சீனாவின் உதவியுடன்.. விண்வெளியில் இருந்தபடி இந்தியாவை உளவு பார்க்கும் பாகிஸ்தான்.. பகீர்

Updated: Thursday, June 11, 2026, 19:52 [IST]

Subscribe to Oneindia Tamil

டெல்லி: கிட்டத்தட்ட எல்லாத் துறைகளிலும் பாகிஸ்தானை விட நாம் பல மடங்கு முன்னேறித் தான் இருக்கிறோம். ஆனால், விண்வெளி பாதுகாப்பு என வரும்போது அதில் நிலைமை சற்று சிக்கலாகவே இருக்கிறது. சீனாவின் உதவியுடன் பாகிஸ்தான் விண்வெளி கண்காணிப்பைப் பல மடங்கு மேம்படுத்தி வரும் சூழலில், இந்தியா இதில் சற்று பின்தங்கி இருப்பதாகக் கூறப்படுகிறது.

சீனாவின் உதவியுடன் பாகிஸ்தான் தனது விண்வெளி கண்காணிப்பு திறனைத் தீவிரமாக மேம்படுத்தி வருகிறது. அதே நேரத்தில், இந்தியாவின் சொந்தத் தொழில்நுட்பமான 'நாவிக்', மிக முக்கியமான சவால்களைச் சந்தித்துள்ளது. அணு ஆயுதம் கொண்ட அண்டை நாடுகளுக்கு இடையே விண்வெளித் துறையில் வளர்ந்து வரும் இடைவெளியை இது காட்டுவதாக வல்லுநர்கள் குறிப்பிடுகிறார்கள்.

பாகிஸ்தான்

கடந்த 16 மாதங்களில், பாகிஸ்தான் ஆறு புவி கண்காணிப்பு செயற்கைக்கோள்களை விண்ணில் செலுத்தியுள்ளது. பல செயற்கைக்கோள்கள் சீனாவின் தொழில்நுட்ப ஆதரவுடன் ஏவப்பட்டுள்ளன. இது பாகிஸ்தானின் விண்வெளித் திட்டத்தில் ஒரு மிகப் பெரிய முன்னேற்றமாகக் கருதப்படுகிறது. இந்தத் திடீர் நடவடிக்கை, காஷ்மீரின் பஹல்காம் தாக்குதலுக்கு முன்பே திட்டமிடப்பட்டிருப்பதாகத் தெரிகிறது. விண்வெளிக்கு சாட்டிலைட் அனுப்பி, அதன் மூலம் இந்தியாவைக் கண்காணிக்கும் ஒரு யுக்தியாக பாகிஸ்தான் இதைச் செய்யலாம் என்று எச்சரிக்கிறார்கள்.

கண்காணிப்பு

இந்தச் செயற்கைக்கோள்கள் வெறும் புவி கண்காணிப்பிற்காக மட்டும் ஏவப்படவில்லை.. இவை உயர் தெளிவுத்திறன் கொண்ட படங்களை எடுக்கும் திறன் கொண்டதாகவும். மேலும், நிலப்பரப்பில் ஏற்படும் மாற்றங்களைக் கண்காணித்தல், மறைக்கப்பட்ட கட்டமைப்புகளைக் கண்டறிதல் மற்றும் ராணுவ முக்கியத்துவம் வாய்ந்த பகுதிகளைத் தொடர்ந்து கண்காணிப்பது ஆகிய வேலைகளைச் செய்யக்கூடியது. பாகிஸ்தானின் சமீபத்திய இந்தச் செயற்கைக்கோள் திட்டம் ஒரு தெளிவான ராணுவ திட்டமாக இருக்கலாம் என்று இந்தியக் கடற்படையின் முன்னாள் அதிகாரி ரியர் அட்மிரல் சுதிர் பிள்ளை குறிப்பிட்டுள்ளார்.

