எய்ம்ஸ் மருத்துவமனைக்கு நாளை அடிக்கல் நாட்டும் பிரதமர் மோடி.. மதுரை நிகழ்ச்சி நிரல் இதுதான்

மதுரை: பிரதமர் நரேந்திர மோடி நாளை மதுரையில் எய்ம்ஸ் மருத்துவமனைக்கு அடிக்கல் நாட்டுகிறார்.

பிரதமர் நரேந்திர மோடியின் வருகை மற்றும் நிகழ்ச்சிகள் குறித்த ஒரு பார்வை இதோ:

விழாவில் பங்கேற்பதற்காக பிரதமர் மோடி நாளை காலை டெல்லியில் இருந்து சிறப்பு விமானத்தில் மதுரை விமான நிலையம் வருகிறார். காலை 11.20 மணிக்கு மதுரை வருகிறார் மோடி. அவருக்கு விமான நிலையத்தில் வரவேற்பு கொடுக்கப்படுகிறது.

இதையடுத்து, காரில் வருகை தந்து, விமான நிலையம் அருகே உள்ள மண்டேலாநகர் பகுதியில் நடைபெறும் எய்ம்ஸ் அடிக்கல் நாட்டு விழாவில் பங்கேற்கிறார் மோடி.

முக்கிய பிரமுகர்கள்

பகல் 12 மணி வரை எய்ம்ஸ் அடிக்கல் நாட்டு நிகழ்ச்சி நடக்கிறது. விழாவில் பிரதமர் மோடி எய்ம்ஸ் மருத்துவமனைக்கு அடிக்கல் நாட்டுகிறார். ஆளுநர் பன்வாரிலால் புரோகித், முதல்வர் எடப்பாடி பழனிசாமி, துணை முதல்வர் ஓ.பன்னீர்செல்வம், மத்திய அமைச்சர்கள் நிர்மலா சீத்தாராமன், பொன்.ராதாகிருஷ்ணன் உள்ளிட்டோர் இதில் பங்கேற்கிறார்கள்.

பாஜக ஆலோசனை

எய்ம்ஸ் மருத்துவமனைக்கு அடிக்கல் நாட்டியதும், பகல் 12.05 மணிக்கு பாஜக மாநாட்டில் மோடி பங்கேற்கிறார். மொத்தம் 10 நாடாளுமன்ற தொகுதி பாஜக நிர்வாகிகள் நடுவே, தேர்தல் வியூகம் குறித்து மோடி சிறப்புரையாற்றுகிறார். இந்த நிகழ்ச்சி 12.55 மணி வரை நடக்கிறது. பின்னர் விமான நிலையம் வரும் மோடி சிறப்பு விமானத்தில் கேரள மாநிலம் கொச்சி புறப்பட்டு செல்கிறார்.

ஒன்றரை மணி நேரம்

ஆக மொத்தம் சுமார் ஒன்றரை மணி நேரங்கள் தமிழகத்தில் பிரதமர் பல்வேறு நிகழ்ச்சிகளிலும் பங்கேற்கிறார். மோடி பங்கேற்கும் 2 நிகழ்ச்சிக்கும் அருகருகே மேடைகள் அமைக்கப்பட்டுள்ளன. பிரதமர் மோடி பங்கேற்கும் நிகழ்ச்சி நிறைவடையும் வரை ஒன்றரை மணி நேரமும் அப்பகுதியில் விமானம் பறக்க தடை விதிக்கப்பட்டுள்ளது.

மதுரை புறப்படும் முதல்வர்

பிரதமர் நிகழ்ச்சியில் பங்கேற்பதற்காக, முதல்வர் எடப்பாடி பழனிசாமி, இன்று இரவே மதுரை செல்கிறார். மதுரை அழகர்கோவில் ரோட்டில் உள்ள ஹோட்டலில் எடப்பாடி பழனிசாமி தங்குகிறார்.

English summary

PM Narendra Modi will participate in laying foundation for AIIMS in Madurai on Sunday.