விஜய் தவெகவின் ‘வெற்றி டிவி’? டெல்லியில் டிரேடுமார்க் விண்ணப்பம்! களமிறக்கப்படும் பிரம்மாண்ட திட்டம்

சென்னை: தமிழக சட்டமன்றத் தேர்தலில் அபார வெற்றி பெற்று ஆட்சியைப் பிடித்த தமிழக வெற்றிக் கழகம் (தவெக) தலைவர் மற்றும் முதலமைச்சர் சி. ஜோசப் விஜய் தலைமையில் புதிய அரசியல் அத்தியாயம் தொடங்கியுள்ளது. ஆட்சிப் பொறுப்பேற்ற சில நாட்களிலேயே பல திட்டங்களைச் செயல்படுத்தத் தொடங்கிய தவெக, இப்போது ஊடகத் துறையிலும் தனது தாக்கத்தைப் பதிக்கத் தயாராகி வருகிறது.

மத்திய அரசின் காப்புரிமை, வடிவமைப்பு மற்றும் வர்த்தக முத்திரைத் துறையில் "வெற்றி" (VETRI) என்ற பெயரில் புதிய செயற்கைக்கோள் தொலைக்காட்சி சேனல் மற்றும் டிஜிட்டல் ஒளிபரப்புக்கான வர்த்தக முத்திரை விண்ணப்பம் செய்யப்பட்டுள்ள தகவல் பெரும் பரபரப்பை ஏற்படுத்தியுள்ளது. இந்திய அறிவுசார் சொத்துரிமை (IP India) இணையதள தரவுகளின்படி, ஊடக ஒளிபரப்பு மற்றும் தகவல் தொடர்புத் துறைக்கான 'வகுப்பு 38' (Class 38) கீழ் இந்த விண்ணப்பம் டெல்லியில் பதிவு செய்யப்பட்டுள்ளது.

இந்த விண்ணப்பம் வெளியானதும் தமிழக அரசியல் மற்றும் ஊடக வட்டாரங்களில் பலத்த விவாதங்கள் எழுந்துள்ளன. இது தவெகவின் அதிகாரப்பூர்வ தொலைக்காட்சி சேனலாக இருக்கும் என்பது பெரும்பாலானோரின் ஊகம். பனையூர் தலைமை அலுவலக வட்டாரங்கள் இதை முழுமையாக மறுக்கவில்லை.

வெற்றி தொலைக்காட்சி' (Vetri TV)

"தமிழகத்தின் பெரிய கட்சிகள் அனைத்தும் தங்கள் கொள்கைகளை மக்களிடம் கொண்டு செல்ல தனி ஊடகங்களை நடத்தி வருகின்றன. அதேபோல், தவெக அரசின் புதிய திட்டங்கள், முதலமைச்சர் விஜய்யின் மக்கள் நலப் பணிகளைத் தொய்வின்றி மக்களிடம் சேர்க்க ஒரு அதிகாரப்பூர்வ ஊடகம் அவசியம். 'வெற்றி தொலைக்காட்சி' (Vetri TV) அதன் ஒரு பகுதி" எனக் கட்சி நிர்வாகிகள் தெரிவித்துள்ளனர்.

கடந்த சில மாதங்களாகவே தவெக சார்பில் புதிய சேனல் தொடங்கும் ஆரம்பகட்டப் பணிகள் ரகசியமாக நடைபெற்று வந்ததாகக் கூறப்படுகிறது. தொழில்நுட்ப நிபுணர்கள், ஊடகவியலாளர்கள் மற்றும் தயாரிப்பாளர்களைத் தேர்வு செய்யும் பணிகள் துரிதப்படுத்தப்பட்டுள்ளன. டிரேடுமார்க் விண்ணப்பம் சமர்ப்பிக்கப்பட்டுள்ளதால், சேனல் விரைவில் அதிகாரப்பூர்வமாக அறிமுகப்படுத்தப்படும் என எதிர்பார்க்கப்படுகிறது.

சமீபத்தில் தவெக அமைச்சரவைக் கூட்டத்தில் "வெற்றித் தமிழகம்" என்ற பெயரில் 436 தொலைநோக்குத் திட்டங்கள் அடங்கிய ஆவணம் வெளியிடப்பட்டது. இந்தச் சூழலில் "வெற்றி" என்ற அதே பெயரில் தொலைக்காட்சி வருவது தற்செயலானது அல்ல என அரசியல் விமர்சகர்கள் கருதுகின்றனர். எதிர்க்கட்சிகளின் விமர்சனங்களுக்கு உடனடி பதிலளிக்கவும், அரசின் சாதனைகளை நேரடியாக மக்களிடம் கொண்டு செல்லவும் இந்த சேனல் வலுவான கருவியாக அமையும்.

ஒப்புதல்கள் கிடைத்தவுடன் ஒளிபரப்பு

முதலமைச்சர் விஜய் சினிமாவிலிருந்து அரசியலுக்கு வந்து குறுகிய காலத்தில் ஆட்சிப் பொறுப்பேற்றுள்ளார். இப்போது ஊடகத் துறையிலும் அவர் "வெற்றி" என்ற பெயரில் நுழைவது தமிழ்நாட்டு ஊடக உலகில் பெரும் எதிர்பார்ப்பை ஏற்படுத்தியுள்ளது. MIB உரிமம் உள்ளிட்ட ஒப்புதல்கள் கிடைத்தவுடன் சில மாதங்களுக்குள் ஒளிபரப்பு தொடங்கும் எனக் கூறப்படுகிறது.

இந்த நடவடிக்கை தவெகவுக்கு மட்டுமின்றி, தமிழக அரசியல் சமன்பாட்டையும் மாற்றக்கூடியதாகப் பார்க்கப்படுகிறது. பாரம்பரிய ஊடகங்களின் ஆதிக்கத்துக்கு மத்தியில் புதிய குரலாக "வெற்றி தொலைக்காட்சி" உருவாகி வருவது தமிழக அரசியலில் புதிய அலையை உருவாக்கும் என அரசியல் பார்வையாளர்கள் தெரிவிக்கின்றனர்.

English summary

Tamil Nadu CM Vijay's Party Launches 'Vetri TV': Official TVK Channel Trademark Filed in Delhi