இந்தியா

மறுபுறம் இஸ்ரோ உருவாக்கிய 'நாவிக்' அமைப்பு, அமெரிக்காவின் ஜிபிஎஸ் தொழில்நுட்பத்திற்கு இணையான ஒரு அமைப்பாகும். 1999 கார்கில் போரின்போது, இதுபோல வெளிநாட்டுத் தொழில்நுட்பத்தை மட்டுமே நம்பியிருப்பது எவ்வளவு ஆபத்தானது என்பதை இந்தியா உணர்ந்தது. அந்தப் பாடத்திலிருந்து உருவானதே 'நாவிக்'. இந்த அமைப்பு இந்தியா முழுவதிலும் மற்றும் அதன் எல்லைகளுக்கு அப்பால் சுமார் 1,500 கி.மீ தூரம் வரை இருப்பிடச் சேவைகளை வழங்குகிறது. இது பொதுமக்கள் பயன்பாடு மற்றும் ராணுவ பயன்பாட்டிற்காக வடிவமைக்கப்பட்டுள்ளது.

ஆனால், நாவிக் திட்டம் முழுமையாக வெற்றி எனச் சொல்ல முடியாது. நாவிக் திட்டம் தற்போது ஒரு இக்கட்டான நிலையில் உள்ளது. இதற்குப் பல முக்கியக் காரணங்கள் உள்ளன. முதலாவதாக, 2013 முதல் 2016 வரை ஏவப்பட்ட முதல் தலைமுறை செயற்கைக்கோள்கள் தங்களின் ஆயுட்காலத்தை எட்டிவிட்டன. இரண்டாவதாக, செயற்கைக்கோள்களின் இதயமாக விளங்கும் ரூபிடியம் அணு கடிகாரங்கள் பழுதடைந்துள்ளன.. இவை செயல்படாவிட்டால் துல்லியமான கணக்கீடுகளைச் செய்ய முடியாது..

சிக்கல் மேல் சிக்கல்

இறுதியாக, இந்த அமைப்பை வலுப்படுத்த ஏவப்பட்ட NVS-02 செயற்கைக்கோள், தொழில்நுட்பக் கோளாறு காரணமாகச் சரியான சுற்றுப்பாதையை அடையத் தவறிவிட்டது. இது திட்டத்திற்குப் பெரும் பின்னடைவை ஏற்படுத்தியுள்ளது. இதனால் முழுமையாகச் செயல்படும் சாட்டிலைட்கள் எண்ணிக்கை கணிசமாகக் குறைந்துள்ளது. இது இந்தியாவின் திட்டத்திற்குப் பெரும் சவாலாக மாறுகிறது.

இந்தச் சவால்கள் இருந்தாலும், இஸ்ரோ நாவிக் திட்டத்தைக் கைவிடவில்லை. இரண்டாம் தலைமுறை நாவிக் செயற்கைக்கோள்களை ஏவுவதற்கான பணிகள் தீவிரமாக நடைபெற்று வருகின்றன. இவை தற்போதுள்ள L5 மற்றும் S-பேண்ட் அலைவரிசைகளுடன், புதிய L1-பேண்ட் அலைவரிசையையும் கொண்டிருக்கும். இது ஸ்மார்ட்போன்களில் நாவிக் வசதியைப் பயன்படுத்துவதை எளிதாக்கும்.

அடுத்து என்ன!

ஏவுகணை வழிகாட்டுதல், கடற்படை செயல்பாடுகள், ராணுவத் தொடர்பு மற்றும் பேரிடர் மேலாண்மை போன்ற மிக முக்கியமான பணிகளுக்கு இந்தியாவுக்கு எனச் சொந்த வழிசெலுத்தல் அமைப்பு இன்றியமையாதது. பாகிஸ்தான் விண்ணில் தனது கண்களை விரிவுபடுத்தி வரும் சூழலில், இந்தியா தனது விண்வெளித் தற்காப்பை வலுப்படுத்துவதும், நாவிக் அமைப்பை முழுமையாகச் செயல்பாட்டுக்குக் கொண்டுவருவதும் தேசிய பாதுகாப்பின் மிக முக்கியமான முன்னுரிமையாக மாறியுள்ளது.