புதுச்சேரி சட்டசபை தேர்தல்... பாஜக - அதிமுக கூட்டணியில் இருந்து வெளியேறியது பாமக

புதுச்சேரி: புதுச்சேரியில் தேசிய ஜனநாயகக் கூட்டணியில் இருந்து விலகிய பாமக, முதல்கட்டமாக ஒன்பது பேரைக் கொண்ட வேட்பாளர் பட்டியலை வெளியிட்டது.

தமிழகத்துடன் இணைந்து புதுச்சேரியிலும் ஒரே கட்டமாகச் சட்டசபை தேர்தல் நடைபெறுகிறது, சட்டசபை தேர்தல் அறிவிப்பதற்கு சில வாரங்களுக்கு முன், அங்கு நடைபெற்றுவந்த காங்கிரஸ் ஆட்சி பெரும்பான்மையை இழந்ததால் கவிழ்ந்தது.

இந்த முறை திமுக-காங்கிரஸ்-விசிக கூட்டணி மீண்டும் புதுச்சேரியில் போட்டியிடுகிறது. அதேபோல தேசிய ஜனநாயகக் கூட்டணி சார்பில் என்ஆர் காங்கிரஸ், பாஜக மற்றும் அதிமுக போட்டியிடுகிறது.

தேசிய ஜனநாயகக் கூட்டணியில் பாமக இடம் பெற்றிருந்த போதிலும், அக்கட்சிக்குத் தொகுதிகள் ஒதுக்கப்படவில்லை. விரைவில் தொகுதிகளை ஒதுக்கவில்லை என்றால் தனித்துப் போட்டியிடவுள்ளதாக பாமக ஏற்கனவே அறிவித்திருந்தது.

இந்நிலையில், தற்போது புதுச்சேரியில் தேசிய ஜனநாயகக் கூட்டணியிலிருந்து பாமக விலகியுள்ளது. மேலும், முதல்கட்டமாக ஒன்பது பேரைக் கொண்ட வேட்பாளர் பட்டியலையும் அக்கட்சி வெளியிட்டுள்ளது. வேட்பாளர்கள் அனைவரும் இன்று மற்றும் நாளை வேட்புமனு தாக்கல் செய்வார்கள் என்றும் புதுச்சேரி பாமக அமைப்பாளர் தன்ராஜ் தெரிவித்துள்ளார்.

புதுச்சேரி பாமக முதல்கட்ட வேட்பாளர் பட்டியல்

மண்ணாடிப்பட்டு - வெங்கடேசன், அரியாங்குப்பம் - சிவராமன், மங்கலம் - மதியழகன், தட்டாஞ்சாவடி -கதிர்வேல், லாஸ்பேட்டை நரசிம்மன், மணவெளி - கணபதி, இந்திரா நகர் வடிவேல், ஊசுடு (தனி)- கலியபெருமாள், திருபுவனை (தனி) - சாண்டில்யன்.

English summary

PMK walks out from national democratic alliance in Puducherry