உ.பி. சட்டசபை தேர்தல்: முதல்வர் யோகி அயோத்தி தொகுதியில் போட்டி?.. பாஜகவின் மாஸ்டர் பிளான்

Updated: Thursday, January 13, 2022, 9:35 [IST]

Subscribe to Oneindia Tamil

லக்னோ: உத்தரபிரதேசத்தில் நடைபெற உள்ள சட்டசபை தேர்தலில் அந்த மாநில முதல்வர் யோகி ஆதித்யநாத் அயோத்தி தொகுதியில் இருந்து போட்டியிடலாம் என்று பாஜக பரிசீலித்து வருவதாக கூறப்படுகிறது.

இந்தியாவின் மிகப்பெரிய மாநிலமான உத்தர பிரதேசத்தில் முதல்வர் யோகி ஆதித்யநாத் தலைமையில் பா.ஜ.க ஆட்சி நடந்து வருகிறது. இந்த மாநிலத்தில் அடுத்த மாதம் சட்டசபை தேர்தல் நடைபெற உள்ளது.

உத்தரபிரதேசத்தில் தேர்தல்

அங்கு பிப்ரவரி 10-ம் தேதி முதல் 7 கட்டங்களாக தேர்தல் நடைபெறவுள்ளன என்று இந்திய தேர்தல் ஆணையம் ஏற்கனவே அறிவித்தது. இதனால் அங்கு அரசியல் களம் சூடுப்பிடித்துள்ளது. மீண்டும் ஆட்சியை கைப்பற்ற என்று பா.ஜ.க மிக தீவிரமாக இருக்கிறது. எதிர்க்கட்சியான அகிலேஷ் யாதவின் சமாஜ்வாதி மீண்டும் ஆட்சிக்கு வர துடிக்கிறது. காங்கிரசும் உ.பி.யில் இந்த முறையாவது வெற்றி பெற வேண்டும் என்று நம்பிக்கையுடன் காத்திருக்கிறது.

அயோத்தியில் போட்டி?

சட்டசபை தேர்தலுக்கான வேட்பாளர்களை இறுதி செய்ய பாஜக தீவிரமான பணியில் ஈடுபட்டு வருகிறது. பாஜகவின் மூத்த தலைவர்கள் இதற்கான ஆலோசனையில் ஈடுபட்டு வருகின்றனர். இந்த நிலையில் முதல்வர் யோகி ஆதித்யநாத்தை அயோத்தி தொகுதியில் போட்டியிட செய்ய மூத்த தலைவர்கள் பரிசீலனை செய்ததாக தெரிகிறது. அயோத்தி தொகுதியில் யோகி ஆதித்யநாத் நிறுத்தப்படலாம் என கட்சிக்குள் விவாதிக்கப்பட்டதாக கட்சிவட்டாரங்கள் கூறுகின்றன.

இந்துக்கள் வாக்குகள்

அயோத்தியில் நின்றால் இந்துக்கள் வாக்குகளை எளிதில் அறுவடை செய்யலாம் என்பதால் கட்சியின் முக்கிய இந்துத்துவ முகமான ஆதித்யநாத்தை அங்கு போட்டியிட விரும்புவதாக சொல்லப்படுகிறது.
ஆனால் கட்சியின் மேலிடம்தான் யார்? யார்? எங்கு போட்டியிடலாம்? என்று இறுதி முடிவு செய்யும் என்றும் கட்சி வட்டாரங்கள் தெரிவிக்கின்றன. ''கட்சியின் உயர்மட்டத் தலைவர்கள் எந்த தொகுதியில் போட்டியிட சொன்னாலும் நான் போட்டியிடுவேன். மீண்டும் ஆட்சிக்கு வருவதே நமது முழுமையான இலக்கு '' என்று யோகி ஆதித்யநாத் சமீபத்தில் கூறி இருந்தார்.

விரைவில் இறுதி முடிவு

பிப்ரவரி 10 மற்றும் 14 ஆகிய தேதிகளில் உத்தரபிரதேசத்தில் முதல் இரண்டு கட்ட தேர்தல் நடைபெற உள்ள நிலையில் இதில் போட்டியிடும் இறுதி செய்ய, பிரதமர் நரேந்திர மோடி உள்ளிட்ட பாஜகவின் மத்திய தேர்தல் குழு விரைவில் கூட உள்ளது. அப்போது யோகி ஆதித்யநாத் போட்டியிடும் தொகுதி இறுதி செய்து அறிவிக்கப்படும் என்றும் கூறப்படுகிறது.