மதசார்பற்ற கொள்கை கொண்டவர் முலாயம் சிங்.. டி.ஆர்.பாலு இறுதி அஞ்சலி செலுத்துவார் - ஸ்டாலின் இரங்கல்

Updated: Monday, October 10, 2022, 12:12 [IST]

Subscribe to Oneindia Tamil

சென்னை: உத்தரப்பிரதேச முன்னாள் முதலமைச்சரும் சமாஜ்வாடி கட்சித் தலைவருமான முலாயம் சிங் யாதவ் காலமான நிலையில் அவரது மறைவுக்கு குடியரசுத் தலைவர் திரௌபதி முர்மு இரங்கல் தெரிவித்துள்ளார்.

வட இந்தியாவில் சக்திவாய்ந்த கட்சிகளில் ஒன்றான சமாஜ்வாடி கட்சியை நிறுவியவர் முலாயம் சிங் யாதவ். இந்திய அளவில் அனுபவமும், பலமும் வாய்ந்த அரசியல்வாதியாக பார்க்கப்படுகிறார்.

உத்தர பிரதேச மாநிலத்தில் 1989 ஆம் ஆண்டு முதல் 1991 ஆம் ஆண்டு வரையிலும், 1993 ஆம் ஆண்டு முதல் 1995 ஆம் ஆண்டு வரையிலும், 2003 ஆம் ஆண்டு முதல் 2007 ஆம் ஆண்டு வரையிலும் என 3 முறை முதலமைச்சராக பதவி வகித்துள்ளார்.

உடல்நலக்குறைவு

உத்தரப்பிரதேச முன்னாள் முதலமைச்சர் அகிலேஷ் யாதவின் தந்தையான இவர் கடந்த சில ஆண்டுகளாகவே தீவிர அரசியலைவிட்டு விலகி இருந்து வந்தார். இந்த நிலையில் கடந்த ஆகஸ்டு 22 ஆம் தேதி முன்பாக முலாயம் சிங் யாதவுக்கு திடீரென உடல்நலக்குறைவு ஏற்பட்டது. இதையடுத்து அவர் அரியானா மாநிலம் குருகிராமில் உள்ள மருத்துவமனையில் சிகிச்சைக்காக அனுமதிக்கப்பட்டார்.

காலமானார்

தொடர்ந்து முலாயம் சிங் யாதவின் உடல்நிலை கண்காணிக்கப்பட்டு மருத்துவர்கள் சிகிச்சை அளித்து வந்தனர். ஆனாலும் அவரது உடல்நிலை கவலைக்கிடமாக உள்ளது என மருத்துவமனை நிர்வாகம் தெரிவித்தது. இந்த நிலையில் இன்று காலை அவர் காலமானார். அவருக்கு வயது 82. முலாயம் சிங் யாதவ் மறைவால் உத்தரப்பிரதேச மக்கள், சமாஜ்வாடி தொண்டர்கள் சோகத்தில் மூழ்கியுள்ளனர்.

மு.க.ஸ்டாலின்

இதுகுறித்து ட்விட்டரில் முதலமைச்சர் மு.க.ஸ்டாலின் ட்விட்டரில் இரங்கல் தெரிவித்துள்ளார். அவர் வெளியிட்டுள்ள பதிவில், "பிற்படுத்தப்பட்டோர் இடஒதுக்கீட்டுக்கு போராடிய இந்திய அரசியலின் உயர்ந்த மனிதர் முலாயம் சிங் யாதவ். மதசார்பற்ற கொள்கைகளில் ஆழமான ஈடுபாடு கொண்ட முலாயம் சிங் மறைவு ஈடுசெய்ய முடியாத இழப்பு.

இறுதி அஞ்சலி

எனது சகோதரர் அகிலேஷ் யாதவ் அவர்களுக்கும் அவரது குடும்பம் மற்றும் சமாஜ்வாடி கட்சித் தொண்டர்களுக்கும் எனது இரங்கலை தெரிவித்துக் கொள்கிறேன். திமுகவின் சார்பில் கட்சியின் பொருளாளாரும், நாடாளுமன்ற கட்சித் தலைவருமான டிஆர் பாலு முலாயம் சிங்கிற்கு இறுதி அஞ்சலி செலுத்துவார்." என்றார்.