6 மாதங்களுக்கு ரூ.7.86 லட்சம் கோடி கடன் வாங்கும் மத்திய அரசு.. மாதம் வட்டி எவ்வளவு வரும் தெரியுமா?

டெல்லி: வருவாய் பற்றாக்குறையை ஈடு செய்வதற்காக நடப்பு (2026-27) நிதியாண்டில் ரூ.17.20 லட்சம் கோடி கடன் வாங்கப்படும் என மத்திய பட்ஜெட்டில் நிதியமைச்சர் நிர்மலா சீதாராமன் அறிவித்திருந்தார். இவ்வாறு கடன் பத்திரங்கள் மூலம் அரசு வெளிச்சந்தையில் கடன் வாங்கும்போது, சந்தை நிலவரப்படி சராசரியாக ஆண்டிற்கு 6.8% முதல் 7.1% வரை வட்டி செலுத்த வேண்டியதிருக்கும். அதாவது, வாங்கும் கடனுக்காக மாதம் ஒன்றுக்குச் சுமார் ₹4,585 கோடியை மத்திய அரசு வட்டியாகச் செலுத்த வேண்டிய நிலை ஏற்படும்.

கடன் வாங்குவதன் பின்னணி

மத்திய அரசு, மாநில அரசு என எந்த அரசாக இருந்தாலும் கடன் வாங்கித்தான் செலவு செய்கின்றன. பொதுவாக வருவாய் பற்றாக்குறையைச் சமாளிக்கவும், வளர்ச்சித் திட்டப் பணிகளை மேற்கொள்வதற்காகவும் கடன்கள் வாங்கப்படுகின்றன. இவ்வாறு உள்கட்டமைப்பில் செய்யப்படும் முதலீடுகள், மக்களின் வறுமையைப் போக்குவதுடன் அவர்களின் வருமானத்தையும் உயர்த்துகின்றன. இதன் மூலம் அரசுக்கு வரியாகப் பணம் திரும்பக் கிடைக்கிறது. அந்த வரி வருவாயைக் கொண்டு அரசு கடனை அடைப்பது, வளர்ச்சித் திட்டப் பணிகளைத் தொடர்வது எனச் சுழற்சி முறையில் பணிகளை மேற்கொள்கிறது.

2-வது அரையாண்டு கடன் திட்டம்

அந்த வகையில், நடப்பு நிதியாண்டின் 2-வது அரையாண்டு காலத்திற்கு (அக்டோபர் - மார்ச்), அதாவது அடுத்த 6 மாதங்களுக்கு ரூ.7.86 லட்சம் கோடி கடன் வாங்க இருப்பதாக மத்திய அரசு கூறியுள்ளது. இதில் ரூ.15,000 கோடி மதிப்பிலான பசுமைப் பத்திரங்கள் (Green Bonds) வெளியீடும் அடங்கும். பத்திரங்கள் விற்பனை மூலம் வெளிச்சந்தையில் இருந்து இந்தக் கடன் வாங்கப்படுவதாகவும், இதற்கான ஏல நடைமுறைகள் அனைத்தும் 23 வாரங்களில் நிறைவடையும் என்றும் நிதியமைச்சகம் வெளியிட்ட அறிக்கையில் கூறப்பட்டுள்ளது.

பட்ஜெட் இலக்கை விடக் குறைவு

இந்தக் கடனையும் சேர்த்து நடப்பு நிதியாண்டில் வாங்கப்படும் மொத்த கடன் ரூ.15.99 லட்சம் கோடியாக இருக்கும். இது பட்ஜெட் மதிப்பீட்டை விட ரூ.1.20 லட்சம் கோடி குறைவாகவே இருக்கும் என நிதியமைச்சகம் வெளியிட்ட அறிக்கையில் சுட்டிக்காட்டப்பட்டுள்ளது.

முன்னதாக, முதல் அரையாண்டு காலத்தில் ரூ.8.13 லட்சம் கோடி கடன் வாங்கப்பட்டிருந்தது. இதுவும் நிர்ணயிக்கப்பட்ட இலக்கை விட (ரூ.8.20 லட்சம் கோடி) குறைவு என்பது குறிப்பிடத்தக்கது.

பல்வேறு கால அளவுகள் மற்றும் வட்டி செலுத்தும் முறை

வெளிச்சந்தையில் இருந்து மத்திய அரசு வாங்கும் கடனானது 3 ஆண்டுகள், 5 ஆண்டுகள், 7 ஆண்டுகள், 10 ஆண்டுகள், 15 ஆண்டுகள், 30 ஆண்டுகள், 40 ஆண்டுகள் மற்றும் 50 ஆண்டுகள் ஆகிய கால அளவுகளைக் கொண்ட பத்திரங்களாகப் பரவலாக வாங்கப்படுகிறது.

அவ்வாறு வாங்கும் கடன் பத்திரங்களுக்கு மத்திய அரசு 6 மாதங்களுக்கு ஒருமுறை முதலீட்டாளர்களின் வங்கிக் கணக்கில் வட்டியைச் செலுத்திவிடும். ஒரே நேரத்தில் அனைத்துக் கடன்களையும் திருப்பிச் செலுத்த வேண்டிய நெருக்கடியைத் தவிர்க்கவே, அரசு வெவ்வேறு கால அளவுகளில் கடன் பத்திரங்களை வெளியிடுகிறது.

குறிப்பாக ரயில்வே, நெடுஞ்சாலைகள், பாலங்கள் போன்ற பெரிய உள்கட்டமைப்புத் திட்டங்களின் பலன்கள் முழுமையாகக் கிடைக்கவும், அவற்றின் முதலீட்டை மீட்டெடுக்கவும் 30 முதல் 40 ஆண்டுகள் வரை ஆகும். எனவே, அத்தகைய திட்டங்களுக்கான கடன்களை மட்டும் 30 அல்லது 50 ஆண்டு காலப் பத்திரங்கள் மூலம் மத்திய அரசு பெறுகிறது.

English summary

The Union Ministry of Finance has announced plans to borrow ₹7.86 lakh crore over the next six months of the current fiscal year. The Central Government will be required to pay interest amounting to approximately ₹4,585 crore per month on this borrowing.