ரூ.1.7 கோடி சம்பளம்.. "ஒரு பைசா கூட வரி கட்ட வேண்டாம்.." பெண் பைலட் பகிர்ந்த ரகசியம்!
டெல்லி: உலகின் மிகப் பெரிய விமான நிறுவனங்களில் ஒன்றான எட்டிஹாட் விமானத்தில் பைலட்டாக வேலை செய்யும் ஒருவர் தனக்குக் கிடைக்கும் சலுகைகள் குறித்த விவரங்களைப் பகிர்ந்துள்ளார். அவருக்குக் கிடைக்கும் இந்த சலுகைகளைப் பார்த்தால் நமக்கே ஒரு நொடி தலை சுற்றிவிடும். அவருக்குக் கிடைக்கும் சலுகைகள் என்னென்ன என்பது குறித்து நாம் பார்க்கலாம்.
விமானத்தைப் பார்க்கும்போது நம்மில் பலருக்கும் ஒரு பிரம்மாண்டத்தைப் பார்த்து ரசிக்கும் உணர்வு வரும். அந்த விமானத்தை இயக்கும் பைலட் ஆவது என்பது பலருக்கும் கனவு வேலையாகவே இருக்கும். உலகம் முழுவதும் பயணம் செய்வது, கைநிறைய சம்பளம், மற்றும் சாதாரண வாழ்க்கையிலிருந்து முற்றிலும் மாறுபட்ட ஒரு வாழ்க்கை முறை என இதில் பல சிறப்பம்சங்கள் உள்ளன.
பைலட்
இதற்கிடையே அமீரகத்தின் டாப் விமான நிறுவனமான எட்டிஹாட் ஏர்வேஸில் (Etihad Airways பணிபுரியும் விமான ஒருவர் தனக்கு என்ன சலுகைகள் எல்லாம் கிடைக்கும்.. வேலையில் என்னவெல்லாம் செய்ய வேண்டும் என்பது தொடர்பாக சில முக்கிய கருத்துகளைக் கூறியிருக்கிறார். அந்த நிறுவனத்தில் சீனியர் ஃபர்ஸ்ட் ஆபீசராக பணியாற்றும் இந்தியாவைச் சேர்ந்த நிகிதா தோமர் தனது இன்ஸ்டாகிராம் பக்கத்தில் இது குறித்த தகவல்களை விரிவாகப் பகிர்ந்துள்ளார்.
நிகிதா தோமர் குறிப்பிடும் முதல் மற்றும் மிக முக்கியமான சலுகை வரி இல்லாத சம்பளம். இந்தியாவில் நாம் ஈட்டும் வருமானத்தில் ஒரு பகுதியை வருமான வரியாகச் செலுத்த வேண்டும். ஆனால், ஐக்கிய அரபு அமீரகத்தில் நீங்கள் எவ்வளவு சம்பாதித்தாலும் அதற்கு வரி இல்லை. உங்களுக்கு வரும் ஒவ்வொரு திர்ஹாமும் (Dirham) உங்களுக்கே சொந்தம். இது மிகப் பெரிய பிளஸ் பாயிண்ட்.
சலுகைகள்
விமானிகளுக்கு மட்டுமல்லாமல், அவர்களது குடும்பத்தினர் மற்றும் நண்பர்களுக்கும் எட்டிஹாட் ஏர்வேஸ் சிறப்பான பயணச் சலுகைகளை வழங்குகிறது. பெற்றோர் மற்றும் அன்புக்குரியவர்களை உலகின் எந்தப் பகுதிக்கும், எப்போது வேண்டுமானாலும் பிசினஸ் கிளாஸில் அழைத்துச் செல்ல முடியுமாம். விமானிகள் ஒரு நாட்டிலிருந்து மற்றொரு நாட்டிற்குச் செல்லும்போது, அங்கு ஓய்வெடுப்பதற்காகத் தங்கும் வசதி செய்து தரப்படும். இதனால் நிகிதாவுக்கு டோக்கியோ, பாரிஸ், ஸ்பெயின் மற்றும் நியூயார்க் போன்ற உலகப் புகழ்பெற்ற நகரங்களில் தங்கும் வாய்ப்பு கிடைக்கிறதாம். அங்குள்ள சொகுசு ஹோட்டல்களில் தங்குவதுடன், அந்த நகரங்களைச் சுற்றிப் பார்க்கவும் அவர்களுக்குப் போதிய நேரம் வழங்கப்படுகிறது.
அலவன்ஸ்
அபுதாபியில் தங்குவதற்கான செலவை நிறுவனமே ஏற்றுக் கொள்கிறது. நிறுவனம் வழங்கும் குடியிருப்பில் தங்கிக் கொள்ளலாம் அல்லது அபுதாபியில் சொந்தமாக வீடு எடுத்துத் தங்கலாம். அதற்கான அலவுன்ஸ் தனியாக வழங்கப்படுகிறது. விமானிக்கு மட்டுமல்லாமல், அவரது முழு குடும்பத்திற்கும் முழுமையான மருத்துவக் காப்பீடு வழங்கப்படுகிறது. இது தவிர, விமானிகளின் குழந்தைகளின் கல்விச் செலவிற்கான உதவித்தொகையையும் நிறுவனமே வழங்குகிறது.
எட்டிஹாட் ஏர்வேஸில் 120க்கும் மேற்பட்ட நாடுகளைச் சேர்ந்த ஊழியர்கள் பணிபுரிகின்றனர். ஒவ்வொரு முறை விமானத்தை இயக்கும்போதும், வெவ்வேறு நாடுகளைச் சேர்ந்த சக ஊழியர்களுடன் பழகும் வாய்ப்பு கிடைக்கிறது. இதன் மூலம் புதிய கலாச்சாரங்கள் மற்றும் வாழ்க்கை முறைகளைப் பற்றித் தெரிந்துகொள்ள முடிகிறது என்கிறார் நிகிதா.
தனி அனுபவம்
வேலையைத் தாண்டி, அபுதாபியில் வசிப்பது ஒரு தனி அனுபவம். இது உலகின் பாதுகாப்பான நகரங்களில் ஒன்று. ஆண்டு முழுவதும் சூரிய ஒளி, அழகான கடற்கரைகள் மற்றும் எந்த நாட்டைச் சேர்ந்தவராக இருந்தாலும் அபுதாபி ஒரு சொந்த ஊர் போன்ற உணர்வைத் தரும் என்று அவர் குறிப்பிடுகிறார்.
எட்டிஹாட் ஏர்வேஸின் அதிகாரப்பூர்வ இணையதளத் தகவலின்படி, ஒரு பைலட்டின் சம்பளம் என்பது அனுபவம் மற்றும் விமானத்தின் வகையைப் பொறுத்து சம்பளம் மாறுபடும். ஃபர்ஸ்ட் ஆபீசராக இருப்பவருக்கு ஆண்டுக்கு சுமார் 5,13,732 திர்ஹாம் வரை சம்பாதிக்கலாம். இது இந்திய மதிப்பில் சுமார் ₹1.3 கோடி ஆகும். விமான கேப்டனாக இருப்போருக்கு ஆண்டுக்கு சுமார் 6,74,029 திர்ஹாம் வரை சம்பளம் வழங்கப்படும். இது இந்திய மதிப்பில் சுமார் ₹1.7 கோடி ஆகும்.
Click it and Unblock the Notifications
Sign in with Google