ஆப்கான் அதிகார மாற்றம்.. பயங்கரவாத சித்தாந்தங்களை ஊக்குவிக்கும்.. பிரதமர் மோடி பேச்சு!

Published: Friday, September 17, 2021, 20:56 [IST]

Subscribe to Oneindia Tamil

டெல்லி: ஆப்கானிஸ்தானில் அதிகார மாற்றம் பேச்சுவார்த்தை இல்லாமல் நடந்தது. இந்த தன்மை உலகெங்கிலும் உள்ள பயங்கரவாத மற்றும் தீவிரவாத சித்தாந்தங்களை ஊக்குவிக்கும் என்று பிரதமர் நரேந்திர மோடி கூறினார்.

ரஷ்யா, சீனா, கிர்கிஸ்தான், கஜகஸ்தான், தஜிகிஸ்தான், உஸ்பெகிஸ்தான் ஆகிய நாடுகள் இணைந்து ஷாங்காயை தலைமையிடமாகக் கொண்டு ஷாங்காய் ஒத்துழைப்பு அமைப்பை கடந்த 2001-ம் ஆண்டு அமைப்பை நிறுவின.

இதனை தொடர்ந்து கடந்த 2017-ம் ஆண்டு முதல் இந்தியாவும், பாகிஸ்தானும் ஷாங்காய் ஒத்துழைப்பு அமைப்பில் நிரந்தர உறுப்பு நாடுகளாகி விட்டன. இந்த நிலையில் ஷாங்காய் ஒத்துழைப்பு அமைப்பின் உச்சி மாநாடு தஜிகிஸ்தான் தலைநகர் துஷான்பேயில் தொடங்கியது.

ஷாங்காய் ஒத்துழைப்பு மாநாடு

நேரடியாகவும், காணொளி முறையிலும் இந்த மாநாடு நடந்து வருகிறது. இந்த மாநாட்டில் உறுப்பு நாடுகள் மற்றும் பார்வையாளர் நாடுகளின் தலைவர்கள் கலந்து கொண்டனர். இந்தியா சார்பில் பிரதமர் நரேந்திர மோடி தலைமையில் இந்திய உயர்மட்டக் குழு பங்கேற்றுள்ளது. இந்திய வெளியுறவு மந்திரி ஜெய்சங்கர், இந்தியாவின் பிரதிநிதியாக நேரில் கலந்து கொண்டுள்ளார்.

ஆப்கானிஸ்தான் நிலவரம்

இந்த நிலையில் பிரதமர் மோடி காணொளி வாயிலாக ஷாங்காய் ஒத்துழைப்பு மாநாட்டில் கலந்து கொண்டு உரையாற்றினார். அப்போது அவர் கூறியதாவது:- ஆப்கானிஸ்தானில் தொடர்ந்து உறுதியற்ற தன்மை நிலவுகிறது. ஆப்கானிஸ்தானின் சமீபத்திய மாற்றம் இந்தியா போன்ற அண்டை நாடுகளில் மிகப்பெரிய தாக்கத்தை ஏற்படுத்தும். ஆப்கானிஸ்தான் தன்மை உலகெங்கிலும் உள்ள பயங்கரவாத மற்றும் தீவிரவாத சித்தாந்தங்களை ஊக்குவிக்கும்.

பேச்சுவார்த்தை இல்லை

ஆப்கானிஸ்தானில் அதிகார மாற்றம் பேச்சுவார்த்தை இல்லாமல் நடந்தது. பிற பயங்கரவாத குழுக்களும் வன்முறையின் மூலம் அதிகாரத்தைப் பெற ஊக்குவிக்கப்படலாம். நிதி மற்றும் வர்த்தகப் பாய்ச்சல்களில் தடை காரணமாக ஆப்கானிஸ்தான் மக்களின் பொருளாதார துயரங்கள் அதிகரித்து வருகின்றன. ஆப்கானிஸ்தான் மாற்றம் கட்டுப்பாடற்ற போதைப்பொருள், சட்டவிரோத ஆயுதங்கள் மற்றும் மனித கடத்தலுக்கு வழிவகுக்கும்.

இந்தியா உதவ விரும்புகிறது

ஆப்கானிஸ்தானில் அதிக அளவு மேம்பட்ட ஆயுதங்கள் உள்ளன. இவற்றின் காரணமாக, முழு பிராந்தியத்திலும் ஸ்திரமின்மை ஏற்படும் அபாயம் ஏற்படும். ஆப்கானிஸ்தான் மக்களுக்கு இந்தியா இன்னும் உதவ விரும்புகிறது. மனிதாபிமான உதவிகள் ஆப்கானிஸ்தானுக்கு தடையின்றி சென்றடைவதை உலக தலைவர்கள் உறுதி செய்ய வேண்டும். ஆப்கானிஸ்தானின் சமீபத்திய மாற்றம் தீவிரமயமாக்கலின் சவாலை இன்னும் தெளிவாகக் காட்டியுள்ளன. தீவிரவாதத்தை எதிர்த்துப் போராட ஷாங்காய் ஒத்துழைப்பு மாநாடு(எஸ்சிஓ) ஒரு பகிரப்பட்ட டெம்ப்ளேட்டை உருவாக்க வேண்டும்.

மரியாதை வேண்டும்

நிலப்பரப்புள்ள மத்திய ஆசிய நாடுகள் இந்தியாவின் பரந்த சந்தையுடன் இணைப்பதன் மூலம் பெரும் நன்மை அடைய முடியும் என்று நாங்கள் நம்புகிறோம்.பரஸ்பர நம்பிக்கையை உறுதிப்படுத்த, இணைப்புத் திட்டங்கள் ஆலோசனை, வெளிப்படையான மற்றும் பங்கேற்பாக இருக்க வேண்டும். அனைத்து நாடுகளின் பிராந்திய ஒருமைப்பாட்டிற்கும் மரியாதை இருக்க வேண்டும். அறிவியல் மற்றும் பகுத்தறிவு சிந்தனையை நோக்கி நமது திறமையான இளைஞர்களை ஊக்குவிக்க வேண்டும். வளர்ந்து வரும் தொழில்நுட்பத்தில் இந்தியாவை பங்குதாரராக மாற்றுவதற்கான புதுமையான மனநிலையை உருவாக்க நாங்கள் எங்கள் தொடக்கங்கள் மற்றும் தொழில்முனைவோர்களை ஒன்றிணைக்க முடியும். இவ்வாறு பிரதமர் மோடி கூறினார். பிரதமர் மோடி பேசும்போது பாகிஸ்தான் பிரதமர் இம்ரான் காணும் மாநாட்டில் இருந்தது குறிப்பிடத்தக்கது.

Published On September 17, 2021