காங்கிரஸுடன் மொத்தமாக ஐக்கியமாகும் திரிணாமுல்.. உட்கட்சி பூசலை சமாளிக்க மம்தா அதிரடி? என்ன நடக்கிறது

Updated: Thursday, June 11, 2026, 20:20 [IST]

Subscribe to Oneindia Tamil

டெல்லி: கடந்த சில நாட்களாகவே மம்தா தனது கட்சியைக் காங்கிரஸுடன் இணைக்கப் போவதாகச் சொல்லி செய்திகள் உலா வந்து கொண்டு இருந்தன. அதற்கு டெல்லியில் நடந்த சில முக்கிய சந்திப்புகளே காரணமாக இருந்தது. நாளுக்கு நாள் இந்தத் தகவல்கள் அதிகரித்த நிலையில், இது தொடர்பாகக் காங்கிரஸ் சில முக்கிய விளக்கங்களைக் கொடுத்துள்ளன.

மேற்கு வங்க அரசியலிலும், தேசிய அரசியலிலும் கடந்த சில நாட்களாக ஒரு முக்கியமான கேள்வி உலா வந்து கொண்டு இருந்தது. அதாவது திரிணாமுல் காங்கிரஸ் கட்சியை மம்தா காங்கிரஸ் கட்சியுடன் இணைக்கப் போவதாகத் தகவல் வெளியானது. இரு நாட்களாகவே இதைச் சுற்றித் தான் பல செய்திகள் உலா வந்து கொண்டு இருந்தது.

பின்னணி

சமீபத்தில் டெல்லியில் நடைபெற்ற 'இந்தியா' கூட்டணியின் ஆலோசனைக் கூட்டத்தில் மம்தா பானர்ஜியும், அவரது மருமகன் அபிஷேக் பானர்ஜியும் கலந்து கொண்டனர். அதன் பிறகு உடனடியாக மேற்கு வங்கத்திற்குத் திரும்பாமல்.. அவர்கள் காங்கிரஸ் மூத்த தலைவர்கள் சோனியா காந்தி மற்றும் ராகுல் காந்தி ஆகியோரைத் தனித்தனியாகச் சந்தித்துப் பேசினர். வழக்கமாக மம்தா பானர்ஜி இத்தகைய கூட்டங்களில் கலந்துகொள்வதைத் தவிர்த்து வந்தார். ஆனால், இந்த முறை அவர் நேரில் வந்து சந்தித்ததுதான், "ஒருவேளை கட்சிகள் இணையப் போகிறதோ?" என்ற யூகத்தை அரசியல் வட்டாரத்தில் கிளப்பியது.

இதற்கும் காரணம் இல்லாமல் இல்லை. மம்தா மிகவும் இக்கட்டான சூழலில் இருக்கிறார். மேற்கு வங்கத்தில் சமீபத்தில் நடந்த சட்டமன்றத் தேர்தலில் திரிணாமுல் காங்கிரஸ் கட்சி ஆட்சியை இழந்தது. மொத்தம் உள்ள 294 இடங்களில் அந்தக் கட்சியால் 80 இடங்களை மட்டுமே பிடிக்க முடிந்தது. தேர்தல் தோல்விக்குப் பிறகு, அந்தக் கட்சிக்குள் பிளவு ஏற்பட்டுள்ளதாகக் கூறப்படுகிறது. பெரும்பாலான திரிணாமுல் காங்கிரஸின் எம்பிக்களும் எம்எல்ஏக்களும் தனித்துச் செயல்பட முடிவு செய்துள்ளதாகவும் கூறப்படுகிறது. இதனால் சொந்தக் கட்சியில் இருந்தே மம்தா வெளியேற்றப்படும் சூழலுக்குத் தள்ளப்பட்டுள்ளார்.

காங்கிரஸ் மறுப்பு

இதன் காரணமாகவே மம்தா தனது கட்சியைக் காங்கிரஸுடன் இணைக்கப் போவதாகத் தகவல்கள் பரவின. இருப்பினும், இன்று அதைக் காங்கிரஸ் திட்டவட்டமாக மறுத்துள்ளது. திரிணாமுல் காங்கிரஸ் தங்களுடன் இணையப் போவதாக வெளியாகும் செய்திகள் அனைத்தும் ஆதாரமற்ற வதந்திகள் என்று காங்கிரஸ் திட்டவட்டமாகத் தெரிவித்துள்ளது.

