரையில் பொதுமக்கள் அஞ்சலிக்காக உடல் வைக்கப்பட்டுள்ளது. மதுரை ஆரப்பாளையம் பேருந்து நிலையம் அருகே உள்ள ஞான ஒளிபுரம் தெருவில் அமைந்துள்ள அவரது இல்லத்திற்கு இன்னும் சற்று நேரத்தில் சாலமன் பாப்பையாவின் உடல் கொண்டு வரப்பட்டுளளது. அங்கு அவரது உடல் பொதுமக்கள் மற்றும் உறவினர்களின் அஞ்சலிக்காக வைக்கப்பட்டுள்ளது.
பிரபல பட்டிமன்ற பேச்சாளரும் நடுவருமான சாலமன் பாப்பையா உடல்நலக்குறைவு காரணமாக மதுரை கே.கே. நகர் பகுதியில் உள்ள அப்போலோ மருத்துவமனையில் சிகிச்சை பெற்று வந்த நிலையில், இன்று மதியம் சுமார் 1.30 மணி அளவில் உயிரிழந்தார். நீண்டகாலமாக பட்டிமன்ற மேடைகளில் தனது தனித்துவமான பேச்சாற்றல், நகைச்சுவை கலந்த அணுகுமுறை மற்றும் தமிழ் இலக்கிய அறிவின் மூலம் மக்கள் மத்தியில் தனக்கென தனி இடத்தைப் பெற்றவர் சாலமன் பாப்பையா.
பட்டிமன்றங்களில் நடுவராக மட்டுமின்றி, பேச்சாளராகவும் பல்வேறு தலைப்புகளில் தனது கருத்துகளை எளிமையாகவும் சுவையாகவும் எடுத்துரைத்து வந்தார். அவரது பேச்சு பாணிக்கு தமிழகம் முழுவதும் ஏராளமான ரசிகர்கள் உள்ளனர். தமிழ் இலக்கியத்தையும், பட்டிமன்றத்தையும் பொதுமக்களிடம் கொண்டு செல்வதில் முக்கிய பங்காற்றிய சாலமன் பாப்பையா, தொலைக்காட்சி நிகழ்ச்சிகள் மற்றும் பல்வேறு பொது நிகழ்ச்சிகள் வாயிலாகவும் தொடர்ந்து தமிழ் மொழி மற்றும் இலக்கியத்தின் சிறப்புகளை எடுத்துரைத்து வந்தார்.
இந்த நிலையில் உடல்நலக்குறைவு காரணமாக மதுரை கே.கே. நகர் பகுதியில் உள்ள அப்போலோ மருத்துவமனையில் சிகிச்சை பெற்று வந்த அவர், இன்று மதியம் சுமார் 1.30 மணியளவில் சிகிச்சை பலனின்றி உயிரிழந்தார். சாலமன் பாப்பையாவின் மறைவு செய்தி தமிழ் இலக்கியம் மற்றும் பட்டிமன்ற உலகில் பெரும் சோகத்தை ஏற்படுத்தியுள்ளது.
மதுரை ஆரப்பாளையம் பேருந்து நிலையம் அருகே உள்ள ஞான ஒளிபுரம் தெருவில் அமைந்துள்ள அவரது இல்லத்திற்கு இன்னும் சற்று நேரத்தில் சாலமன் பாப்பையாவின் உடல் கொண்டு வரப்பட்டுளளது. அங்கு அவரது உடல் பொதுமக்கள் மற்றும் உறவினர்களின் அஞ்சலிக்காக வைக்கப்பட்டுள்ளது. பொதுமக்கள் மற்றும் திரைநட்சத்திரங்கள் மற்றும் உறவினர்கள் அஞ்சலி செலுத்து வருகிறார்கள். பல்வேறு அரசியல் கட்சி தலைவர்கள் இரங்கல் தெரிவித்தும் வருகிறார்கள்.
முதல்வர் விஜய் வெளியிட்டுள்ள இரங்கல் செய்தியில், "தமிழின் பெருமையையும், தமிழர்களின் வாழ்வியலையும் பட்டிமன்ற மேடைகள் வழியாக உலகறியச் செய்த தமிழறிஞர் பேராசிரியர் சாலமன் பாப்பையா அவர்கள் மறைந்த செய்தியறிந்து மிகுந்த துயரமும், வேதனையும் அடைந்தேன்.
