நேற்று ரூ.30.. இன்று ரூ.20.. தொடர்ந்து சரியும் தக்காளி! சென்னை மார்க்கெட் காய்கறிகளின் விலை இதோ!

சென்னை: சென்னை கோயம்பேடு மார்க்கெட்டில் தக்காளி விலை நேற்று கிலோவுக்கு ரூ.30 குறைந்து நிலையில் இன்று மேலும் ரூ.20 சரிந்துள்ளது. வரத்து அதிகரிப்பால் தொடர்ந்து சரியும் தக்காளி விலையால் மக்கள் மகிழ்ச்சியடைந்துள்ள நிலையில் சென்னை கோயம்பேடு மார்க்கெட்டில் விற்பனை செய்யப்படும் காய்கறிகளின் விலை பட்டியல் வெளியாகி உள்ளது.

கடந்த சில வாரங்களாக தமிழ்நாடு உள்பட இந்தியா முழுவதும் காய்கறிகளின் விலைகள் வீர்ரென அதிகரித்தன. குறிப்பாக தக்காளியின் விலை உயர்வு என்பது உச்சம் தொட்டது. பல இடங்களில் தக்காளியின் விலை கிலோவுக்கு ரூ.200யை கடந்து விற்பனையாகி வருகிறது.

தமிழ்நாட்டிலும் பல இடங்களில் தக்காளி விலை என்பது ரூ.150யை கடந்து மக்களை மிரட்டியது. இதற்கு தக்காளி சாகுபடி பரப்பளவு குறைந்ததும், அதிக வெப்பத்தால் தக்காளி உற்பத்தி சரிந்தது தான் முக்கிய காரணம் என கூறப்படுகிறது.

இந்த எதிர்பாராத தக்காளி விலை உயர்வால் ஏழைகள் முதல் பணக்காரர்கார்கள் வரை தக்காளி பயன்பாட்டை குறைத்து கொண்டனர். ஓட்டல்களில் தக்காளி சாதம், தக்காளி சட்னிகள் தயாரிப்பு நிறுத்தப்பட்டது. தமிழ்நாட்டில் விலை உயர்வால் மக்கள் பாதிக்கப்படுவதை அறிந்த தமிழக அரசு ரேஷன் கடைகளில் குறைந்த விலைக்கு தக்காளி விற்பனையை தொடங்கி உள்ளது. இது மக்கள் மத்தியில் நல்ல வரவேற்பை பெற்றுள்ளது.

இதுஒருபுறம் இருக்க கடந்த சில நாட்களாக தமிழ்நாட்டின் பல இடங்களில் தக்காளி விலை என்பது சரிந்து வருகிறது. சென்னை கோயம்பேடு மார்க்கெட்டில் உச்சத்தில் இருந்த தக்காளி விலை இன்றும் மளமளவென சரிந்துள்ளது. அதாவது நேற்று கிலோவுக்கு ரூ.30 குறைந்து தக்காளி ரூ.120க்கு விற்பனையான நிலையில் இன்று மேலும் ரூ.20 குறைந்தது. இதனால் சென்னை கோயம்பேடு மார்க்கெட்டில் இன்று சாதாரண தக்காளி கிலோ ரூ.100க்கு விற்பனை செய்யப்பட்டது. இதனால் மக்கள் மகிழ்ச்சியடைந்துள்ளனர்.

இதுதவிர சென்னை கோயம்பேடு மார்க்கெட்டில் ஒரு கிலோ நவீன் தக்காளி ரூ.110க்கும், வெங்காயம் ரூ.22க்கும், உருளை ரூ.32க்கும், சின்ன வெங்காயம் ரூ.80க்கும், ஊட்டி கேரட் ரூ.60க்கும், வெண்டைக்காய் ரூ.35க்கும், பச்சை மிளகாய் ரூ.45க்கும், பீன்ஸ் ரூ.90க்கும், இஞ்சி ரூ.210க்கும், பூண்டு ரூ.200க்கும், தேங்காய் ரூ.27 க்கும் விற்பனை செய்யப்பட்டு வருகிறது.

English summary

The price of tomato in Koyambedu market in Chennai decreased by Rs. 30 per kg yesterday and today it has further decreased by Rs. 20. The price list of vegetables sold in Koyambedu market in Chennai has been released while people are happy with the prices of tomatoes which continue to fall due to the increase in supply.