திடீரென நடனமாடிய டொனால்ட் டிரம்ப்.. அரசு கொடுத்த வரவேற்பால் உற்சாகம்.. மலைத்துபோன மலேசியா

கோலாலம்பூர்: 2025 ம் ஆண்டுக்கான ஆசியான் உச்சி மாநாடு மலேசியாவில் இன்று தொடங்கி நடந்து வருகிறது. இந்த மாநாட்டில் அமெரிக்க அதிபர் டொனால்ட் டிரம்ப் பங்கேற்றுள்ளார். அவருக்கு சிவப்பு கம்பளத்துடன் பாரம்பரிய முறையில் வரவேற்பு கொடுக்கப்பட்டது. அதனை பார்த்து உற்சாகமடைந்த டொனால்ட் டிரம்ப் நடனடிமாடியது அனைவரையும் கவர்ந்தது.

உலக நாடுகள் ஒவ்வொன்றும் பிற நாடுகளுடன் சேர்ந்து கூட்டமைப்புகளை உருவாக்கி உள்ளது. அப்படி ஒன்று தான் தென்கிழக்கு ஆசிய நாடுகளின் கூட்டமைப்பு. ஆங்கிலத்தில் இதனை ASEAN என்று அழைப்பார்கள். தென்கிழக்கு ஆசிய நாடுகளின் பொருளாதாரம், அரசியல், பாதுகாப்பு உள்ளிட்டவற்றை பாதுகாக்க வேண்டும் என்ற அடிப்படையில் இந்த கூட்டமைப்பு உருவாக்கப்பட்டுள்ளது.

இந்த கூட்டமைப்பில் மொத்தம் 10 நாடுகள் உள்ளன. புருனே தாருஸ்ஸலாம், பர்மா, கம்போடியா, இந்தோனேசியா, லாவோஸ், மலேசியா, பிலிப்பைன்ஸ், சிங்கப்பூர், தாய்லாந்து மற்றும் வியட்நாம் உள்ளிட்ட நாடுகள் உறுப்பு நாடுகளாக உள்ளன. இந்த ஆசியான் கூட்டமைப்பின் உச்சி மாநாடு ஒவ்வொரு 2 ஆண்டுகளுக்கும் ஒருமுறை நடக்கும்.

ஒவ்வொரு முறையும் உச்சி மாநாட்டுக்கு ஒவ்வொரு நாடுகள் தலைமை தாங்கும். அந்த வகையில் இந்த ஆண்டுக்கான உச்சி மாநாடு மலேசியாவில் தொடங்கி நடந்து உள்ளது. இதில் உறுப்பு நாடுகளை தவிர மாநாட்டை தலைமையேற்று நடத்தும் நாட்டு தலைவர்களின் அழைப்பின்பேரில் அதன் நட்பு நாடுகளின் தலைவர்கள் பங்கேற்பது வழக்கம்.

இந்த மாநாட்டில் பிரதமர் மோடிக்கு அழைப்பு விடுக்கப்பட்டது. ஆனால் அவர் செல்லவில்லை. காணொலி காட்சி மூலமாக மாநாட்டில் பங்கேற்றுள்ளார். அதேவேளையில் அமெரிக்க அதிபர் டொனால்ட் டிரம்ப் நேரடியாக மாநாட்டில் பங்கேற்றுள்ளார். முன்னதாக அவர் ‛ஏர் போர்ஸ் ஒன்' விமானத்தில் அமெரிக்காவில் இருந்து மலேசியா வந்தார். கோலாலம்பூர் விமான நிலையத்தில் மலேசியா அரசு சார்பில் சிவப்பு கம்பள வரவேற்பு வழங்கப்பட்டது. மலேசியா பிரதமர் அன்வர் இப்ராஹிம் மற்றும் அமைச்சர்கள் டொனால்ட் டிரம்பை வரவேற்றனர்.

மேலும் பாரம்பரிய முறையில் வாத்தியங்கள், இசை நிகழ்ச்சிகளும் ஏற்பாடு செய்யப்பட்டு இருந்தன. நடன கலைஞர்கள் நடனமாடி டிரம்பை வரவேற்றனர். இதனை பார்த்து உற்சாகமான டொனால்ட் டிரம்ப் விமானத்தில் இருந்து இறங்கி நேரடியாக நடன கலைஞர்கள் அருகே சென்று நடனமாடினார். அவருடன் சேர்ந்து மலேசிய பிரதமர் அன்வர் இப்ராஹிமும் நடனமாடினார். இந்த வீடியோ தற்போது இணையதளங்களில் வெளியாகி அனைவரையும் கவர்ந்துள்ளார்.

டொனால்ட் டிரம்ப் பொது வெளியில் இப்படி நடனமாடுவது இது முதல் முறையல்ல. அமெரிக்க அதிபர் தேர்தல் பிரசாரம் மற்றும் தேர்தலில் வெற்றி பெற்ற பிறகும் கூட டொனால்ட் டிரம்ப் நடனமாடி தனது மகிழ்ச்சியை வெளிப்படுத்தி இருந்தார். அதேபோல் மலேசியா வந்த அதிபர் டிரம்புக்கு அந்த நாட்டின் ராணுவம் சார்பில் அணிவகுப்பு மரியாதை வழங்கப்பட்டது. மலேசியாவின் போர் விமானங்கள் டிரம்பின் ‛ஏர் போர்ஸ் ஒன்' விமானத்தின் இருபுறமும் சூழ்ந்து பறந்து வந்து அமெரிக்கா, மலேசியாவின் உறவை காட்டும் வகையில் இருநாடுகளின் கொடியையும் வானில் பறக்க விட்டது அனைவரையும் கவர்ந்தது.

இந்த மாநாட்டில் அதிபர் டொனால்ட் டிரம்ப் பல்வேறு நாடுகளின் தலைவர்களை சந்தித்து பேச உள்ளார். அதேபோல் மலேசியா பிரதமர் உடனும் இருநாடுகளின் உறவு பற்றி அவர் விவாதிக்க உள்ளார். மலேசியா சுற்றுப்பயணத்தை முடிக்கும் டொனால்ட் டிரம்ப் அங்கிருந்து நேரடியாக ஜப்பான் செல்கிறார்.

ஜப்பான் புதிய பிரதமர் சானே தகைசியை அவர் சந்தித்து பேச உள்ளார். பிறகு தென்கொரியா சென்று அங்கு சீன அதிபர் ஜி ஜின்பிங்கை சந்தித்து இருநாடுகள் இடையேயான வர்த்தகம் பற்றி விவாதிக்க உள்ளார். அதேபோல் வடகொரியா அதிபர் கிம் ஜாங் உன்-னை கூட அவர் சந்தித்து பேசலாம் என்று கூறப்படுகிறது. தென்கொரியாவும், அமெரிக்காவும் எதிரி நாடாக உள்ள நிலையில் டிரம்பின் இந்த சுற்றுப்பயணம் பெரும் எதிர்பார்ப்பை ஏற்படுத்தி உள்ளது.

English summary

US President Donald Trump surprised everyone by dancing on the red carpet after landing in Malaysia for the ASEAN summit.