திருப்பதி: இஸ்கான் கோயில் அருகே குண்டுவெடித்ததாக பரபரப்பு

By Mayura Akilan

Updated: Wednesday, February 17, 2016, 12:53 [IST]

Subscribe to Oneindia Tamil

திருப்பதி: திருப்பதி மலையடிவாரத்தில் உள்ள ஹரே ராமா ஹரே கிருஷ்ணா கோயில் அருகே இன்று காலை வெடிச்சத்தம் கேட்டதால் கோவிலுக்கு வந்த பக்தர்கள் பரபரப்படைந்தனர். வெடித்தது வெறும் பட்டாசுதான் என்று தெரியவரவே பக்தர்கள் நிம்மதியடைந்தனர்.

திருப்பதி ரயில் நிலையில் இருந்து 15 கிலோமீட்டர் தொலைவில் கபிலத்தீர்த்தம் செல்லும் பாதையில் உள்ளது இஸ்கான் கோவில். ஹரே ராமா ஹரே கிருஷ்ணா இயக்கத்தினாரால் கட்டப்பட்ட இந்த கோயில் கலையம்சம் கொண்டது. இதனால் திருப்பதி ஏழுமலையானை தரிசிக்க வரும் பக்தர்கள் இஸ்கான் கோவிலுக்கு சென்று வருவது வழக்கம்.

இன்று காலையில் கோவில் அருகே திடீரென வெடிச்சத்தம் கேட்டது. அப்போது நாட்டு குண்டு வெடித்ததாக முதலில் தகவல் வெளியானது. இதையடுத்து, போலீசாருக்கு தகவல் அளிக்கப்பட்டது. வெடிகுண்டு நிபுணர்கள் குழுவுடன் விரைந்துவந்த போலீசார் சம்பவ இடத்தில் ஆய்வு செய்தனர்.

அப்போது, திருவிழாக் காலங்களில் பயன்படுத்தும் பட்டாசு வெடித்தது தெரியவந்தது. திடீர் வெடிச்சத்தம் கேட்டதால் கோவிலுக்கு வந்த பக்தர்கள் பீதியடைந்ததாக தெரியவந்துள்ளது. தொடர்ந்து அந்தப் பகுதியில் போலீசார் விசாரணை நடத்தி வருகின்றனர்