7 மணி நேர அனுமதி.. 6 நாளில் அசாம் டூ மதுரை! கோவில் யானை விற்பனையில் பாஜக - தவெக அரசு முறைகேடு?

Updated: Tuesday, November 3, 2026, 10:38 [IST]

Subscribe to Oneindia Tamil

மதுரை: அசாமில் இருந்து தமிழகத்தில் உள்ள முக்கிய கோயில்களுக்கு 5 இளம் யானைகள் கொண்டுவரப்பட்ட விவகாரம் தற்போது நாடு முழுவதும் பெரும் புயலைக் கிளப்பியுள்ளது. மதுரை மீனாட்சி அம்மன் கோயில், திருவண்ணாமலை அண்ணாமலையார் கோயில், காஞ்சி காமகோடி பீடம் மற்றும் வைத்தீஸ்வரன் கோயில் ஆகிய இடங்களுக்கு இந்த யானைகள் தானமாக வழங்கப்பட்டுள்ளதாகக் கூறப்படுகிறது.

ஆனால், இந்த யானைகள் எங்கிருந்து வந்தன, அரசு அதிகாரிகள் எப்படி மின்னல் வேகத்தில் ஒப்புதல் தந்தார்கள், காட்டில் வாழும் யானைகள் முறைகேடாகப் பிடிக்கப்பட்டு பரிசாக மாற்றப்பட்டனவா என்ற அடுக்கடுக்கான சந்தேகங்கள் எழுந்துள்ளன.

மின்னல் வேகத்தில் நடந்த அரசு பணிகள்

இது தொடர்பாக நியூஸ் மினிட் ஊடகம் வெளியிட்டுள்ள செய்தியில், துர்கா என்ற 5 வயது பெண் யானை மதுரை மீனாட்சி அம்மன் கோயிலுக்குக் கொண்டுவரப்பட்டது. பொதுவாக அரசு அலுவலகங்களில் வனவிலங்கு அனுமதி பெறப் பல மாதங்கள் ஆகும். ஆனால், தமிழகத்தில் துர்காவுக்கான அனுமதி வெறும் 7.5 மணி நேரத்தில் வழங்கப்பட்டுள்ளது.

செப்டம்பர் 4-ஆம் தேதி மதியம் 1:36 மணிக்கு வனத்துறை உயர் அதிகாரி உத்தரவிட, அன்றைய தினமே மாலை 7 மணிக்கு மதுரை கோயில் ஆய்வு செய்யப்பட்டு அறிக்கை தரப்படுகிறது. இரவு 8:58 மணிக்கே துர்காவை அசாமில் இருந்து கொண்டுவர ஒப்புதல் முத்திரையும் விழுகிறது. இதே வேகத்தில் அசாம் அரசும் உடனடியாக மருத்துவச் சான்றிதழ்களை வழங்கி வழிவகை செய்தது. நீதிமன்ற உத்தரவு வருவதற்கு முன்பே அரசு அதிகாரிகள் முன்கூட்டியே தாள்களைத் தயார் செய்து வைத்திருந்தது பலரையும் வியப்பில் ஆழ்த்தியுள்ளது.

3,000 கி.மீ தூரத்தை 6 நாட்களில் கடந்த கொடுமை

நீதிமன்றத்தில் தாக்கல் செய்யப்பட்ட விதிமுறைகளின்படி, ஒரு யானையை வாகனத்தில் ஒரு நாளைக்கு 125 கிலோமீட்டருக்கு மேல் அழைத்துச் செல்லக்கூடாது; மணிக்கு 25 கி.மீ வேகத்தில், தினமும் 6 மணி நேரம் மட்டுமே வாகனம் நகர வேண்டும். இந்த விதியை மதித்திருந்தால் அசாமில் இருந்து மதுரைக்கு வர 24 நாட்கள் ஆகியிருக்க வேண்டும்.

ஆனால், மதுரை மீனாட்சி அம்மன் கோயில் கும்பாபிஷேகத்திற்குள் கொண்டுவர வேண்டும் என்பதற்காக, துர்கா 3,000 கிலோமீட்டர் தூரத்தை வெறும் 6 நாட்களில் இடைவிடாமல் லாரியில் கொண்டுவரப்பட்டது. இதன்மூலம் சொந்தமாக அமைத்த விதிமுறைகளே அப்பட்டமாக மீறப்பட்டுள்ளன. துர்காவைத் தொடர்ந்து ஹீரலால், பிஜுலி, சிவா, ரூப்சிங் ஆகிய மற்ற 4 யானைகளும் மிகக் குறுகிய காலத்தில் தமிழகம் வந்து சேர்ந்தன.

