இனி ரயில்களின் விவரம் கூகுள் மேப்பில்- இந்திய ரயில்வே அறிவிப்பு

மும்பை: இந்திய ரயில்வே சென்னை உள்ளிட்ட எட்டு இந்திய நகரங்களுக்கான ரயில்வே கால அட்டவணையும், பேருந்து மற்றும் மெட்ரோ ரயில் பாதையையும் கூகுள் மேப்ஸில் இணைத்துள்ளதாக அறிவித்துள்ளது.

புவியியற் தகவற் தொழில் நுட்ப மென்பொருளான கூகுள் மேப்ஸ் முக்கிய இடங்களுக்கு செல்லும் வழி , பயணங்களைத் திட்டமிடல் போன்றவற்றிற்கு உதவுகின்றது.

தற்போது இந்தியாவின் எட்டு முக்கிய நகரங்களின் ரயில் சேவை குறித்த விவரங்களையும் பேருந்து பாதை குறித்த விவரங்களையும் இணைத்துள்ளது.

இந்த மேம்படுத்தப்பட்ட இந்தியா தொடர்புடைய தகவல்களை மக்கள் தங்கள் மொபைல் போனில் அல்லது கணிணியில் இருந்து கூகுள் மேப்ஸ் டிரான்சிட் மூலம் தெரிந்து கொள்ளலாம்.

இதை குறித்து கூகுள் மேப்ஸ் இயக்குனர் சுரேன் ருஹேலா கூறுகையில் "கூகுல் டிரான்ஸிட் என்பது உலகம் முழுவதும் உள்ள கோடிக்கணக்கான கூகுள் மேப்ஸ் பயனர்களுக்கு விரிவான மற்றும் துள்ளியமான பயனளிக்கும் தகவல்களை அளிக்கும் முயற்சி ஆகும்.

இந்தியாவில் ரயில் மற்றும் பேருந்து சேவையை சார்ந்துள்ள மக்களுக்கு தங்கள் இலக்கை அடைய கூகுல் டிரான்ஸிட் பெரிதும் உதவியாக இருக்கும் என நம்புகின்றோம்" என்றார்.

தற்போது கூகுல் டிரான்ஸிட்டில் சுமார் 12,000 இந்திய ரயில்களின் கால அட்டவணைகள் பதிவேற்றம் செய்யப்பட்டுள்ளது. மற்றும் அகமதாபாத், பெங்களூரு, சென்னை, ஹைதராபாத், கொல்கத்தா, மும்பை, டெல்லி உள்ளிட்ட நகரங்களின் அரசு போக்குவரத்து விவரங்களும் இணைக்கப்பட்டுள்ளது.

கூகுள் டிரான்ஸிட் பயன்படுத்தும் முறையை குறித்து கூகுள் நிறுவனம் கூறுகையில், "மக்கள் தாங்கள் செல்ல வேண்டிய இலக்கை கூகுள் மேப்ஸில் உள்ளிட்ட பின்னர் கெட் டைரக்சன்ஸ் என்னும் பட்டனை அழுத்தவும்,பின்னர் Public Transit என்னும் பட்டனை தேர்வு செய்து ரயில் மற்றும் பேருந்து குறித்த தகவல்களை தெரிந்து கொள்ளலாம்" என்று தெரிவித்துள்ளது.

English summary

Indian Railways schedules will now be available on Google Transit, a feature on Google Maps.