லக்கிம்பூர் வன்முறை- மகன் காரணமா?ஆதாரம் காட்டுங்க--ராஜினாமா செய்யறேன்.. மத்திய அமைச்சர் அஜிஸ் மிஸ்ரா

Published: Tuesday, October 5, 2021, 13:57 [IST]

Subscribe to Oneindia Tamil

டெல்லி: 9 பேரை பலி கொண்ட உ.பி. லக்கிம்பூர் வன்முறைக்கு என் மகன்தான் காரணம் என ஆதாரத்தை காட்டினால் நான் பதவியை ராஜினாமா செய்கிறேன் என்று மத்திய உள்துறை இணை அமைச்சர் அஜிஸ் மிஸ்ரா தெரிவித்துள்ளார்.

மத்திய அரசின் வேளாண் சட்டங்களுக்கு எதிராக டெல்லியில் தொடங்கிய போராட்டம் உ.பி.யிலும் வெடித்தது. உ.பி.யின் லக்கிம்பூரில் விவசாயிகள் போராட்டம் நடத்தினர்.

அந்த போராட்டத்தின் போது பாஜக அமைச்சர்கள், தலைவர்கள் சென்ற வாகனம் வழிமறிக்கப்பட்டு கறுப்புக் கொடி காட்டப்பட்டது. அப்போது வேண்டும் என்றே போராட்டம் நடத்திய விவசாயிகள் மீது வாகனம் ஒன்று மோதி தள்ளியது.

லக்கிம்பூர் வன்முறையில் 9 பேர் பலி

இதில் 2 விவசாயிகள் சம்பவ இடத்திலேயே பலியாகினர். இந்த வாகனத்தை ஓட்டியது மத்திய உள்துறை இணை அமைச்சர் அஜிஸ் மிஸ்ராவின் மகன் ஆஷிஸ் மிஸ்ரா எனக் கூறப்பட்டது. இதனால் கொந்தளித்த விவசாயிகள், பாஜக தலைவர்களின் வாகனங்களை வழிமறித்து தாக்குதல் நடத்தினர். இந்த வன்முறையில் இதுவரை 9 பேர் பலியாகினர்.

போர்க்களமான உ.பி.

நாடு முழுவதும் இந்த வன்முறை சம்பவங்கள் பெரும் கொந்தளிப்பை ஏற்படுத்தியுள்ளது. தற்போது உத்தரப்பிரதேச மாநிலமே போர்க்களமாகி உள்ளது. பெரும்பாலான எதிர்க்கட்சித் தலைவர்கள் உ.பி.யி.ல் போராடும் விவசாயிகளுடன் கை கோர்க்க முயற்சிக்கின்றனர். ஆனால் உ.பி. மாநில அரசு அரசியல் தலைவர்களை தடுத்து நிறுத்தி கைது செய்து வருகிறது.

ஆதாரத்தை காட்டுங்க

இதனிடையே மத்திய அமைச்சர் மகன் ஆஷிஸ் மிஸ்ரா மீது கொலை வழக்கும் பதிவு செய்யப்பட்டுள்ளது. மேலும் மத்திய அமைச்சர் பதவியில் இருந்து அஜிஸ் மிஸ்ரா ராஜினாமா செய்ய வேண்டும் என்கிற கோரிக்கையும் வலுத்து வருகிறது. இது தொடர்பாக கருத்து தெரிவித்த அஜிஸ் மிஸ்ரா, லக்கிம்பூர் வன்முறைக்கு என் மகன்தான் காரணம் என ஒரு ஆதாரத்தையாவது காட்டுங்கள். நான் பதவியை ராஜினாமா செய்கிறேன் என்றார்.

சமூக விரோதிகளே காரணம்

மேலும் நாங்கள் சிறப்பு விருந்தினரை வரவேற்க காத்திருந்தோம். அப்போது சமூக விரோதிகள் சிலர்தான் வன்முறையில் ஈடுபட்டனர். இதில் எங்கள் ஓட்டுநர், பாஜக தொண்டர்கள் என பலரும் பலியாகி உள்ளனர். என் மகனுக்கு தொடர்பிருக்கிறது என ஆதாரத்தைக் காட்டுங்கள். அதன்பிறகு பதவியை நிச்சயம் ராஜினாமா செய்வேன் என்றார் அஜிஸ் மிஸ்ரா.

Published On October 5, 2021