தேனியில் தப்புக்கணக்கு போட்ட தங்க தமிழ் செல்வன்.. பொதுமக்கள் மத்தியில் சிரிப்பலை
தேனி: தேனி லோக்சபா தொகுதியில் போட்டியிடும் தி.மு.க. வேட்பாளர் தங்கதமிழ்செல்வன் பிரச்சாரத்தின் போது சிலிண்டர் விலை குறைக்கப்படும் என்று கூறிய போது, தப்புக்கணக்கு போட்டதால் சிரிப்பலை எழுந்தது.
லோக்சபா தேர்தல் பிரச்சாரம் தேனி மாவட்டத்தில் களை கட்டியிருக்கிறது. இந்த முறை தேனியில் பாஜக கூட்டணி சார்பில் அமமுக பொதுச்செயலாளர் டிடிவி தினகரன் நிற்கிறார். இதேபோல் திமுக சார்பில் தங்க தமிழ் செல்வன் நிற்கிறார். அதிமுக சார்பில் நாராயணசாமி நிற்கிறார்.
லோக்சபா தேர்தலையொட்டி வேட்பு மனு தாக்கல் முடிந்து வேட்பாளர்கள் தீவிர பிரசாரத்தில் ஈடுபட்டு வருகிறார்கள். கடந்த சில நாட்களாக அரசியல் கட்சிகள் சார்பில், தேர்தல் பிரசார கூட்டங்கள், வேட்பு மனு தாக்கல் ஊர்வலம் போன்றவை தீவிரமாக நடந்து வந்தன. தற்போது திமுக, அதிமுக, அமமுக ஆகிய கட்சிகளின் தேர்தல் பிரசாரங்கள் தீவிரமாக நடந்து வருகின்றன. தேனி மாவட்டத்தில் வேட்பாளர்களின் தேர்தல் பிரசாரத்துடன், அரசியல் தலைவர்கள், நட்சத்திர பேச்சாளர்களும் பிரசாரம் செய்து வருகிறார்கள்.
தேனி மற்றும் தி.மு.க. வேட்பாளர் தங்க தமிழ் செல்வன் தேனி சுற்றுவட்டார பகுதிகளில் நேற்று தீவிர பிரசாரம் செய்தார். தேனியை ஒட்டியுள்ள வடபுதுப்பட்டியில் பிரசாரம் செய்தபோது, லோக்சபா தேர்தலில் இந்தியா கூட்டணி வெற்றி பெற்று ஆட்சிக்கு வந்தால் சிலிண்டர் விலை ரூ.500 ஆக குறைக்கப்படும் என்று தங்க தமிழ் செல்வன் கூறினார்.
அப்போது தங்க தமிழ் செல்வன் பேசுகையில், 'சிலிண்டர் விலை ரூ.500 ஆக குறைத்த பிறகு மாதம் உங்களுக்கு 600 ரூபாய் நிச்சயம் மிச்சமாகும். மாதம் 600 ரூபாய் என்றால் 10 ஆண்டுக்கு எவ்வளவு மிச்சம் ஆகும் என்பதை கணக்குப் பண்ணி சொல்லுங்க. எனக்கு கணக்குப் பண்ண தெரியாது என்றார்.
நீங்களே கால்குலேட்டரில் கணக்குப் போட்டு பாருங்க. 10 ஆண்டுக்கு 120 மாதம். 120 மாதத்துக்கு ரூ.600 வீதம் கணக்குப்போடுங்க. எவ்வளவு வருது? கால்குலேட்டரை தட்டிப் பாருங்கப்பா' என்று கூட்டத்தை பார்த்து கேட்டார். அருகில் நின்ற சரவணக்குமார் எம்.எல்.ஏ. உள்பட சிலர் செல்போனில் கால்குலேட்டரை எடுத்து கணக்குப் போட்டுப் பார்த்து கொண்டிருந்தனர்.
அவருக்கு பின்னால் நின்ற நிர்வாகிகள் கணக்குப்போட்டு தங்க தமிழ் செல்வன் காதோரம் விடையளித்தார்கள். அதைக் கேட்டுக் கொண்டே, 'கடந்த 10 ஆண்டில் மட்டும் சிலிண்டருக்காக ரூ.7 லட்சத்து 20 ஆயிரம் கொடுத்திருக்கிறோம். இது உங்களுக்கே தெரியாது பாவம்' என்றார்.
மாதம் ரூ.600 என்றால் 120 மாதத்துக்கு ரூ.72 ஆயிரம் வரும். ஆனால், தங்க தமிழ் செல்வன் ரூ.7 லட்சத்து 20 ஆயிரம் என்று தப்பான கணக்கை சொன்னதால் அங்கு சிறிது நேரம் சிரிப்பலை எழுந்தது.
Click it and Unblock the Notifications
Sign in with Google