ஒற்றை விரல் அசைவில் வசூல் வேட்டை.. விமர்சனங்களை வீழ்த்தி அசுர வளர்ச்சி.. விஜய்யின் சினிமா பயணம்!

Updated: Monday, June 22, 2026, 8:50 [IST]

Subscribe to Oneindia Tamil

சென்னை: "இந்த மூஞ்சியைக் காசு குடுத்து பாக்கனுமா.." பிரபல தமிழ் பத்திரிக்கை ஒன்று விஜய்யின் முதல் படத்திற்குக் கொடுத்திருந்த விமர்சனம் தான் இது.! ஆனால் அதே முகம் தான் தமிழ் சினிமாவின் உச்ச நட்சத்திரமாக உயர்ந்தது. மேலும் இப்போது தமிழகத்தின் முதல்வராகவும் மாறியுள்ளது. ஆனால், இவை அனைத்தும் விஜய்க்கு ஈஸியாக கிடைத்துவிடவில்லை.

தமிழக முதல்வர் விஜய்யின் 52 ஆவது பிறந்தநாள் இன்று கொண்டாடப்படுகிறது. கோலிவுட்டில் ஹீராவாக அறிமுகமான விஜய், தமிழ் சினிமாவின் உச்ச நட்சத்திரமாக உயர்ந்தது மட்டுமின்றி, தமிழக முதல்வராகவும் உயர்ந்துள்ளார். தமிழ் சினிமாவில் ஒரு நடிகராகத் தன்னை நிலைநிறுத்திக்கொள்வது என்பது அத்தனை எளிதான காரியம் அல்ல.

விஜய்

அதிலும் குறிப்பாக, ஆரம்பக் காலத்திலேயே கடுமையான உருவக் கேலிகளையும், நெகடிவ் விமர்சனங்களையும் சந்தித்திருந்தார். அதே விஜய் தான் பின்னாளில் கோடிக்கணக்கான ரசிகர்களின் 'தளபதி'யாக உயர்ந்து, பாக்ஸ் ஆபீஸ் சக்கரவர்த்தியாக முடிசூடுவார் என்று யாரும் எதிர்பார்த்திருக்க மாட்டார்கள். அந்த அசாத்திய சாதனையைத் தனது உழைப்பால் நிஜமாக்கிக் காட்டியவர் நடிகர் விஜய்.

ஆரம்ப காலகட்டம்

சினிமா பின்னணி கொண்ட குடும்பத்தில் இருந்து வந்தாலும், அவருக்கான வெற்றிப் பாதை சிவப்புக் கம்பளம் விரித்து வரவேற்கவில்லை; மாறாக முட்களும் கற்களுமே நிறைந்திருந்தன. விஜய்யின் திரைப் பயணம் 1992-ம் ஆண்டு 'நாளைய தீர்ப்பு' திரைப்படத்தின் மூலம் தொடங்கியது. அவரது தந்தை எஸ்.ஏ.சந்திரசேகர் இயக்கிய இந்தப் படம், விஜய்க்கு ஒரு நல்ல தொடக்கத்தைத் தரவில்லை. ஆரம்பத்தில் அவர் நடித்த 'ரசிகன்', 'தேவா' போன்ற படங்கள் வணிக ரீதியாக ஓரளவுக்குக் கைகொடுத்தாலும், விமர்சன ரீதியாக அவர் பெரும் பின்னடைவைச் சந்தித்தார். பல முன்னணி இதழ்கள் அவரது தோற்றத்தையும் நடிப்பையும் மிகக் கடுமையாகச் சாடின.

திருப்புமுனை

ஒரு சாதாரண இளைஞனாகத் தனது பயணத்தைத் தொடங்கிய விஜய், அந்த விமர்சனங்களைக் கண்டு துவண்டுவிடாமல், அவற்றையே தனது வெற்றிக்கான படிக்கட்டுகளாக மாற்றிக்கொண்டார். விஜய்யின் சினிமா வாழ்க்கையில் மிக பெரிய திருப்புமுனையை ஏற்படுத்திய ஆண்டு 1996. இயக்குநர் விக்ரமன் இயக்கத்தில் வெளியான 'பூவே உனக்காக' திரைப்படம், விஜய்யை ஒரு ஆக்ஷன் ஹீரோ என்ற பிம்பத்திலிருந்து மாற்றி, தமிழகத்தின் ஒவ்வொரு வீட்டிலும் இருக்கும் ஒரு 'பக்கத்து வீட்டுப் பையனாக' மாற்றியது.

