11 ஆண்டுகளுக்கு பிறகு ஒரே மேடையில் தம்பிதுரை -கே.பி.முனுசாமி! எல்லாம் எடப்பாடி செய்த மாயமாம்!
கிருஷ்ணகிரி: 11 ஆண்டுகளுக்கு பிறகு அதிமுக முக்கியப் பிரமுகர்களான தம்பிதுரையும், கே.பி.முனுசாமியும் ஒரே மேடையில் ஏறி கட்சியினரை வியப்பில் ஆழ்த்தியுள்ளார்கள்.
தம்பிதுரையும், கே.பி.முனுசாமியும் ஆரம்பக்காலம் முதலே எதிரும் புதிருமாக அதிமுகவில் அரசியல் செய்து வந்தவர்கள் என்பது குறிப்பிடத்தக்கது.
தம்பிதுரை, கே.பி.முனுசாமி திடீர் ஒற்றுமையின் பின்னணியில் எடப்பாடி பழனிசாமி இருப்பதாக தெரிவிக்கப்படுகிறது.
அதிமுக போராட்டம்
சொத்து வரி உயர்வு, மின் கட்டணம் உயர்வு, பால் விலை உயர்வு, உள்ளிட்ட பல்வேறு விவகாரங்களை கண்டித்து தமிழகம் முழுவதும் அதிமுக சார்பில் ஆர்ப்பாட்டம் நடைபெற்று வருகிறது. அந்த வகையில் கிருஷ்ணகிரி மாவட்டம் ஒசூரில் நேற்று நடைபெற்ற அதிமுக ஆர்ப்பாட்டத்தில் அக்கட்சியினர் ஆச்சரியப்படும் நிகழ்வு ஒன்று நடந்தது. கடந்த 11 ஆண்டுகளுக்கு பிறகு கே.பி.முனுசாமியும், தம்பிதுரை எம்.பி.யும் ஒரே மேடையில் ஏறி கட்சியினரை வியக்க வைத்தது தான் அது.
நேர் எதிர் துருவங்கள்
கிருஷ்ணகிரி மாவட்டத்தில் தம்பிதுரையும், கே.பி.முனுசாமியும் நேர் எதிர் துருவங்களக நின்று அரசியல் செய்து வருபவர்கள். ஜெயலலிதா காலத்திலேயே இவர்கள் இருவருக்கும் ஒத்துப் போகாது என்பதால் தான் தம்பிதுரைக்கு கரூரில் சீட் கொடுத்து அங்கு அனுப்பி வைத்தார் ஜெயலலிதா. கிருஷ்ணகிரி மாவட்ட அதிமுகவில் இரண்டு கோஷ்டிகளாக பிரிந்து செயல்பட்ட இவர்கள் இப்போது இணைந்து செயலாற்றத் தொடங்கினாலும் அவர்களது ஆதரவாளர்களின் மனம் இன்னும் ஒட்டவில்லை என்பது கவனிக்கத்தக்கது.
பின்னணியில் எடப்பாடி
அதிமுக மூத்த தலைவர்களான தம்பிதுரையும், கே.பி.முனுசாமியும் இணைந்ததற்கு காரணம் எடப்படி பழனிசாமி எனத் தெரிவிக்கப்படுகிறது. தம்பிதுரையை பொறுத்தவரை பெரும்பாலான நாட்கள் சென்னையிலும், டெல்லியிலுமே இருந்து வருகிறார். அவரால் முன்பை போல் மாவட்ட அரசியலில் ஆக்டிவக இயங்க முடியவில்லை. இதனிடையே கே.பி.முனுசாமி வழக்கம் போல் மாவட்ட அரசியலில் கோலோச்சி வருகிறார்.
மாறி மாறி புகழாரம்
நேற்றைய தினம் நடைபெற்ற அதிமுக ஆர்ப்பாட்டத்தில் கே.பி.முனுசாமியை தம்பிதுரை புகழ்ந்து தள்ளியதை பார்த்த அதிமுகவினர், மனுஷன் எப்படி மாறிட்டாரு என கமெண்ட்கள் அடித்தனர். இதனிடையே கே.பி.முனுசாமியும் தம்பிதுரையை பதிலுக்கு புகழ்ந்து பேசினார். 11 ஆண்டுகளாக கீரியும், பாம்புமாக இருந்தவர்கள் ஒரு வழியாக ஒன்று சேர்ந்துவிட்டார்கள்.
Click it and Unblock the Notifications
Sign in with Google