தமது நகைச்சுவை கலந்த பேச்சாலும், ஆழ்ந்த தமிழ்ப் புலமையாலும், சமூகச் சிந்தனைகளை எளிய முறையில் மக்களிடம் கொண்டு சேர்த்ததோடு, பட்டிமன்றங்களை வெறும் பொழுதுபோக்கு நிகழ்வுகளாக அல்லாமல், சிந்தனையைத் தூண்டும் அறிவுத் தளங்களாக மாற்றியதில் பேராசிரியர் சாலமன் பாப்பையா அவர்களின் பங்கு மகத்தானது. அவரது மறைவு தமிழ்கூறு நல்லுலகிற்கு ஈடுசெய்ய இயலாத பேரிழப்பாகும். அன்னாரை இழந்து வாடும் குடும்பத்தினர், உறவினர்கள், நண்பர்கள், தமிழ் ஆர்வலர்கள் அனைவருக்கும் எனது ஆழ்ந்த இரங்கலையும் ஆறுதலையும் தெரிவித்துக் கொள்கிறேன்" இவ்வாறு கூறியுள்ளார்.
முன்னாள் முதல்வரும், திமுக தலைவருமான முக ஸ்டாலின் வெளியிட்டுள்ள இரங்கல் செய்தியில் கூறுகையில், சிரித்த முகம் - சிந்தையைக் கவரும் தமிழ் - மதுரை மண்ணின் மணம் ஆகியவற்றால் உலகெங்கும் வாழும் தமிழர்களின் பேரன்பைப் பெற்ற பேராசிரியர் சாலமன் பாப்பையா அவர்களின் மறைவுச் செய்தி கேட்டு மிகுந்த அதிர்ச்சியும் ஆற்றொணாத் துயரும் அடைந்தேன்.
திருக்குறளுக்கு உரை கண்டவர், புறநானூற்றுக்குப் புதிய வரிசை கண்டவர், கம்பனையும் ஆய்ந்தறிந்தவர் எனப் பண்டைத் தமிழிலக்கியத்தில் எந்த அளவுக்கு விற்பன்னராகத் திகழ்ந்தாரோ, அதே அளவுக்கு எளிய மொழியில் நகைச்சுவையாகப் பேசும் திறனும் கைவரப் பெற்றவராகப் பாப்பையா அவர்கள் திகழ்ந்தார்.
பொங்கல், புத்தாண்டு உள்ளிட்ட பண்டிகை நாட்கள் பாப்பையாவின் பட்டிமன்றத்தோடுதான் தமிழர்களுக்குத் தொடங்கும் எனும் அளவுக்குத் தமிழர்களின் அன்றாட வாழ்க்கையோடு இரண்டற இயைந்துவிட்ட பெருமைக்குரியவர் பேராசிரியர் சாலமன் பாப்பையா அவர்கள். பட்டிமன்றம் என்றாலே பாப்பையாதான் எனக் கூறும் அளவுக்குத் தமிழ்நாடு மட்டுமல்லாது, உலகின் பல நாடுகளிலும் பல்லாயிரம் பட்டிமன்றங்களுக்கு நடுவராக இருந்தவர். தற்கால மதுரையின் பெருமைமிகு அடையாளமாகவே மாறிப் போனவர். பாப்பையா பரம்பரை எனச் சொல்லத்தக்க அளவுக்குத் தன்னைப் போலவே பல பேச்சாளர்களைத் தமிழுக்குக் கொடையாகத் தந்தவர்.
தலைவர் கலைஞர் மீதும் என் மீதும் மிகுந்த அன்பைப் பொழிந்தவர் பேராசிரியர் பாப்பையா அவர்கள். கழகம் ஆட்சியில் இருந்தாலும் இல்லாவிட்டாலும் அவர் எங்கள் மீது காட்டும் அன்பில் எந்த மாற்றமும் இருந்ததில்லை. எப்போது சந்தித்தாலும் புன்னகையோடும் வாஞ்சையோடும் கரங்களைப் பற்றிக்கொள்ளும் அன்பிலான உறவை நாங்கள் கொண்டிருந்தோம்.
கடந்த ஆண்டு மே மாதம் பல்வேறு நிகழ்ச்சிகளில் கலந்துகொள்வதற்காக நான் மதுரை சென்றிருந்தபோது நடந்த மக்கள் சந்திப்பில் அவரது வீட்டு வாசலுக்கு வந்து என்னை வரவேற்றார். சில மாதங்களுக்கு முன்புதான் துணைவியாரை இழந்திருந்த பேராசிரியரிடம், "உடல்நலனைப் பார்த்துக்கொள்ளுங்கள்" என்று சொல்லிவிட்டு வந்தேன். அவர் இன்று நம்மை விட்டுப் பிரிந்ததை மனம் ஏற்க மறுக்கிறது.
தனது அரும்புதல்வர்களுள் ஒருவரைத் தமிழ்த்தாய் இழந்துவிட்டாள். பேராசிரியர் சாலமன் பாப்பையா அவர்களை இழந்து தவிக்கும் அவரது குடும்பத்தார்க்கும் மதுரை மக்களுக்கும் உலகெங்கும் வாழும் அவரது இரசிகர்களுக்கும் எனது ஆழ்ந்த இரங்கலையும் ஆறுதலையும் தெரிவித்துக் கொள்கிறேன்" இவ்வாறு கூறியுள்ளார்.
Click it and Unblock the Notifications
Sign in with Google
