கெத்து காட்டும் இந்திய விமானப்படை..! சீனாவை பின்னுக்குத் தள்ளி மூன்றாமிடம்! முழு விவரங்கள் இதோ..!

Updated: Tuesday, May 31, 2022, 20:57 [IST]

Subscribe to Oneindia Tamil

டெல்லி : இந்திய விமானப் படை உலகின் சக்திவாய்ந்த விமானப் படைகளில் மூன்றாவது இடத்தைப் பிடித்துள்ளது. நவீன ராணுவ விமானங்களின் உலக டைரக்டரி வெளியிட்டுள்ள அறிக்கையின்படி, சீனாவை இந்தியா வென்றுள்ளதாக தகவல் வெளியாகியுள்ளது.

நம் நாட்டின் பாதுகாப்பை உறுதி செய்வதில் முப்படைகளில் விமானப்படையின் பங்கு மிக முக்கியமானதாக இருந்து வருகிறது. அந்த வகையில் இந்தியாவின் பாதுகாப்புப் படைகளில் விமானப்படை முக்கியத்துவம் அதிமாகவே உள்ளது என கூறலாம்..

ஆங்கிலேயர் ஆட்சிக் காலத்தின் போது பிரிட்டிஷ் ராயல் விமானப் படையின் ஓர் அங்கமாக அக்டோபர் 8, 1932 அன்று இந்திய விமானப்படை தோற்றுவிக்கப்பட்டது. முதலில் வெறும் 25 வீரர்களைக் கொண்டு இந்திய விமானப் படை தொடங்கப்பட்டது.

இந்திய விமான படை

இரண்டாம் உலகப்போரில், பர்மாவிலிருந்து ஜப்பானியப் படைகள் முன்னேறி வருவதைத் தடுக்கும் பணியில், இந்திய விமானப்படை மிகச் சிறப்பாகச் செயலாற்றியதால், 'ராயல் இந்தியன் ஏர் போர்ஸ்' என்ற பெயரை வழங்கி கௌரவித்தது ஆங்கிலேய அரசு. 1950ஆம் ஆண்டிலிருந்து தற்போது வரை இந்திய விமானப்படை பாகிஸ்தானுடன் 4 போர்களிலும், சீனாவுடன் ஒரு போரிலும் ஈடுபட்டிருக்கிறது.

உலக அளவில் தரவரிசை

ஆபரேஷன் விஜய், ஆபரேஷன் மேக்தூத், ஆபரேஷன் காக்டஸ், ஆபரேஷன் பூமாலை உள்ளிட்ட முக்கிய வான்வெளி ஆபரேஷன்களை இந்திய விமானப்படை நிகழ்த்தியிருக்கிறது. போர் விமானங்கள், போக்குவரத்து விமானங்கள், ஹெலிகாப்டர்கள் என சுமார் 1,600 விமானங்கள் இந்திய விமானப்படையின் வசம் உள்ளன. 1,70,000க்கும் மேற்பட்டோர் இந்திய விமானப் படையில் பணியாற்றி வருகின்றனர். கடந்த சில ஆண்டுகளாகவே உலகின் நான்காவது சக்திமிக்க விமான படையாக இந்தியன் ஏர் போர்ஸ் இருந்து வந்தது.

படைகளில் 3வது இடம்

தற்போது வெளியான தகவல்களின் படி இந்திய விமானப் படை உலகின் சக்திவாய்ந்த விமானப் படைகளில் மூன்றாவது இடத்தைப் பிடித்துள்ளது. World Directory of Modern Military Aircraft எனப்படும் நவீன ராணுவ விமானங்களின் உலக டைரக்டரி வெளியிட்டுள்ள அறிக்கையின் படி அண்டை நாடான சீனாவை பின்னுக்குத் தள்ளி வரலாற்று சாதனையை எட்டியிருக்கிறது இந்தியா விமானப்படை. கடந்த சில மாதங்களுக்கு முன்னர் வரை முதல் 3 இடங்களில் சீனா இருந்தது குறிப்பிடத்தக்கது.

முதலிடத்தில் அமெரிக்கா

இந்தப் பட்டியலில் அமெரிக்கா முதலிடத்திலும் ரஷ்யா இரண்டாவது இடத்திலும் உள்ளது. இந்தியா 3வது இடத்திலும், சீனா 4வது இடத்திலும் உள்ளன. குறிப்பாக உலகின் சக்திமிக்க நாடுகளாக கருதப்படும் ஜப்பான், இஸ்ரேல், பிரான்ஸ் விமானப்படைகளை பின்னுக்கு தள்ளியுள்ளது குறிப்பிடத்தக்கது. 98 நாடுகளின் 124 விமானப்படை சேவைகள் மற்றும் 47,140 போர் விமானங்களை ஆய்வுக்கு உட்படுத்திய உலக டைரக்டரி , இறுதியில் இந்த முடிவுகளை வெளியிட்டுள்ளது.

இந்தியா 69. 4 புள்ளி

அந்த தகவல்களின் அடிப்படையில் அமெரிக்கா 242.9 புள்ளிகளை பெற்று முதலிடத்தையும் ரஷ்யா 114. 2 புள்ளிகளுடன் 2ஆம் இடத்தையும், இந்தியா 69. 4 புள்ளிகளுடன் 3ஆம் இடத்தையும் பிடித்துள்ளது. வெறும் விமானங்களின் எண்ணிக்கை மட்டும் கணக்கில் கொள்ளாமல், செயல்பாடுகள், நவீன தொழில்நுட்பங்கள், பராமரிப்பு உள்ளிட்ட பல்வேறு தகவல்களின் அடிப்படையில் இந்த தரவரிசை வெளியிடப்பட்டுள்ளது என்பது குறிப்பிடத்தக்கது.