இது குறித்துப் பேசிய காங்கிரஸ் பொதுச் செயலாளர் கே.சி. வேணுகோபால், "சமீபத்தில் மம்தா பானர்ஜி மற்றும் அபிஷேக் பானர்ஜி ஆகியோருடன் நடந்த சந்திப்பில், தேசிய அளவிலான பிரச்சனைகளை எப்படி எதிர்கொள்வது என்பது பற்றி மட்டுமே ஆலோசிக்கப்பட்டது. கட்சிகளை இணைப்பது குறித்துப் பேசப்படவில்லை" என்று விளக்கமளித்துள்ளார்.

திரிணாமுல் சொல்வது என்ன

கட்சி இணைப்பு குறித்து திரிணாமுல் காங்கிரஸ் இதுவரை அதிகாரப்பூர்வமாக எதுவும் சொல்லவில்லை. இருப்பினும், மம்தாவுக்கு நெருக்கமான சௌகதா ராய் போன்ற தலைவர்கள், "காங்கிரஸுடன் இணைந்து செயல்படுவது அவசியம், ஆனால் அது கூட்டணியா அல்லது இணைப்பா என்பதைப் பொறுத்திருந்துதான் பார்க்க வேண்டும்" என்று பொடி வைத்துப் பேசியுள்ளனர்.

அதே சமயம், மம்தாவுக்கு எதிராகக் கலகம் செய்யும் ரிதப்ரதா பானர்ஜியும் இந்த விவகாரத்தில் கருத்து கூறியிருக்கிறார். திரிணாமுல் காங்கிரஸின் 80 எம்.எல்.ஏ-க்களில் 64 பேரின் ஆதரவு தனக்கு இருப்பதாகக் கூறும் ரிதப்ரதா பானர்ஜி, "நாங்கள் காங்கிரஸுடன் இணையப் போவதில்லை. எம்.பி-க்களும் இணைய மாட்டார்கள்" என்று கூறியிருக்கிறார். இதனால் இந்த இணைப்பு என்பது வதந்தியாகவே முடிந்துவிடுமா அல்லது உண்மையாகுமா என்பதை நாம் பொறுத்திருந்தே பார்க்க வேண்டும்.

பின்னணி

மம்தா பானர்ஜி அரசியலில் வளர்ந்ததே காங்கிரஸில்தான். சுமார் 20 ஆண்டுகளுக்கும் மேலாக அவர் காங்கிரஸில் இருந்தார். இருப்பினும், 1997ல் மாநிலத் தலைமை மற்றும் மேலிடத்துடன் ஏற்பட்ட கருத்து வேறுபாடு காரணமாகக் காங்கிரஸிலிருந்து விலகினார். 1998 ஜனவரி 1ம் தேதி அவர் அகில இந்திய திரிணாமுல் காங்கிரஸ் கட்சியைத் தொடங்கினார். 2011ல் மேற்கு வங்கத்தில் 34 ஆண்டுக்கால இடதுசாரி ஆட்சியை வீழ்த்தி முதலமைச்சரானார்.

தற்போதைக்கு காங்கிரஸ் மற்றும் திரிணாமுல் காங்கிரஸ் ஆகிய இரு தரப்புமே இணைப்புச் செய்தியை மறுத்துள்ளன. இருப்பினும், மேற்கு வங்கத்தில் ஏற்பட்டுள்ள தேர்தல் பின்னடைவு மற்றும் உட்கட்சிப் பூசல்களிலிருந்து மீண்டு வர, மம்தா பானர்ஜி காங்கிரஸுடன் இணைந்து பயணித்தாக வேண்டும். அது முழுமையான இணைப்பாக இருக்குமா அல்லது நீண்ட காலக் கூட்டணியாக இருக்குமா என்பதை நாம் பொறுத்திருந்தே பார்க்க வேண்டும்.