கவனிச்சீங்களா? கடந்த 2 நாட்களாக தங்கம், வெள்ளி விலை சரமாரியாக இறங்கி ஏறுவது ஏன்? காரணம்?
நியூயார்க்: அமெரிக்காவில் நடந்து முடிந்த இடைக்காலத் தேர்தல் முடிவுகள், உலக முதலீட்டுச் சந்தைகளில் மிகப்பெரிய மாற்றத்தை ஏற்படுத்தியுள்ளன. அமெரிக்க நாடாளுமன்றத்தின் இரண்டு அவைகளிலும் ஜனநாயகக் கட்சி பெரும் வெற்றி பெற்றுள்ளது. இதன் எதிரொலியாக அந்நாட்டுப் பங்குச் சந்தைகள் 3% வரை அதிகரித்தன.
அந்நாட்டு டவ் ஜோன்ஸ் குறியீடு 1500 புள்ளிகளுக்கு மேல் உயர்ந்ததுடன், எஸ்&பி குறியீடு 1.6% மற்றும் நாஸ்டாக் குறியீடு 0.9% உயர்ந்தன. மறுபுறம், கச்சா எண்ணெய் விலை ஒரே வாரத்தில் 17.3% சரிந்து, கடந்த நான்கு வாரங்களில் இல்லாத குறைந்த நிலையை எட்டியது.
பங்குச் சந்தையில் எழுச்சி ஒருபுறம் இருக்க, சாமானிய மக்கள் உற்றுநோக்கும் தங்கம் மற்றும் வெள்ளி விலையிலும் கடந்த இரண்டு வர்த்தக நாட்களில் அதிரடி ஏற்றம் காணப்பட்டுள்ளது.
சரிவிலிருந்து மீண்ட தங்கம் மற்றும் வெள்ளி
கடந்த சில மாதங்களாகவே தங்கம், வெள்ளி விலைகள் சரிவைச் சந்தித்து, ஓராண்டின் மிகக் குறைந்த நிலைக்குத் தள்ளப்பட்டிருந்தன. ஆனால் தேர்தல் முடிவுகள் வெளியான இரண்டு நாட்களுக்குள் களம் தலைகீழாக மாறியது.
சர்வதேச சந்தையில் தங்கத்தின் விலை இரண்டு நாட்களில் மட்டும் 5%-க்கும் மேல் எகிறியது. இந்த வாரம் ஒரு அவுன்ஸ் தங்கம் 3,874 டாலர் என்ற குறைந்த நிலைக்குச் சென்ற நிலையில், வியாழக்கிழமையன்று மீண்டும் உயர்ந்து 4,146 டாலர் வரை சென்றது.
அதேபோல், வெள்ளி விலையும் ஓராண்டு சரிவிலிருந்து வேகமான மீட்சியைப் பதிவு செய்தது. புதன்கிழமை ஒரு அவுன்ஸ் 48.9 டாலராக இருந்த வெள்ளி, வியாழனன்று 53.5 டாலராக உயர்ந்தது. இரண்டு நாட்களில் வெள்ளி 6%-க்கும் அதிகமான வளர்ச்சியை எட்டியுள்ளது முதலீட்டாளர்களின் கவனத்தை மீண்டும் ஈர்த்துள்ளது.
தங்கம் மற்றும் வெள்ளி விலை உயர முக்கிய காரணங்கள்:
அமெரிக்க டாலரின் வீழ்ச்சி
பொதுவாக சர்வதேச சந்தையில் டாலரின் மதிப்பும் தங்கம் விலையும் எதிரெதிர் திசையில் இயங்கும் தன்மை கொண்டவை. தங்கம் மற்றும் வெள்ளி டாலரில்தான் மதிப்பிடப்படுகின்றன. தேர்தல் முடிவுகளால் அமெரிக்க டாலரின் மதிப்பு சரிந்தபோது, மற்ற நாடுகளின் பண மதிப்பு வலுப்பெற்றது. இதனால் பிற நாட்டு வர்த்தகர்களுக்கு தங்கம் வாங்குவது மலிவாகி, சந்தையில் வாங்குவோரின் தேவை கிடுகிடுவென அதிகரித்தது.
பத்திர வருவாய் சரிவு
அரசு கடன் பத்திரங்களின் மீதான வருவாய் குறையும் போது, மக்கள் பாதுகாப்பான சொத்தான தங்கத்தை நோக்கி நகர்வார்கள். தங்கம் வைத்திருப்பதால் வட்டி வருமானம் எதுவும் கிடைக்காது என்றாலும், பத்திரங்களின் வருவாய் குறைந்ததால் முதலீட்டாளர்களுக்கு தங்கமே சிறந்த தேர்வாக அமைந்தது. மேலும் பணவீக்க அச்சம் நீடிப்பதால், தங்கத்தின் பாதுகாப்பு மதிப்பு மேலும் கூடுகிறது.
மத்திய வங்கிகள் தங்கம் வாங்குதல்
நாணய மதிப்பில் ஏற்படும் ஏற்ற இறக்கங்களைச் சமாளிக்க உலக நாடுகளின் மத்திய வங்கிகள் பெருமளவில் தங்கத்தைச் சேமித்து வருகின்றன. நடப்பு 2026-ஆம் ஆண்டின் மூன்றாவது காலாண்டில் மட்டும் உலக மத்திய வங்கிகள் 321 டன் தங்கத்தை வாங்கியுள்ளன. இந்த ஆண்டில் இதுவரை 675 டன் தங்கம் கொள்முதல் செய்யப்பட்டுள்ளது. குறிப்பாக, சீன மத்திய வங்கி 63 டன்னும், போலந்து 40 டன்னும் வாங்கி குவித்துள்ளன.
2026-ஆம் ஆண்டைப் பொறுத்தவரை தங்கம் மற்றும் வெள்ளி விலைகள் பெரிய அளவில் லாபம் தராமல் சற்றே மந்தமாகவே இருந்துள்ளன. 2025-இல் அசுர வளர்ச்சி கண்ட வெள்ளி, இந்த ஆண்டில் சரிவைச் சந்தித்தது.
தற்போது சந்தை வரைபடங்களை ஆய்வு செய்தால், தங்கம் விலை மீண்டும் வலுவாகும் சூழலை அடைந்துள்ளது. வர்த்தக ரீதியாக 4,000 டாலர் என்ற அளவை தங்கம் தக்கவைப்பது மிக முக்கியமாகக் கருதப்படுகிறது. அதேசமயம் வெள்ளி விலை குறைந்த நிலையிலிருந்து 6% உயர்ந்திருந்தாலும், அது முழுமையான உச்சத்தை எட்ட ஒரு அவுன்ஸ் 54 டாலர் என்ற அளவைத் தாண்ட வேண்டும். அதுவரை வெள்ளியின் போக்கில் ஏற்ற இறக்கங்கள் தொடர வாய்ப்புள்ளது.
Click it and Unblock the Notifications
Sign in with Google
