குதிரை பேரமல்ல! யானை பேரம்! தவெகவில் அதிமுகவினர் இணைவதற்கு இபிஎஸ்தான் காரணம்! ஆதவ் அட்டாக்

Updated: Saturday, June 6, 2026, 15:27 [IST]

Subscribe to Oneindia Tamil

சென்னை: அதிமுகவில் இருந்து விலகி தவெகவில் இணைந்த முன்னாள் அமைச்சர்கள், எம்எல்ஏக்களுக்கு உரிய மரியாதை கொடுக்கப்படும். அதிமுகவின் இந்த நிலைக்கு எடப்பாடி பழனிசாமிதான் காரணம் என அமைச்சர் ஆதவ் அர்ஜுனா தெரிவித்தார்.

இதுகுறித்து அவர் பேசுகையில், ஒட்டுமொத்த அதிமுகவும் இங்குதான் உள்ளது. முன்னாள் முதல்வர் ஜெயலலிதாவை தவிர யாரையும் அதிமுகவின் பொதுச் செயலாளராக அக்கட்சித் தொண்டர்கள் மனதில் ஏற்கவில்லை. 2026 ஆம் ஆண்டு நடந்த தேர்தலில் தவெக வெற்றி பெற்ற இரவே அதிமுக பொதுச் செயலாளர் நாங்கள் குதிரைப் பேரம் செய்ததாக பேசுகிறார்.

தமிழக முதல்வராக விஜய் வரக் கூடாது என்ற சிந்தனை ஸ்டாலினுக்கும் உதயநிதிக்கும் எடப்பாடி பழனிசாமிக்கும் இருந்தது. ஆனால் திமுகவுடன் சேர்ந்து யானை பேரத்தை அதிமுக நடத்தியது. அதை தமிழக மக்கள புறக்கணித்துவிட்டார்கள். முன்னாள் அமைச்சர்கள், முன்னாள் எம்எல்ஏக்கள், திமுக முன்னாள் எம்எல்ஏ கருணாநிதி உள்ளிட்டோரை வரவேற்கிறோம்.

அதிமுக மட்டுமல்ல திமுகவில் இருந்தும் உண்மையான விசுவாசிகளை நாங்கள் வரவேற்கிறோம். எங்கள் தலைவர் விஜய், அவருக்கு கருணாநிதியையும் ஜெயலலிதாவையும் பிடிக்கும் என தெரிவித்திருக்கிறார். தமிழகம் எப்போதும் மதச்சார்பற்ற கொள்கையில் உறுதியாக இருக்கக் கூடிய மாநிலம்.

தவெகவில் இணைந்த அனைவரின் உணர்வுகளுக்கும் மதிப்பளிக்கப்படும். விஜய் மக்கள் இயக்கத்துடன் பயணித்தவர்கள்தான் மாவட்டச் செயலாளர்களாக உள்ளனர். அவர்களையும் அரவணைத்து செல்ல வேண்டும் என கேட்டுக் கொள்கிறேன். தவெகவில் இணைந்தவர்களுக்கு உரிய மரியாதை கொடுக்கப்படும்.

அதிமுகவில் இருந்து வந்த செங்கோட்டையன் தற்போது எந்த நிலையில் இருக்கிறார் என்பதை வைத்தே நீங்கள் யூகித்துக் கொள்ளலாம். ஜெயலலிதாவின் தொண்டர்கள் விஜய்யை தலைவராக ஏற்றுக் கொண்டதால்தான் தவெக வெற்றி பெற்றது. அதிமுகவினர் ஆதரித்ததால்தான் சட்டசபை தேர்தலில் தவெக வென்றது.

அதிமுகவில் இருந்து நிறைய பேர் தவெகவில் இணைவதற்கு காரணம் எடப்பாடி பழனிசாமிதான். எனவே எங்களை நாடி வந்தவர்களை குடும்பத்தினர் போல் பாவிப்போம். அவர்களுக்கு உரிய பதவிகளை விஜய் கொடுப்பார் என ஆதவ் தெரிவித்திருந்தார்.