வாக்காளர் அட்டையுடன் ஆதாரை "ஆன்லைனில்" இணைக்கலாம்.. கோவை கலெக்டர் கொடுத்த சூப்பர் விளக்கம்
கோவை: படிவம் 6பியை பயன்படுத்தி வாக்காளர் அட்டையுடன் ஒவ்வொருவரும் தங்களது ஆதார் எண்ணை இணைத்து கொள்ளலாம். மேலும், ஆன்லைனிலும் விண்ணப்பம் செய்யலாம் என கோவை மாவட்ட கலெக்டர் சமீரன் கூறியுள்ளார்.
இந்திய தேர்தல் ஆணையம் இரட்டை வாக்கு முறையை ஒழிப்பதற்கான நடவடிக்கையை மேற்கொண்டு வருகிறது. அதாவது சிலருக்கு வெவ்வேறு தொகுதிகளிலும், வெவ்வேறு மாநிலங்களிலும் ஓட்டுக்கள் உள்ளன. இதை தடுக்கும் வகையிலும் வாக்காளர் பட்டியலை நூறு சதவீதம் தூய்மையாக்கும் நோக்கத்திலும் இந்திய தேர்தல் ஆணையம் செயல்பட்டு வருகிறது.
இதற்கான திட்டங்கள் வகுக்கப்பட்டு நடைமுறைப்படுத்தப்பட்டுள்ளது. இதன் ஒருபகுதியாக வாக்காளர்களின் தனி தகவல்களை உறுதிப்படுத்தும் பணி துவங்கப்பட்டுள்ளது. அதாவது வாக்காளர் பட்டியலுடன் ஆதார் எண்ணை இணைக்க ஆணையம் உத்தரவிட்டுள்ளது.
தலைமை தேர்தல் அதிகாரி ஆலோசனை
இதுதொடர்பாக நேற்று சென்னையில் தலைமை தேர்தல் ஆணையர் சத்யபிரதா சாகு தலைமையில் அங்கீகரிக்கப்பட்ட கட்சிகளின் பிரதிநிதிகளுடன் ஆலோசனை நடத்தப்பட்டது. இதன் தொடர்ச்சியாக மாவட்ட கலெக்டர்கள் சார்பிலும் கட்சி நிர்வாகிகளுடன் ஆலோசனை கூட்டம் நடைபெற்று வருகிறது. இந்த கூட்டத்தில் வாக்காளர் பட்டியலுடன் ஆதார் எண்ணை இணைப்பது குறித்து விளக்கங்கள் அளிக்கப்பட்டு வருகிறது. அந்த வகையில் கோவை மாவட்ட கலெக்டர் அலுவலகத்தில் அனைத்துக்கட்சி பிரதிநிதிகளுடனான ஆலோசனைக் கூட்டம் நடந்தது.
6பி படிவம் மூலம்..
இதில் மாவட்ட கலெக்டர் சமீரன் பேசினார். அப்போது அவர் கூறியதாவது: ''மாவட்டத்தில் 10 சட்டசபை தொகுதிகள் உள்ளன. ஒவ்வொரு வாக்காளர்களும் ஆதார் எண்ணை வாக்காளர் அட்டையுடன் இணைக்க வேண்டும். இதனை வாக்குச்சாவடி நிலை அலுவலர்கள் வழங்கும் 6பி படிவத்தை பூர்த்தி செய்து மேற்கொள்ளலாம்.
ஆன்லைனில் விண்ணப்பம்
இல்லாவிட்டால் www.nvsp.in இணையதளம் மூலம் அல்லது VOTER HELP LINE செயலி மூலமாக ஆதார் எண்ணை வாக்காளர் பட்டியலுடன் இணைத்து கொள்ளலாம். மேலும், தங்களது பகுதிக்குட்பட்ட வாக்காளர் பதிவு அலுவலர்கள், உதவி வாக்காளர் பதிவு அலுவலர்களின் அலுவலகங்கள், வாக்காளர் உதவி மையம் மற்றும் இ-சேவை மையங்களை அணுகியும் வாக்காளர் பட்டியலுடன் ஆதார் எண்ணை இணைத்துக் கொள்ளலாம்.
ஆதார் இல்லாவிட்டாலும்..
மேலும் சிலர் ஆதார் அட்டை இன்றி இருக்கலாம். அப்படி ஆதார் எண் இல்லாதவர்கள் இந்திய தேர்தல் ஆணையத்தால் அங்கீகரிக்கப்பட்டுள்ள 11 வகை ஆவணங்களில் ஏதேனும் ஒன்றை படிவம் 6பியுடன் இணைத்து கொள்ளலாம்'' என்றார்.
Click it and Unblock the Notifications
Sign in with Google