Breaking News Live: காவிரி: உச்சநீதிமன்றத்தில் வரைவு அறிக்கையை தாக்கல் செய்தது மத்திய அரசு!

உச்சநீதிமன்றத்தில் காவிரி மேலாண்மை வாரிய வழக்கு விசாரணை இன்று நடைபெறுகிறது.

டெல்லி: காவிரி நடுவர் மன்ற இறுதித் தீர்ப்பை செயல்படுத்துவதற்கான வரைவு அறிக்கையை உச்சநீதிமன்றத்தில் மத்திய அரசு இன்று தாக்கல் செய்தது. இன்றைய விசாரணையின் போது காவிரி மேலாண்மை வாரியத்தை அமைக்க மத்திய அரசு தயாராக இருப்பதாக நேரில் ஆஜரான மத்திய நீர்வளத்துறை செயலாளர் யு,பி.சிங் உறுதி அளித்தார்.

காவிரி நடுவர் மன்ற இறுதித் தீர்ப்பை செயல்படுத்துவதற்கான மேலாண்மை வாரியத்தை அமைக்க வேண்டும் என்பது உச்சநீதிமன்றம் உத்தரவு. இதற்கான வரைவு திட்ட அறிக்கையை மத்திய அரசு தாக்கல் செய்ய வேண்டும் என உச்சநீதிமன்றம் கெடு விதித்திருந்தது.

பிப்ரவரி 16-ந் தேதியன்று 6 வார கால அவகாசம் கொடுத்தது உச்சநீதிமன்றம். ஆனாலும் மத்திய அரசு வரைவு அறிக்கையைத் தாக்கல் செய்யவில்லை.

இதன் பின்னர் மே 3-ந் தேதியன்று நடந்த விசாரணையில் இன்று வரைவு அறிக்கையை தாக்கல் செய்ய உச்சநீதிமன்றம் உத்தரவிட்டிருந்தது. இதையடுத்து உச்சநீதிமன்ற உத்தரவுப்படி மத்திய அரசின் நீர்வளத்துறை செயலர் யு.பி. சிங் இன்று நேரில் ஆஜராகி வரைவு திட்டத்தைத் தாக்கல் செய்தார்.

English summary

The Centre will be presenting a draft Cauvery water sharing scheme directly to the Supreme Court today