விஜயதரணிக்கு ஷாக் கொடுத்த விளவங்கோடு! காங்கிரஸிலிருந்து.. பாஜகவுக்கு தாவி போட்டியிட்டபோதும் தோல்வி!
நாகர்கோவில்: கடந்த நாடாளுமன்ற தேர்தலையொட்டி, அப்போதைய விளவங்கோடு காங்கிரஸ் எம்எல்ஏவாக இருந்த விஜயதரணி, காங்கிரஸிலிருந்து விலகி பாஜகவில் இணைந்திருந்தார். இது தமிழகம் முழுவதும் பரபரப்பாக பேசப்பட்டு இருந்தது. இந்நிலையில் இந்த முறை பாஜக சார்பில் சட்டமன்ற தேர்தலில் போட்டியிட்டு இருந்த நிலையில் அவர் தோல்வியடைந்திருக்கிறார்.
கன்னியாகுமரி மாவட்டம் விளவங்கோடு சட்டமன்ற தொகுதியில் 3 முறை வெற்றி பெற்று எம்எல்ஏவாக இருந்தவர்தான் விஜயதரணி. வெறும் எம்எல்ஏ மட்டுமல்லாது, காங்கிரஸ் கட்சியின் அகில இந்திய மற்றும் மாநில பொறுப்புகளிலும் இருந்து பணியாற்றி வந்திருந்தார்.
இப்படி இருக்கையில்தான் கடந்த 2024 நாடாளுமன்ற தேர்தலையொட்டி, காங்கிரஸ் கட்சியிலிருந்து அவர் முழுவதுமாக விலகி பாஜகவில் இணைந்தார். பாஜகவுக்கு தாவிய பின்னர் அவர் கொடுத்த பேட்டி பரவலாக கவனம் பெற்றிருந்தது.
"காங்கிரஸ் கட்சியில் பெண்களை தலைவர்களாக பார்க்கவோ, ஏற்கவோ மறுக்கிறார்கள். ஆனால், பாஜகவில் அப்படியான பிரச்சனை இல்லை. முத்தலாக்கில் இருந்து விடுதலை, பெண்களுக்கு சொத்துரிமை என பாஜக பெண்களுக்காக எவ்வளவோ நல்ல விஷயங்களை செய்திருக்கிறது. அப்படியே காங்கிரஸுக்கு வந்தால், இங்கு சட்டமன்ற தலைவர் பொறுப்பு கூட தர மறுக்கிறார்கள். இதுதான் காங்கிரஸ் கட்சி.
காங்கிரஸ் ஆட்சியில் ஏராளமான தமிழக மீனவர்கள் இலங்கை கடற்படையினரால் சுட்டுக் கொல்லப்பட்டனர். ஆனால், பாஜக ஆட்சியில் அப்படி எதுவும் நடக்கவில்லை" என்று கூறியிருந்தார்.
என்னதான் காங்கிரஸ், பாஜகவுக்கு எதிராக போராடுவதாக சொல்லிக்கொண்டாலும், அக்கட்கிலிருந்து பலரும் பாஜகவுக்கு தாவி வருகின்றனர். அந்த வகையில் விஜயதரணியின் செயல்பாடு விமர்சனமாக பார்க்கப்பட்டிருந்தது.
ஆனால், விஜயதரணி கட்சி தாவியிருந்தாலும் அவருக்கு உரிய அங்கீகாரம் எதுவும் வழங்கப்படாமல் இருந்து. குறிப்பாக அவர் நாடாளுமன்ற தேர்தலை ஒட்டிதான் கட்சி தாவியிருந்தார். எனவே, அவருக்கு எம்பி தேர்தலில் போட்டியிட சீட் வழங்கப்படும் என்று எதிர்பார்க்கப்பட்டிருந்தது. இருப்பினும் அப்படி எதுவும் கொடுக்கப்படவில்லை. எனவே வேறு வழியின்றி மீண்டும் விளவங்கோடு தொகுதியில் பாஜக சார்பில் இந்த சட்டமன்ற தேர்தலில் போட்டியிட்டிருந்தார்.
இந்நிலையில் தேர்தலில் அவர் தோல்வியடைந்திருக்கிறார். இந்த தொகுதியில் காங்கிரஸ் சார்பில் போட்டியிட்டிருந்த பிரவீன் வெற்றிப்பெற்றிருக்கிறார்.
Click it and Unblock the Notifications
Sign in with Google