யானைகளின் பின்னணியில் உள்ள மர்மங்கள்

இந்த 5 யானைகளும் தனியார் வளர்ப்பில் பிறந்தவை, அவர்களின் உரிமையாளர்கள் தாமாக முன்வந்து கோயிலுக்குப் பரிசாகத் தருகிறார்கள் என்று ஆவணங்கள் கூறுகின்றன. ஆனால் தரைமட்ட நிலவரம் வேறு கதையைச் சொல்கிறது:

காட்டில் பிடிபட்டதற்கான அடையாளங்கள்: துர்கா, சிவா, ரூப்சிங் ஆகிய யானைகளின் காதுகளில் சிறிய துளைகள் உள்ளன. காட்டில் இருந்து பிடிபடும் குட்டி யானைகளை அடக்கிக் கட்டுப்படுத்த இத்தகைய துளைகள் போடப்படும் என்று விலங்கு நல ஆர்வலர்கள் கூறுகின்றனர். மேலும், ரூப்சிங் யானையின் முன்னங்காலில் துப்பாக்கி குண்டு பாய்ந்த வடுவும் இருந்தது கண்டுபிடிக்கப்பட்டுள்ளது.

உடலமைப்பு மற்றும் வயது முரண்பாடுகள்: சுமார் 4 வயதுடைய துர்காவின் தும்பிக்கை நீளம் 120 செ.மீ ஆக உள்ளது. ஆனால் 7 வயதுடைய ஹீரலால் யானையின் தும்பிக்கை வெறும் 90 செ.மீ மட்டுமே உள்ளது. இது யானைகளின் ஆவணப்படுத்தப்பட்ட வயதில் பெரும் தில்லுமுல்லு நடந்துள்ளதை வெளிப்படுத்துகிறது.

இருப்பில் இல்லாத உரிமையாளர்கள்: பிஜுலி யானையைத் தானமாக வழங்கியதாகக் கூறப்படும் ஹிதேஷ்வர் மோரன் என்பவரைத் தேடி அசாம் கிராமத்திற்கு நிருபர்கள் சென்றபோது, அப்படி ஒரு நபரே அந்தக் கிராமத்தில் இல்லை என்று உள்ளூர் மக்கள் தெரிவித்துள்ளனர்.

அரசு சரணாலயத்தில் வளர்ப்பு யானைகளா?: தனியார் வசம் இருப்பதாகக் கூறப்பட்ட இந்த யானைகள், அசாமின் மனாஸ் தேசியப் பூங்காவில் வைக்கப்பட்டிருந்தது ஏன் என்ற கேள்விக்கும் இதுவரை தெளிவான பதிலில்லை.

சட்டப் பிரிவு 43 மாற்றமும் பணப் பரிவர்த்தனை புகார்களும்

இந்தியாவில் 1972 வனவிலங்கு பாதுகாப்புச் சட்டப்படி யானைகளை விற்பதோ, வணிக ரீதியாக மாற்றுவதோ தடை செய்யப்பட்டுள்ளது. ஆனால் 2022-ஆம் ஆண்டு மத்திய அரசு கொண்டுவந்த சட்டத் திருத்தம், மத அல்லது பிற பயன்பாடுகளுக்காக" யானைகளைத் தானமாகப் பெற வழிவகை செய்தது.

இந்த விதிவிலக்கு தான் யானைக் கடத்தலுக்குப் புதிய கதவைத் திறந்துவிட்டதாகக் குற்றம்சாட்டப்படுகிறது. வடகிழக்கு மாநிலங்களில் இருந்து வரும் குட்டி யானைகளின் சந்தை மதிப்பு ரூ.60 லட்சம் முதல் ரூ.80 லட்சம் வரை உள்ளதாகக் கூறப்படுகிறது. தமிழகத்தில் ஒரு யானையின் மறைமுக மதிப்பு ரூ.1.5 கோடியைத் தொடுகிறது. இந்த 5 யானைகளுக்காக சுமார் ரூ.6 கோடி அளவுக்குப் பணப் பரிவர்த்தனை நடந்ததாக அசாம் காங்கிரஸ் தரப்பில் பகிரங்கக் குற்றச்சாட்டு முன்வைக்கப்பட்டுள்ளது.

கண்டுகொள்ளப்படாத நீதிமன்ற எச்சரிக்கை

தமிழகக் கோயில்களில் ஏற்கனவே உள்ள 9 யானைகள் மோசமாகப் பராமரிக்கப்படுவதாகக் கூறி, அவற்றை மீட்க கவுகாத்தி உயர்நீதிமன்றம் உத்தரவிட்டிருந்தது. அப்படி இருக்கும்போது, அதே அசாம் மாநிலம் மீண்டும் 5 இளம் யானைகளைத் தமிழகத்திற்கு அனுப்பியிருப்பது பலரையும் அதிர்ச்சியடையச் செய்துள்ளது.

காட்டில் தாயிடம் இருந்து பிரிக்கப்பட்டு, போலி ஆவணங்கள் மூலம் வளர்ப்பு யானைகள் என முத்திரை குத்தப்பட்டு கோயில்களுக்கு அனுப்பப்படுகிறதா என்ற விவகாரம் தற்போது சர்வதேச அமைப்புகள் வரையிலும் புகாராகச் சென்றுள்ளது. வெளிப்படையான விசாரணை நடத்தப்பட்டால் மட்டுமே இந்த யானை இடமாற்றத்தின் பின்னணியில் உள்ள முழு உண்மைகளும் வெளிச்சத்திற்கு வரும்.