யாரு ஹீரோ? விஜய் Vs உதய்! பட்ஜெட் கூட்டத்தில் பட்டைய கிளப்புவது யார்? பரபரப்பாய் ரெடியாகும் லிஸ்ட்!
சென்னை: தமிழக வெற்றிக் கழக அரசின் முதல் பட்ஜெட் கூட்டத்தொடர் வரும் 18-ஆம் தேதி தொடங்க உள்ள நிலையில், அரசுத் தரப்பும் எதிர்க்கட்சித் தரப்பும் சட்டசபை விவாதத்திற்காக தீவிரமாக தயாராகி வருகின்றன. குறிப்பாக, எதிர்க்கட்சித் தலைவராக பொறுப்பேற்ற பிறகு தனது முதல் முழுமையான பட்ஜெட் கூட்டத்தொடரை சந்திக்க உள்ள உதயநிதி ஸ்டாலின், சட்டசபையை அதிர வைக்க பல 'ஆயுதங்களுடன்' தயாராகி வருவதாக தகவல்கள் தெரிவிக்கின்றன.
2026 சட்டமன்றத் தேர்தலுக்குப் பிறகு தமிழக அரசியலில் பெரிய மாற்றங்கள் ஏற்பட்டுள்ளன. நடிகர் விஜய் தலைமையிலான தமிழக வெற்றிக் கழகம் ஆட்சியை அமைத்த நிலையில், திமுக முக்கிய எதிர்க்கட்சியாக சட்டசபையில் அமர்ந்துள்ளது.
இந்த சூழலில் நடைபெற உள்ள முதல் பட்ஜெட் கூட்டத்தொடர் அரசியல் ரீதியாகவும் மிகுந்த முக்கியத்துவம் பெற்றதாக பார்க்கப்படுகிறது. முதல்வர் விஜய் தலைமையிலான அரசின் முதல் பட்ஜெட் என்பதால் மக்களிடையே அதிக எதிர்பார்ப்பு நிலவுகிறது.
பட்ஜெட் கூட்டத்தொடர்
அதே நேரத்தில், எதிர்க்கட்சித் தலைவராக உதயநிதி ஸ்டாலின் எவ்வாறு செயல்படப் போகிறார் என்ற ஆர்வமும் அரசியல் வட்டாரங்களில் காணப்படுகிறது. இதற்கு முன்பு தமிழக வெற்றிக் கழக அரசு நம்பிக்கை வாக்கெடுப்பை எதிர்கொண்டபோது, உதயநிதி ஸ்டாலின் ஆற்றிய உரை பெரும் கவனத்தை ஈர்த்தது. ஆளுங்கட்சியின் செயல்பாடுகள், கூட்டணி மற்றும் தேர்தல் வாக்குறுதிகள் குறித்து அவர் முன்வைத்த விமர்சனங்கள் அரசியல் அரங்கில் பரவலாக பேசப்பட்டன.
முதல்வர் விஜய்
அதன் பின்னர் முதல்வர் விஜய் நேரடி பதிலுக்கு பதிலாக விரிவான விளக்க அறிக்கை வெளியிட்டது குறித்து எதிர்க்கட்சிகள் விமர்சனம் செய்தன. இந்த பின்னணியில், வரவிருக்கும் பட்ஜெட் கூட்டத்தொடரில் ஆளுங்கட்சியும் எதிர்க்கட்சியும் நேரடியாக மோதும் சூழல் உருவாகியுள்ளது. இந்த கூட்டத்தொடரில் மேகதாது அணை விவகாரம், மின்வெட்டு, சட்டம்-ஒழுங்கு நிலைமை உள்ளிட்ட முக்கிய பிரச்சனைகளை எழுப்ப திமுக திட்டமிட்டுள்ளதாக கூறப்படுகிறது.
