ஹைதராபாத்தில் ₹70,000 கோடி டிசிஎஸ் ஏஐ டேட்டா மையம்.. தமிழ்நாடு ஏன் தவறவிட்டது? டிஆர்பி ராஜா கேள்வி

ஹைதராபாத்: டிசிஎஸ் நிறுவனத்தின் துணை நிறுவனமான 'ஹைப்பர்வால்ட்' ₹70,000 கோடி மதிப்பிலான 1-ஜிகாவாட் (1-GW) ஏஐ தரவு மையத்தை ஹைதராபாத்தில் அமைப்பதற்குத் தெலங்கானாவைத் தேர்ந்தெடுத்துள்ளது. நிலத்தால் சூழப்பட்ட மாநிலமாக இருந்தாலும், தேவையான அளவு தடையில்லா மின்சாரத்தையும், மாற்றுத் தொழில்நுட்பக் குளிரூட்டும் வசதிகளை தருவதாக கூறி கைப்பற்றி உள்ளது தெலுங்கானா..இந்த விவகாரத்தில் திமுக முன்னாள் அமைச்சர் டிஆர்பி ராஜா, முதல்வர் விஜய் தலைமையிலான தவெக அரசை கடுமையாக சாடியுள்ளார்.

திமுக முன்னாள் அமைச்சர் டிஆர்பி ராஜா (முன்னாள் தொழில் துறை அமைச்சர்) வெளியிட்ட எக்ஸ் தள பதிவில் கூறுகையில், 'ஆந்திரப் பிரதேசம் (சிறப்பாக அமைக்கப்பட்ட கடலடி கேபிள் வசதி காரணமாக) கூகுள் ஏஐ தரவு மையத்தை (Google AI Data Centre) வென்றெடுத்தபோது, தமிழ்நாட்டிற்கு வர வேண்டிய முதலீடு "கைநழுவிப் போய்விட்டதாக" சிலர் மாடியின் உச்சியிலிருந்து கூச்சலிட்டனர்.

ஆனால், அதே தரப்பினர் இப்போது விசித்திரமான மௌனம் சாதிக்கிறார்கள். ஏனெனில், கடலடி கேபிள் தரைப்பகுதி எதுவும் இல்லாத, நிலத்தால் சூழப்பட்ட ஒரு மாநிலமான தெலங்கானா, டிசிஎஸ் மற்றும் அதன் கூட்டாளிகள் இணைந்து மேற்கொள்ளவிருக்கும் ₹70,000 கோடி மதிப்பிலான, 1-ஜிகாவாட் (1-GW) ஏஐ தரவு மைய வளாகத் திட்டத்தைக் கைப்பற்றியுள்ளது!

இப்போது நாம் கேட்க வேண்டிய கேள்வி: தமிழ்நாடு இதை ஏன் தவறவிட்டது?

இந்த ஒரே ஒரு முதலீடு, தற்போதைய அரசு தனது முதல் பெரிய முதலீட்டாளர்கள் மாநாட்டில் அறிவித்த 97 ஒப்பந்தங்களின் மொத்த மதிப்பைக் காட்டிலும் (₹67,542 கோடி) சாத்தியளவில் பெரியதாகும் (நிச்சயமாக, இதுவும் திமுக ஆட்சியின் உழைப்பால் கிடைத்த ஒன்றுதான்)!

இத்தகைய பெரிய முதலீட்டிற்குத் தேவையான அனைத்தும் தமிழ்நாட்டில் உள்ளன! கடலடி கேபிள் இணைப்பு, புதுப்பிக்கத்தக்க ஆற்றல் திறன், பொறியியல் திறமை, முதிர்ச்சியடைந்த தரவு மைய கட்டமைப்பு மற்றும் இந்தியாவின் வலுவான மின்னணு உற்பத்தி மையம் என அனைத்து வசதிகளும் இங்கே உள்ளன.

எனவே, இந்த கேள்வி நியாயமாகவே கேட்கப்பட வேண்டும்:

₹70,000 கோடி மதிப்பிலான இவ்வளவு பெரிய முதலீட்டை தமிழ்நாடு எப்படி நழுவவிட்டது?

அன்று மாடியிலிருந்து (கூகுள் ஏஐ) கூச்சலிட்ட அந்த விமர்சகர்கள் எல்லாம் இப்போது எங்கே போனார்கள்? செலக்டிவ்வான விஷயங்களை மட்டும் எடுத்து கோபப்படுபவர்கள் (திமுகவின் ஆட்சி காலத்திற்கு மட்டும்) கைநழுவிப் போன ஒரு சிறந்த முதலீட்டு வாய்ப்பை மறைத்துவிட முடியாது... மறைத்துவிட முடியுமா?

மேலும் ஒன்று, தரவு மையங்கள் அதிக மின்சாரத்தையும் நீரையும் உறிஞ்சக்கூடிய, ஆனால் குறைந்த எண்ணிக்கையிலேயே வேலைவாய்ப்புகளை உருவாக்கக்கூடிய முதலீடுகள் என்ற எனது கருத்தில் நான் இன்னமும் உறுதியாகவே இருக்கிறேன்" இவ்வாறு கூறியிருந்தார்.

English summary

'Hypervault,' a subsidiary of TCS, has selected Telangana to set up a 1-gigawatt (1-GW) AI data center worth ₹70,000 crore. Why did Tamil Nadu miss out on this? TRB Rajaa asks.