'Sofa Model' தவெக ஆட்சியில் எம்எல்ஏ-க்களை கொள்முதல் செய்றாங்க.. உதயநிதி ஸ்டாலின் நேரடி அட்டாக்!

Updated: Wednesday, June 17, 2026, 12:59 [IST]

Subscribe to Oneindia Tamil

சென்னை: இந்த ஆட்சி எதை கொள்முதல் செய்கிறதோ இல்லையோ, அடுத்த கட்சி ஆட்களையும் அடுத்த கட்சி எம்.எல்.ஏக்களையும் தொடர்ச்சியாக கொள்முதல் செய்கிறது என்று தவெகவை எதிர்க்கட்சி தலைவர் உதயநிதி ஸ்டாலின் அட்டாக் செய்துள்ளார்.

சட்டசபைத் தேர்தலில் அடைந்த தோல்விக்கு பின் திமுகவில் மறுசீரமைப்பு பணிகள் நடந்து வருகிறது. இதற்கிடையே திமுக வழக்கம் போல் கட்சி நிர்வாகிகளின் குடும்ப நிகழ்ச்சிகளில் மட்டும் முன்னாள் முதல்வர் ஸ்டாலின், எதிர்க்கட்சித் தலைவர் உதயநிதி ஸ்டாலின் உள்ளிட்டோர் பங்கேற்று வருகின்றனர். அந்த வகையில் ஆற்காடு வீராசாமியின் இல்ல திருமண நிகழ்ச்சியில் ஸ்டாலின் மற்றும் உதயநிதி பங்கேற்றனர்.

இதில் உதயநிதி ஸ்டாலின் பேசுகையில், இன்றைக்கு எந்தக் கட்சி ஆட்சிக்கு வருகிறதோ, அந்தக் கட்சியின் கரை வேட்டி கட்டிக் கொண்டு சுற்றும் ஆட்களை நாம் இப்போது அதிகமாக பார்த்து கொண்டிருக்கிறோம். அதிலும் சோஃபா மாடல் ஆட்சிக்கு வந்ததற்கு பின் இப்படியான சம்பவங்கள் அதிகமாக இருக்கிறது.

இந்த அரசு எதை கொள்முதல் செய்கிறதோ இல்லையோ, அடுத்த கட்சி ஆட்களையும், எம்எல்ஏ-க்களையும் தொடர்ச்சியாக கொள்முதல் செய்து கொண்டு வருகிறது. இப்படிப்பட்டவர்களுக்கு மத்தியில் ஒரே கொடி, ஒரே கட்சி, ஒரே இயக்கம் என்று ஐயா ஆற்காடு வீராசாமி பயணம் செய்து கொண்டிருக்கிறார். நமக்கு வாக்களிக்காத மக்கள் எல்லாம் இந்த ஆட்சிக்கு வாக்களிக்காமல் விட்டுவிட்டோமோ என்ற எண்ணத்தில் இருந்தார்கள்.

ஆனால் சோஃபா மாடல் ஆட்சி அமைந்த பின் இப்படிப்பட்ட மோசமான ஆட்சிக்கு நாம் ஓட்டு போட்டு விட்டோமே என்று மக்கள் வருத்தப்பட தொடங்கியுள்ளார்கள். இந்த சோஃபா மாடல் ஆட்சியை மக்கள் வீட்டுக்கு அனுப்பும் நாள் வெகு தொலைவில் இல்லை. ஸ்டாலின் தலைமையில் மீண்டும் திமுக ஆட்சி அமையும். தமிழ்நாடு வளர்ச்சி பாதையில் செல்லும் என்று தெரிவித்துள்ளார்.

தவெக ஆட்சியை உதயநிதி ஸ்டாலின் தொடர்ச்சியாக சோஃபா மாடல் ஆட்சி என்று விமர்சித்து வருகிறார். ஏற்கனவே தவெக ஆட்சி அமைப்பதற்கு முன்பாகவே சிவி சண்முகம் மற்றும் விசிக அலுவலகங்களில் புதிய சோஃபா இறக்கப்பட்டது. அதுமட்டுமல்லாமல் அதிமுக அதிருப்தி எம்எல்ஏ-க்கள் அடுத்தடுத்து ராஜினாமா செய்து வருகின்றனர். நேற்று விஜயபாஸ்கர் ராஜினாமா செய்த பின், உதயநிதி ஸ்டாலின் 5 சீட்டர் சோஃபா என்று கிண்டல் செய்து பதிவிட்டிருப்பது அக்கட்சியினர் மத்தியில் வரவேற்பை பெற்றது.