இந்தியாவை தலிபான்மயமாக்க போறீங்களா?எல்லாம் ஆப்கானில் வெச்சுக்கோங்க...ஓவைசி மீது யோகி பொளேர் அட்டாக்

Published: Thursday, February 17, 2022, 13:03 [IST]

Subscribe to Oneindia Tamil

லக்னோ: இந்தியாவை தலிபான் மயமாக்கும் முயற்சிகளை மேற்கொள்ள கூடாது என்று மஜ்லிஸ் கட்சியின் தலைவர் ஓவைசியை உ.பி. முதல்வர் யோகி ஆதித்யநாத் கடுமையாக சாடியுள்ளார்.

ஹிஜாப் அணிந்த பெண் ஒருவர் இந்தியாவின் பிரதமராக பதவி வகிப்பார் என மஜ்லிஸ் கட்சியின் தலைவரும் லோக்சபா எம்.பி.யுமான ஓவைசி பேசியது மிகப் பெரும் சர்ச்சையாக வெடித்துள்ளது. கர்நாடகாவில் முஸ்லிம் பெண்கள் ஹிஜாப் அணிய தடை விதிக்கப்பட்ட விவகாரம் நாடு முழுவதும் பதற்றத்தை ஏற்படுத்தியது.

ஹிஜாப் தொடர்பாக பல்வேறு தரப்பினரும் தொடர்ந்து கருத்துகளையும் போராட்டங்களையும் நடத்தி வருகின்றனர். இந்த நிலையில் ஓவைசி தெரிவித்த கருத்து விவாதப் பொருளாகி உள்ளது.

இது தொடர்பாக உ.பி. முதல்வர் யோகி ஆதித்யநாத் கூறியதாவது: இந்தியாவை தலிபான் மயமாக்க விரும்புகிறாரா ஓவைசி? இதுபோல் பேசி விவாதங்களை நடத்துகிற வேலைகளை எல்லாம் ஆப்கானிஸ்தானில் வைத்து கொள்ளட்டும். இத்தகைய நபர்கள்தான் நாட்டின் பெண்களின் முன்னேற்றங்களுக்கு தடையாக உள்ளனர்.

இந்தியாவில் ஒவ்வொரு நபரும் தன் கருத்துகளைத் தெரிவிக்க உரிமை உண்டு. ஆனால் அதற்கும் ஒரு எல்லை உண்டு. அதேநேரத்தில் டிரஸ்கோட் என்பதை எல்லாம் நாங்கள் அமல்படுத்த மாட்டோம். இருந்தபோதும் ஒவ்வொரு அமைப்பும் சீருடையை பின்பற்ற வேண்டியது கட்டாயம். இவ்வாறு யோகி ஆதித்யநாத் கூறினார்.

Published On February 17, 2022