உங்களுக்கு ஒன்றும் ஆகாது! விரைவில் குணம் அடைவீர்கள்! முத்தரசனை நேரில் நலம் விசாரித்த துரை வைகோ!

திருச்சி: உடல்நலக் குறைவால் மருத்துவமனையில் அனுமதிக்கப்பட்டு சிகிச்சை பெற்று வரும் இந்திய கம்யூனிஸ்ட் மாநிலச் செயலாளர் முத்தரசனை, மதிமுக முதன்மை செயலாளர் துரை வைகோ நேரில் சந்தித்து நலம் விசாரித்தார். இது குறித்து துரை வைகோ கூறியிருப்பதாவது;

திருச்சி காவிரி மருத்துவமனை: பெருமதிப்பிற்குரிய அண்ணன் இரா.முத்தரசன் அவர்களின் உடல்நலனை நேரில் கேட்டறிந்தேன். இந்தியக் கம்யூனிஸ்டு கட்சியின் தமிழ்நாடு மாநிலச் செயலாளர் அன்பிற்குரிய அண்ணன் இரா.முத்தரசன் அவர்கள், உடல்நலக்குறைவால் திருச்சி காவிரி மருத்துவமனையில் அனுமதிக்கப்பட்டு சிகிச்சைப் பெற்று வருகின்றார்.

நேரில் சந்தித்து நலம் விசாரிப்பு: காவிரி நதிநீர் பிரச்சனையில் தமிழ்நாட்டின் உரிமை காக்கவும், நூறு நாள் வேலைத்திட்டத்தில் ஏழை, எளிய மக்களின் வாழ்வாதாரத்தை பாதுகாக்கவும், தமிழகத்தை தொடர்ந்து வஞ்சித்து வரும் ஒன்றிய பா.ஜ.க அரசைக் கண்டித்து 16.10.2023 அன்று திருச்சியில் நடைபெற்ற கண்டன ஆர்ப்பாட்டத்தில் பங்கேற்றுவிட்டு, திருச்சி காவிரி மருத்துவமனையில் அனுமதிக்கப்பட்டு உள்ள அண்ணன் இரா.முத்தரசன் அவர்களை நேரில் சந்திக்கச் சென்றேன்.

நோய்த்தொற்று: நோய்த்தொற்று இருப்பதால் பார்க்க வருபவர்களுக்கு ஏதேனும் சிரமம் வந்துவிடக் கூடாது என, அண்ணன் இரா.முத்தரன் அவர்கள் தெரிவித்தபோதும், அண்ணன் அவர்களை கட்டாயம் சந்திக்க வேண்டும் என சொல்லி, அவரது உடல் நலனை நேரில் கேட்டறிந்தேன்.

என் மீது அன்பு: அண்ணன் இரா.முத்தரசன் அவர்கள், இயக்கத் தந்தை தலைவர் வைகோ அவர்களின் மீது தனிப்பட்ட முறையில் அன்பும், மதிப்பும் வைத்திருப்பவர். மக்கள் நலக் கூட்டணி உருவானபோது, தலைவர் வைகோ அவர்களுக்கு உறுதுணையாக இருந்தவர். என் மீதும், அளவற்ற அன்பை எப்போதும் வெளிப்படுத்துவார். அவர், விரைவில் பூரண நலம் பெற்று, மக்கள் பணிக்கு திரும்ப மறுமலர்ச்சி தி.மு.க சார்பில் வாழ்த்துகளை தெரிவித்துக் கொள்கிறேன்.

மதிமுக நிர்வாகிகள்: இந்த சந்திப்பின்போது, மதிமுக துணைப் பொதுச்செயலாளர் மருத்துவர் ரொஹையா, சட்டமன்ற உறுப்பினர் புதூர் மு.பூமிநாதன், திருச்சி மாநகர் மாவட்டச் செயலாளர் வெல்லமண்டி சோமு, திருச்சி தெற்கு மாவட்டச் செயலாளர் மணவை தமிழ்மாணிக்கம், திருச்சி வடக்கு மாவட்டச் செயலாளர் டி.டி.சி.சேரன், தலைவர் வைகோவின் உதவியாளர் வெ.அடைக்கலம் ஆகியோர் உடனிருந்தார்கள்.

English summary

Cpi State Secretary Mutharasan treated in the hospital due to ill health, Durai Vaiko personally met and inquired about his health