அண்ணன் ஆப்பிளை மறக்க மாட்டார் போலயே.. அதிமுகவினர் நக்கல்.. பாமகவுக்கோ சிக்கல்!

3-வது முறையாக திண்டுக்கல் சீனிவாசன் ஆப்பிள் சின்னம் தொடர்பாக சர்ச்சையை ஏற்படுத்தி உள்ளார்.

Published: Monday, April 1, 2019, 17:10 [IST]

Subscribe to Oneindia Tamil

Recommended Video

கொள்கைகளை பறக்கவிட்டால் இப்படித்தான் உளற நேரிடும்- வீடியோ

திண்டுக்கல்: "அண்ணன் ஆப்பிளை மறக்க மாட்டார் போலயே" என்று அதிமுகவினர் கிண்டலடிக்க.. இத்தனை முறை பல்பு வாங்கியும் எங்க சின்னத்தை ஒழுங்கா சொல்ல மாட்டேங்குறாரே என்று பாமகவினர் எரிச்சலடைய.. 3-வது முறையாக பாமக சின்னத்தை உளறி இருக்கிறார் திண்டுக்கல்லார்!

2 நாளைக்கு முன்னாடிதான் பாமக சின்னம் மாம்பழத்துக்கு பதிலாக ஆப்பிள் சின்னத்துக்கு ஓட்டு கேட்டார் அமைச்சர் திண்டுக்கல் சீனிவாசன்!

இதை வைத்து நெட்டிசன்கள் இன்னமும் ஓட்டிக் கொண்டு இருக்கிறார்கள். இந்த நிலையில் 3-வது முறையாகவும் இதே தவறை செய்திருக்கிறார் அமைச்சர்! திண்டுக்கல் அனுமந்த நகர், மாலைப்பட்டி, தோட்டனூத்து பகுதிகளில் பிரச்சாரம் செய்யும்போது திரும்பவும் அதே ஆப்பிள்தான்!

களங்கமில்லா பேச்சு

பொதுவாக இப்படி மாற்றி பேசுவது திண்டுக்கல் சீனிவாசனுக்கு இயல்பான விஷயம். மனசில் ஒரு கலங்கமுமில்லாமல் அப்படி அப்படியே வெளிப்படையாகவும், மறந்து போயும் பேசிவிடுவார். இதை மற்றவர்களும் பெரிதாக எடுத்து கொள்ளாமல் சிரித்து விட்டுவிடுவார்கள். ஆனால் இப்போது நிலைமை அப்படி இல்லை.

திணறிய பாமக

திண்டுக்கல்லில் இந்த முறை அதிமுகவுக்கு பதிலாக பாமக போட்டியிடுகிறது. செல்வாக்கே இல்லாத இடத்தில் பாமகவுக்கு தொகுதியை ஒதுக்கியது அதிமுக. அதிலும் வேட்பாளர் கிடைக்க அக்கட்சி தலைமை நிறையவே திணறிவிட்டது!

திணறடிக்கிறார்

ஒருவழியாக வேட்பாளராக ஜோதிமுத்து தேர்வாக, அவர் திண்டுக்கல் சீனிவாசன் கையில் சிக்கி கொண்டார். வேட்பாளரை மாற்றி ஓட்டு கேட்பது, சின்னத்தை மாற்றி ஓட்டு கேட்பது என திணறடிக்கிறார் திண்டுக்கல் சீனிவாசன்.

வாடிய முகம்

இதனால் பாமக தரப்பில் எல்லோருமே செம அப்செட்டாக இருக்கிறார்களாம்! அதிலும் அமைச்சர் கூடவே பிரச்சாரத்தின்போது பயணிக்கும் வேட்பாளர் ஜோதிமுத்து நிலைமையோ இன்னும் பரிதாபம். ஒவ்வொரு முறை அமைச்சர் தப்பாக சின்னத்தை சொல்லும்போதும் ஜோதிமுத்து கிறுகிறுத்து போய்விடுகிறாராம்.. முகமும் வாடிப்போகிறதாம்!

ஆக... ஐசக் நியூட்டனுக்கு அடுத்தபடியாக இந்த ஆப்பிள் பழம் ஃபேமஸ் ஆகி கொண்டிருப்பது திண்டுக்கல் சீனிவாசனால்தான் என்றால்.. அது மிகையல்ல!

Published On April 1, 2019