மோடியின் குஜராத்தில் பாஜகவுக்கு 49% ஆதரவு, காங்கிரஸுக்கும் 41% ஆதரவு!

டெல்லி: குஜராத்தில் மூன்றாவது முறையாக ஆட்சியில் இருக்கும் முதல்வர் நரேந்திர மோடி இப்போது பாஜக பிரதமர் வேட்பாளராக அறிவிக்கப்பட்டு, அந்தக் கட்சியும் தேசிய அளவில் அதிக இடங்களில் வெல்லும் என்று கருத்துக் கணிப்புகள் கூறி வரும் நிலையில், குஜராத்தில் பாஜக மற்றும் காங்கிரஸ் இடையிலான வாக்கு வித்தியாசம் குறைவாகவே உள்ளது.

பாஜகவே வெல்லும்...

குஜராத்தில் வரும் நாடாளுமன்றத் தேர்தலில் மொத்தமுள்ள 28 இடங்களில் பாஜக 22 இடங்களில் வெல்லும் என்று என்டிடிவி கருத்துக் கணிப்பு தெரிவித்துள்ளது. இது கடந்த தேர்தலைவிட 7 இடங்கள் அதிகமாகும்.

காங்கிரசுக்கு பெரும் தோல்வி...

கடந்த தேர்தலில் 11 இடங்களில் வென்ற காங்கிரஸ் இந்தமுறை வெறும் 4 இடங்களில் மட்டுமே வெல்லும் என்றும் கருத்துக் கணிப்பு தெரிவித்துள்ளது.

வாக்குகள் வித்தியாசம் அதிகமில்லை:

வரும் தேர்தலில் பாஜக மொத்தம் 49 சதவீத வாக்குகளைப் பெறும் என்றும் இது கடந்த தேர்தலைவிட 3 சதவீதம் அதிகம் என்றும் என்டிடிவி தெரிவிக்கிறது.

அதே நேரத்தில் காங்கிரஸ் கட்சியும் 41 சதவீத வாக்குகளைப் பெறும் என்கிறது கருத்துக் கணிப்பு.

ஆச்சரியமே...

இது கடந்த தேர்தலில் காங்கிரஸ் பெற்ற வாக்குகளை விட 3 சதவீதம் குறைவு தான் என்றாலும், குஜராத்தில் காங்கிரஸ் வழி நடத்த ஒரு உருப்படியான தலைவர் கூட இல்லாத நிலையில் 41 சதவீத வாக்குகளை காங்கிரஸ் பெறுவது ஆச்சரியமாகப் பார்க்கப்படுகிறது.

அதுவும் குஜராத்தைத் தான் முன் மாதிரியாகக் காட்டி தேசிய அளவில் மோடியை முன் நிறுத்தி வாக்கு கேட்டு வருகிறது பாஜக. இந்த நிலையிலும் காங்கிரஸ் 41 சதவீத வாக்குகளைப் பெறுவது குறிப்பிடத்தக்கதாகும்.

ஐபிஎன் கருத்துக் கணிப்பு..

ஆனால், சிஎன்என்-ஐபிஎன் நடத்திய கருத்துக் கணிப்பில் பாஜகவுக்கு 55 சதவீத ஆதரவும் காங்கிரசுக்கு வெறும் 31 சதவீதமும் மட்டுமே ஆதரவு உள்ளதாகத் தெரிவிக்கப்பட்டுள்ளது. இதன்மூலம் குஜராத்தின் அனைத்துத் தொகுதிகளையும் மோடி வெல்வார் என்றும் இந்தக் கருத்துக் கணிப்பு தெரிவிக்கிறது.

எது சரி, எது தவறு என்பது மே 16ம் தேதி தான் தெரியும்...

English summary

NDTV opinion poll says in Gujarat BJP will get 49% votes and congress 41% votes. But, CNN-IBN opinion poll says BJP will get 55% and congress will get only 31% votes