ரூ.28 கோடி செலவில் பள்ளிகள், சேமிப்பு கிடங்குகள்... எடப்பாடி பழனிச்சாமி திறந்து வைத்தார்

தமிழகத்தின் பல்வேறு மாவட்டங்களில் புதிய மாதிரி பள்ளிக் கட்டடங்கள், உணவு சேமிப்புக் கிடங்குகள் ஆகியவற்றை முதல்வர் எடப்பாடி பழனிச்சாமி காணொலி காட்சி மூலம் இன்று திறந்து வைத்தார்.

சென்னை: ரூ.20 கோடி செலவில் 4 மாதிரி பள்ளிகள், ரூ.8 கோடி செலவில் 6 உணவு பொருள் சேமிப்பு கிடங்குகளை முதல்வர் எடப்பாடி பழனிச்சாமி காணொலி காட்சி மூலம் திறந்து வைத்தார்.

இது குறித்து தமிழக அரசு வெளியிட்டுள்ள செய்திக்குறிப்பில், "முதல்வர் எடப்பாடி பழனிசாமி தலைமைச்செயலகத்தில், அனைவருக்கும் இடைநிலைக் கல்வித் திட்டத்தின் கீழ் விழுப்புரம் மாவட்டம் - சங்கராபுரம் வட்டம், கல்வராயன் மலையில் உள்ள மூலக்காடு என்னும் இடத்தில் 32,179 சதுர அடி பரப்பளவில், 14 வகுப்பறைகள், 5 ஆய்வகங்கள், பணியாளர் அறை, நூலகம், கழிவறைகள் உள்ளிட்ட வசதிகளுடன் 5 கோடியே 93 லட்சம் ரூபாய் மதிப்பீட்டில் கட்டப்பட்டுள்ள மாதிரி பள்ளியை காணொலிக் காட்சி மூலமாகத் திறந்து வைத்தார்.

மேலும், விழுப்புரம் மாவட்டம்-திருநாவலூரில் 4 கோடியே 86 லட்சம் ரூபாய் மதிப்பீட்டிலும், உளுந்தூர்பேட்டையில் 4 கோடியே 78 லட்சம் ரூபாய் மதிப்பீட்டிலும்; தர்மபுரி மாவட்டம் - காரிமங்கலத்தில் 4 கோடியே 89 லட்சம் ரூபாய் மதிப்பீட்டிலும் கட்டப்பட்டுள்ள மாதிரி பள்ளிகள்; எனமொத்தம் 20 கோடியே 46 லட்சம் ரூபாய் மதிப்பீட்டில் அனைவருக்கும் இடைநிலைக் கல்வித் திட்டத்தின் கீழ்கட்டப்பட்டுள்ள 4 மாதிரிபள்ளிகளை திறந்து வைத்தார்.

தமிழ்நாடு நுகர்பொருள் வாணிபக்கழகத்தின் சார்பில், தஞ்சாவூர் மாவட்டம் - பாபநாசம் வட்டம், இரும்புத்தலையில் 929.25 சதுர மீட்டர் பரப்பளவில் 1500 மெட்ரிக் டன் கொள்ளளவு கொண்ட 2 உணவு பொருள் சேமிப்பு கிடங்குகள், 619.50 சதுர மீட்டர் பரப்பளவில் 1000 மெட்ரிக் டன் கொள்ளளவு கொண்ட 2 உணவு பொருள் சேமிப்பு கிடங்குகள், என மொத்தம் 5,000 மெட்ரிக் டன் கொள்ளளவுடன் 6 கோடி ரூபாய் மதிப்பீட்டில் கட்டப்பட்டுள்ள 4 உணவு பொருள் கிடங்குகளையும், கிருஷ்ணகிரி மாவட்டம் - ஊத்தங்கரையில் 929.25 சதுர மீட்டர் பரப்பளவில் 2 கோடியே 40 லட்சம் ரூபாய் மதிப்பீட்டில் தலா 1500 மெட்ரிக் டன் கொள்ளளவு கொண்ட 2 சேமிப்பு கிடங்குகள்; என மொத்தம் 8 கோடியே 40 லட்சம் ரூபாய் மதிப்பீட்டில் 8,000 மெட்ரிக் டன் கொள்ளளவு கொண்ட 6 உணவு பொருள் சேமிப்பு கிடங்குகளை முதல்வர் திறந்து வைத்தார்." என்று தெரிவிக்கப்பட்டுள்ளது.

English summary

Tamil Nadu Chief Minister Edappadi Palanisamy opens model schools and Food storage warehouses in various districts.