தமிழன்டா! டாடா குழுமத்தில் திருப்பம்.. என். சந்திரசேகரனுக்கு மீண்டும் 5 ஆண்டுகள் பதவி நீட்டிப்பு!
டெல்லி: இந்தியாவின் முன்னணி மற்றும் மிகப்பெரிய தொழில் குழுமமான டாடா குழுமத்தின் தலைமைப் பொறுப்பில் மிகப் பெரிய மற்றும் எதிர்பாராத திருப்பம் ஏற்பட்டுள்ளது. டாடா சன்ஸ் நிறுவனத்தின் செயல் தலைவராக (இருக்கும் என். சந்திரசேகரனுக்கு மேலும் 5 ஆண்டுகள் பதவி நீட்டிப்பு வழங்கி டாடா சன்ஸ் நிர்வாகக் குழு ஒப்புதல் அளித்துள்ளது.
மும்பையில் நடைபெற்ற டாடா சன்ஸ் நிர்வாகக் குழுக் கூட்டத்தில் இந்த முக்கிய முடிவு எடுக்கப்பட்டதாகத் தகவல்கள் தெரிவிக்கின்றன. இதன் மூலம் டாடா குழுமத்தை வழிநடத்தும் தலைமைப் பொறுப்பில் அவரே தொடர்ந்து நீடிப்பது உறுதியாகியுள்ளது.
திடீர் முடிவின் பின்னணி
சந்திரசேகரனின் தற்போதைய பதவிக்காலம் 2027 பிப்ரவரியுடன் முடிவடைய உள்ளது. கடந்த மாதம் அவர் வெளியிட்ட தகவலில், நடப்புப் பதவிக்காலம் முடிந்த பிறகு மீண்டும் இப்பதவியில் தொடர விருப்பமில்லை என்று தெரிவித்திருந்தார். இதனால் அடுத்த தலைவர் யார், புதிய தலைவரை எவ்வாறு தேர்வு செய்வது என்பது குறித்துப் பல்வேறு விவாதங்கள் எழுந்தன.
ஆனால், வியாழக்கிழமை நடந்த கூட்டத்தில் அவர் தனது முடிவை மாற்றிக் கொண்டதாகவும், மீண்டும் 5 ஆண்டுகள் தலைவராகத் தொடர நிர்வாகக் குழு முறைப்படி ஒப்புதல் தந்துள்ளதாகவும் தகவல்கள் தெரிவிக்கின்றன. அவர் திடீரென தனது முடிவை மாற்றிக் கொண்டதற்கான உறுதியான காரணங்கள் உடனடியாக அதிகாரப்பூர்வமாகத் தெரிவிக்கப்படவில்லை.
டாடா டிரஸ்ட் மற்றும் தலைமை சர்ச்சை
டாடா சன்ஸ் நிறுவனத்தின் பெரும்பான்மை பங்குகளை டாடா அறக்கட்டளைகள் (Tata Trusts) வைத்துள்ளன. டாடா டிரஸ்ட் தலைவர் நோயல் டாடா, தலைமைப் பொறுப்பில் புதிய மாற்றத்தை ஏற்படுத்த ஆர்வம் காட்டியதாகக் கூறப்பட்டது. சந்திரசேகரன் மீண்டும் தொடர விரும்பவில்லை என்று கூறியதை ஏற்றுக்கொண்டு, அடுத்த தலைவரைத் தேர்ந்தெடுக்கும் பணிகளை டாடா சன்ஸ் நிர்வாகம் முறைப்படி தொடங்க வேண்டும் என்று நோயல் டாடா விரும்பியதாகக் கூறப்படுகிறது.
கடந்த ஆண்டு சந்திரசேகரனின் பதவிக்காலத்தை மேலும் 5 ஆண்டுகள் நீட்டிக்கலாம் என டாடா டிரஸ்ட் ஒருமனதாகப் பரிந்துரை செய்திருந்தது. எனினும், பிப்ரவரியில் நடந்த கூட்டத்தில் நான்கு இயக்குநர்கள் நீட்டிப்புக்கு ஆதரவு தெரிவித்த நிலையில், நோயல் டாடா மட்டும் அதற்கு எதிர்ப்பு தெரிவித்தார். அனைவரும் ஒருமனதாக ஆதரிக்காததால், மீண்டும் அப்பதவிக்கு வர விரும்பவில்லை என சந்திரசேகரன் முன்னதாக கடிதம் எழுதியிருந்தார். இந்நிலையில் தற்போது நிர்வாகக் குழு எடுத்த முடிவு பெரும் கவனத்தை ஈர்த்துள்ளது.