உதயநிதி ஸ்டாலின்
மேலும், இவை தொடர்பாக கவன ஈர்ப்பு தீர்மானங்களையும் கொண்டு வருவதற்கான ஆலோசனைகள் நடைபெற்று வருகின்றன. குறிப்பாக, கர்நாடகாவின் மேகதாது அணைத் திட்டம் தொடர்பாக கடந்த காலத்தில் நடந்த சட்டப் போராட்டங்கள், அரசியல் நடவடிக்கைகள் மற்றும் காவிரி நீர் உரிமை விவகாரங்கள் குறித்து முன்னாள் அமைச்சர்கள் மற்றும் அனுபவமிக்க அதிகாரிகளிடம் இருந்து உதயநிதி விரிவான விளக்கங்களை பெற்று வருவதாக தகவல் வெளியாகியுள்ளது.
சட்டம்-ஒழுங்கு
மின்வெட்டு தொடர்பான விவகாரங்களை சட்டசபையில் ஆவணங்களுடன் முன்வைப்பதற்காக மின்வாரிய அதிகாரிகளிடம் இருந்து தரவுகள் சேகரிக்கப்பட்டு வருவதாக கூறப்படுகிறது. அதேபோல், கடந்த ஐந்து ஆண்டுகளின் குற்றப் புள்ளிவிவரங்கள், சட்டம்-ஒழுங்கு தொடர்பான தரவுகள் மற்றும் நிர்வாக செயல்பாடுகள் குறித்த அறிக்கைகளும் ஆய்வு செய்யப்படுகின்றன.
சட்டசபை
சட்டசபை நடைமுறைகள், விதிமுறைகள் மற்றும் விவாத உத்திகள் குறித்து அனுபவம் வாய்ந்த முன்னாள் அதிகாரிகள் மற்றும் சட்டமன்ற செயல்பாடுகளை நன்கு அறிந்தவர்களுடன் உதயநிதி தொடர்ந்து ஆலோசனை நடத்தி வருவதாகவும் தகவல்கள் தெரிவிக்கின்றன. எதிர்க்கட்சியின் தாக்குதல்களை சமாளிக்க ஆளுங்கட்சித் தரப்பும் தயாராகி வருகிறது. குறிப்பாக, சட்டசபையில் எழுப்பப்படும் கேள்விகளுக்கு உடனுக்குடன் பதிலளிக்க வேண்டிய அவசியம் இருப்பதால், முதல்வர் விஜயும் துறை சார்ந்த விவரங்களை ஆய்வு செய்து வருவதாக கூறப்படுகிறது.
எதிர்க்கட்சிகள்
அமைச்சர்கள் மற்றும் அதிகாரிகளிடமிருந்து பல்வேறு துறைகள் தொடர்பான விளக்கங்கள் பெறப்பட்டு வருவதாகவும், எதிர்க்கட்சிகள் முன்வைக்கும் விமர்சனங்களுக்கு தரவுகளுடன் பதிலளிக்க திட்டமிடப்பட்டுள்ளதாகவும் தகவல்கள் தெரிவிக்கின்றன. இந்த பட்ஜெட் கூட்டத்தொடர் வெறும் நிதிநிலை அறிக்கை தாக்கல் செய்யும் கூட்டமாக மட்டும் இல்லாமல், தமிழக வெற்றிக் கழக அரசின் செயல்திறனை மதிப்பீடு செய்யும் அரசியல் மேடையாகவும் அமைய உள்ளது.
விஜய் - உதயநிதி
ஒருபுறம் ஆட்சியின் சாதனைகளை விளக்க வேண்டிய கட்டாயம் விஜய் அரசுக்கு இருக்கிறது. மறுபுறம், எதிர்க்கட்சித் தலைவராக தனது திறனை நிரூபிக்க வேண்டிய சூழல் உதயநிதி ஸ்டாலினுக்கு உருவாகியுள்ளது. எனவே, வரும் 18-ஆம் தேதி தொடங்கும் சட்டசபை கூட்டத்தொடர், தமிழக அரசியலில் புதிய மோதல்களுக்கு மேடையாக மாறும் என்ற எதிர்பார்ப்பு அரசியல் வட்டாரங்களில் எழுந்துள்ளது. குறிப்பாக, விஜய் - உதயநிதி நேரடி மோதல் சட்டசபையில் எப்படி போகிறது என்பதையே அனைவரும் ஆர்வத்துடன் எதிர்நோக்கி வருகின்றனர்.
Click it and Unblock the Notifications
Sign in with Google
