திமுகவை உதயநிதி நிர்வகிப்பார்.. 2 மாதத்தில் அமைச்சராகிறார்.. அமைச்சர் மூர்த்தி பரபரப்பு தகவல்
மதுரை: திமுகவை உதயநிதிதான் நிர்வகிக்க போகிறார் என அமைச்சர் மூர்த்தி தெரிவித்துள்ளார்.
மதுரை மாவட்டம் சோழவந்தான் தொகுதி எம்எல்ஏவாக உள்ளவர் மூர்த்தி. இவர் தமிழக வணிக வரித் துறை அமைச்சராகவும் இருந்து வருகிறார். உள்ளாட்சி தேர்தலையொட்டி திமுக வேட்பாளர்களை ஆதரித்து முதல்வர் ஸ்டாலின் காணொலி வாயிலாக பிரச்சாரம் செய்கிறார்.
அது போல் உதயநிதி ஸ்டாலின், மாநில அமைச்சர்கள், எம்எல்ஏக்கள், மாவட்டச் செயலாளர்கள் நேரில் பிரச்சாரம் செய்து வருகிறார்கள். அந்த வகையில் மதுரை மாநகராட்சிக்குள்பட்ட பகுதிகளில் அமைச்சர் மூர்த்தி தேர்தல் பிரச்சாரம் செய்தார்.
2 மாதங்களில் அமைச்சர் பதவி
அவர் கூறுகையில் திமுகவை உதயநிதி ஸ்டாலின்தான் நிர்வகிக்க போகிறார். இன்னும் 2 மாதங்களில் உதயநிதி அமைச்சராக போகிறார். முதல்வர் ஸ்டாலினை போலவே உதயநிதி ஸ்டாலினும் சிறுவயதிலிருந்து கட்சிக்காகவும் மக்களுக்காகவும் உழைக்கிறார். நேரு, இந்திரா காந்தி முதல் ஜெயக்குமார், ஓபிஎஸ் வரை வாரிசு அரசியல் இருக்கிறது என்றார்.
பாராட்டத்தக்கது
இவர் ஏற்கெனவே ஒரு முறை உதயநிதிக்கு அமைச்சர் பதவி கொடுப்பது குறித்து பேசியிருந்தார். அவர் கூறுகையில் திமுக வெற்றிக்காக இரவு பகலாக பாடுபட்டவர் உதயநிதி. அனைவரும் பாராட்டும் வகையில் செயல்பட்டு வருகிறார். அவரது பணி அமைச்சராக தமிழகம் முழுவதும் தொடர வேண்டும் என்பது மக்களின் விருப்பமாக உள்ளது என தெரிவித்திருந்தது குறிப்பிடத்தக்கது.
பிற்படுத்தப்பட்டோர் நலத் துறை
பிற்படுத்தப்பட்டோர் நலத்துறை அமைச்சர் எஸ் எஸ் சிவசங்கர், பள்ளிக் கல்வித் துறை அமைச்சர் அன்பில் மகேஷ் பொய்யாமொழி உள்ளிட்டோர் உதயநிதிக்கு அமைச்சர் பதவி கொடுக்க வேண்டும் என்றனர். அது போல் அமைச்சர் கே என் நேருவும் இதே கருத்தை தெரிவித்திருந்தார். இந்த நிலையில் கோவையில் நடந்த நிகழ்ச்சி ஒன்றில் அமைச்சர் சேகர் பாபுவும் உதயநிதிக்கு அமைச்சர் பதவி கொடுக்க வேண்டும் என்றார்.
அமைச்சர் பதவி வேண்டாம்
அப்போது பேசிய உதயநிதி, நான் பதவி மீது எப்போதும் ஆசை வைத்ததில்லை. எனக்கு வேண்டாம். நான் எப்போதும் மக்களுக்கு சேவை புரியவே விரும்புகிறேன். மக்களுக்கும் முதல்வருக்கும் பாலமாக இருந்து நன்மை செய்ய விரும்புகிறேன் என்றார். உதயநிதி வேண்டாம் என்றாலும் அமைச்சர் பதவி அவரை விடாமல் துரத்தி கொண்டே இருந்தது.
Click it and Unblock the Notifications
Sign in with Google