அடுத்த தலைவர் தேர்வுக்கான விதிமுறைகள் என்ன?
டாடா சன்ஸ் நிறுவனத்தின் விதிமுறைகளின்படி, புதிய தலைவரைத் தேர்ந்தெடுக்க ஐந்து பேர் கொண்ட தனிக் குழு அமைக்கப்பட வேண்டும்.
இந்தக் குழுவில் மூன்று பேரை சர் தொராப்ஜி டாடா டிரஸ்ட் மற்றும் சர் ரத்தன் டாடா டிரஸ்ட் இணைந்து நியமிக்கும். மீதமுள்ள இரண்டு பேரை டாடா சன்ஸ் நிர்வாகக் குழு நியமிக்கும். இவர்கள் ஒரு பெயரைப் பரிந்துரைத்த பிறகு, டாடா சன்ஸ் நிர்வாகக் குழுவே இறுதி நியமனத்தை மேற்கொள்ளும்.
தற்போது சந்திரசேகரனின் பதவிக்காலம் மேலும் 5 ஆண்டுகள் நீட்டிக்கப்பட்டுள்ளதால், உடனடியாக புதிய தலைவரைத் தேர்வு செய்ய வேண்டிய கட்டாயம் டாடா குழுமத்திற்கு ஏற்படவில்லை.
பங்குச்சந்தை பட்டியல் குறித்து முடிவு இல்லை
டாடா சன்ஸ் நிறுவனத்தைப் பொதுப் பங்குச்சந்தையில் பட்டியலிடுவது (Listing) தொடர்பாக நீண்ட காலமாகப் பேசப்பட்டு வருகிறது. தலைமை மாற்ற விவாதங்களின் போது டாடா சன்ஸ் எதிர்கால கட்டமைப்பு குறித்தும் ஆலோசிக்கப்பட்டது. எனினும், சந்திரசேகரனின் பதவி நீட்டிப்புக்கு ஒப்புதல் வழங்கப்பட்ட அதே வேளையில், டாடா சன்ஸ் நிறுவனத்தைப் பங்குச்சந்தையில் பட்டியலிடுவது தொடர்பாக எந்த ஒரு புதிய முடிவும் இந்தக் கூட்டத்தில் எடுக்கப்படவில்லை என்று தெரிவிக்கப்பட்டுள்ளது.
யார் இந்த என். சந்திரசேகரன்?
தமிழ்நாட்டின் நாமக்கல் மாவட்டத்தைச் சேர்ந்த என். சந்திரசேகரன், டிசிஎஸ் நிறுவனத்தில் ஒரு சாதாரண ஊழியராகப் பணியைத் தொடங்கி, அதன் தலைமை செயல் அதிகாரியாக உயர்ந்தவர். பின்னர் 2017-ஆம் ஆண்டு டாடா குழுமத்தின் தலைமை நிறுவனமான டாடா சன்ஸ் தலைவராகப் பொறுப்பேற்றார். தொடர்ந்து 2022-ல் இரண்டாவது முறையாக அவருக்குப் பதவி நீட்டிப்பு வழங்கப்பட்டது.
அவரது தலைமையின் கீழ் டாடா குழுமம் விமானப் போக்குவரத்து (ஏர் இந்தியா), எலக்ட்ரானிக்ஸ் மற்றும் குறைக்கடத்தி போன்ற நவீன துறைகளில் பல மடங்கு வளர்ச்சி கண்டுள்ளது. தற்போது மீண்டும் கிடைத்துள்ள 5 ஆண்டு நீட்டிப்பு, டாடா குழுமத்தின் வணிகச் செயல்பாடுகளில் ஒரு தொடர் நிலைத்தன்மையை உறுதி செய்யும் என்று தொழில் துறை வட்டாரங்கள் கருதுகின்றன.
Click it and Unblock the Notifications
Sign in with Google