இந்தப் படத்தின் மெகா ஹிட் வெற்றி, விஜய்க்குப் பெண் ரசிகைகளையும் குடும்ப ரசிகர்களையும் பெருமளவில் பெற்றுத் தந்தது. அதனைத் தொடர்ந்து 'காதலுக்கு மரியாதை', 'துள்ளாத மனமும் துள்ளும்', 'குஷி', 'பிரியமானவளே' எனத் தொடர்ச்சியாக அவர் நடித்த காதல் திரைப்படங்கள் வெள்ளி விழா கண்டன. இந்த காலகட்டத்தில்தான் அவர் இளைஞர்களின் இதயங்களைக் கவர்ந்து 'இளைய தளபதி' என்ற அந்தஸ்தைப் பெற்றார்.

ஆக்ஷன் ஹீரோ

காதல் நாயகனாக வலம் வந்த விஜய், 2003-ம் ஆண்டு 'திருமலை' திரைப்படத்தின் மூலம் ஒரு அதிரடி ஆக்ஷன் ஹீரோவாகத் தன்னை மாற்றிக் கொண்டார். அதன் தொடர்ச்சியாக 2004-ல் வெளியான 'கில்லி' திரைப்படம் தமிழ் சினிமாவின் வரலாற்றையே மாற்றி எழுதியது. அதுவரை இருந்த அனைத்து வசூல் சாதனைகளையும் தவிடுபொடியாக்கிய 'கில்லி', 50 கோடி ரூபாய் வசூலைக் கடந்த முதல் தமிழ் திரைப்படம் என்ற பெருமையைப் பெற்றது. இந்தப் படத்தின் வெற்றி விஜய்யை ஒரு மாஸ் ஹீரோவாக நிலைநிறுத்தியது. பின்னர் 'திருப்பாச்சி', 'போக்கிரி' போன்ற படங்கள் மூலம் பாக்ஸ் ஆபீஸில் அசைக்க முடியாத ஒரு சக்தியாக அவர் உருவெடுத்தார்.

அடுத்த லெவல் பாய்ச்சல்

2012-ம் ஆண்டு வெளியான 'துப்பாக்கி' திரைப்படம் விஜய்யின் திரைப்பயணத்தில் மற்றொரு மைல்கல். இயக்குநர் ஏ.ஆர்.முருகதாஸ் உடன் இணைந்த இந்தப் படம், விஜய்யை முதன்முதலில் 100 கோடி ரூபாய் வசூல் கிளப்பில் இணைத்தது. அங்கிருந்து தொடங்கிய அவரது வசூல் வேட்டை, ஒவ்வொரு படத்திற்கும் ஏறுமுகமாகவே இருந்தது. 'கத்தி', 'மெர்சல்', 'சர்க்கார்', 'பிகில்' என அவரது படங்கள் சமூகக் கருத்துக்களையும் உள்ளடக்கி வெளியானதால், மக்களிடையே பெரும் வரவேற்பைப் பெற்றன.

குறிப்பாக, லோகேஷ் கனகராஜ் இயக்கத்தில் வெளியான 'லியோ' திரைப்படம் சர்வதேச அளவில் 600 கோடி ரூபாய்க்கும் மேல் வசூலித்து, விஜய்யின் மார்கெட்டை அடுத்த லெவலுக்கு எடுத்து சென்றது. சுமார் 30 ஆண்டுகளுக்கும் மேலாகத் தமிழ் திரையுலகின் உச்ச நட்சத்திரமாகத் திகழ்ந்து, பல நூறு கோடி ரூபாய் வசூலைத் தனது ஒற்றை விரல் அசைவில் ஈட்டித் தரும் வல்லமை கொண்டவராக விஜய் உயர்ந்தார்.

பாக்ஸ் ஆபீஸ் கிங்

நடனம், ஸ்டைல், ஆக்ஷன் எனத் தனக்கென ஒரு தனி பாணியை உருவாக்கி, கோலிவுட்டின் 'பாக்ஸ் ஆபீஸ் கிங்' ஆக வலம் வந்த அவர், தற்போது தனது சினிமா பயணத்தை முழுமையாக நிறைவு செய்துவிட்டு மக்கள் பணிக்காக அரசியல் களத்தில் இறங்கியுள்ளார். ஒரு நடிகராகத் தொடங்கி, அதில் உச்சம் தொட்டு, இப்போது ஒரு தலைவனாகத் தனது அடுத்த கட்டப் பயணத்தைத் தொடங்கியிருப்பது அவரது விடாமுயற்சிக்குக் கிடைத்த மிக பெரிய வெற்றியாகும்.