உள்ளூர் போலீஸ் தோல்வி.. சிபிசிஐடி தோல்வி.. அப்போ செஞ்சி சிறுமி வழக்கிற்கு சிபிஐதான் இனி ஒரே வழி!
விழுப்புரம்: விழுப்புரம் மாவட்டம் செஞ்சி வட்டம், ஆலம்பூண்டி குளக்கரை தெருவைச் சேர்ந்த கூலித் தொழிலாளி வடிவேலு - பவானி தம்பதியின் 7 வயது மகள் ஹேமலதா (ஹேமாவதி) மாயமாகி 23 நாட்களைத் தொட்டுவிட்டது. கடந்த அக்டோபர் 11 அன்று இரவு தனது பிறந்தநாளைக் கொண்டாடிவிட்டு, தாய் மற்றும் பாட்டியின் அருகில் படுத்து உறங்கிய குழந்தை நள்ளிரவில் திடீரெனக் காணாமல் போனார்.
சம்பவம் நடந்து மூன்று வாரங்களுக்கு மேலாகியும் அந்தப் பச்சிளம் குழந்தை என்ன ஆனாள், எங்கே இருக்கிறாள் என்ற மிக அடிப்படையான ஒரு சிறு துப்பு கூட கிடைக்காமல் ஒட்டுமொத்த தமிழகமும் திகைத்து நிற்கிறது.
முதலில் களமிறங்கிய உள்ளூர் காவல் துறை ஆரம்பத்திலேயே வழக்கைச் சொதப்பியது. அடுத்து வந்த மாநிலக் குற்றப் புலனாய்வுத் துறையான சிபிசிஐடி பல முனைகளில் சுழன்றடித்தும் வழக்கை முடிவுக்குக் கொண்டுவர முடியாமல் திணறி வருகிறது. இதனால், "மாநிலக் காவல்துறையின் கைகளை மீறிப் போய்விட்ட இந்த வழக்கை, இனியும் தாமதிக்காமல் உடனடியாக சிபிஐ வசம் ஒப்படைக்க வேண்டும்" என்ற முழக்கம் பாதிக்கப்பட்ட குடும்பத்தினர், சமூக அமைப்புகள் மற்றும் பொதுமக்களிடையே மிக வலுவாக வெடித்துள்ளது.
1. முதல் 10 நாட்கள்: உள்ளூர் போலீசாரின் ஆரம்பக்கட்ட குளறுபடிகள்
ஒரு குழந்தை காணாமல் போனால் முதல் 24 மணி நேரத்திற்குள் எடுக்கப்படும் துரித நடவடிக்கைகளே வழக்கை முடிவுக்குக் கொண்டுவரும். ஆனால் செஞ்சியில் உள்ளூர் சத்யமங்கலம் காவல் நிலைய போலீசார் ஆரம்பத்திலேயே கடுமையான மெத்தனத்தைக் காட்டினர்:
குழந்தை படுத்திருந்த வீடு, வாசல் மற்றும் கொல்லைப்புறத்தை உடனடியாக சீல் வைக்காமல், கிராம மக்கள் மற்றும் வெளியாட்கள் உள்ளே நுழைய அனுமதிக்கப்பட்டதால் மிக முக்கியமான விரல் ரேகைகள் மற்றும் கால்தடங்கள் தொடக்கத்திலேயே பாழாகின.
கிணறுகள், ஏரிகள், அடர்ந்த முட்புதர்கள் என வெளிப்புறங்களில் மீன்பிடி வலைகளையும் ட்ரோன்களையும் போட்டு சலித்தார்களே தவிர, கிராமத்திற்குள் நிகழ்ந்த சந்தேகத்திற்குரிய நடமாட்டங்களை முறையாகப் பதிவு செய்யவில்லை.
சிறுமியின் வீட்டிலிருந்து வெறும் 200 மீட்டர் தொலைவில் உள்ள மூதாட்டி மணிமேகலையின் வீட்டு கதவை நள்ளிரவில் யாரோ பலமாகத் தட்டிய மிக முக்கியமான தகவலை உள்ளூர் போலீசார் ஆரம்பத்தில் விசாரிக்கவே இல்லை.
இப்படி முதல் 10 நாட்களைப் பயனின்றி வீடித்ததால், கிராம மக்களின் தொடர் போராட்டங்களுக்குப் பின்னரே வழக்கு சிபிசிஐடி வசம் மாற்றப்பட்டது.
2. அடுத்த 13 நாட்கள்: திசைமாறி சுழன்றடித்த சிபிசிஐடி விசாரணை
சிபிசிஐடி பொறுப்பேற்றதும் இரண்டு டிஎஸ்பிக்கள், மோப்ப நாய்கள், சைபர் தடயவியல் நிபுணர்கள் எனப் பெரிய படையே களமிறங்கியது. அரசுப் பள்ளியையே முகாமாக மாற்றி விசாரணையைத் தொடங்கினர். ஆனால், அவர்களின் விசாரணையும் கூட தெளிவான இலக்கின்றித் தினமும் ஒரு புதிய திசையில் அலைக்கழிந்தது:
பரடந்தாங்கல் கிராமத்தைச் சேர்ந்த சரித்திரப் பதிவேடு குற்றவாளி ராஜதுரையைச் சிறையில் இருந்து வெளியே எடுத்து, அவர் பயன்படுத்திய 4 போலி சிம்கார்டுகளை ஆய்வு செய்து பள்ளி வளாகத்தில் வைத்து விசாரித்தனர். நள்ளிரவில் ஊரை விட்டு தப்பியோடிய சாமியார் சரவணன், சிறுமிக்கு ஜாதகம் கணித்துக் கொடுத்த தையல்காரர், கோவில் பூசாரி எனப் பலரையும் வளைத்து வாக்குமூலம் பெற்றனர்.
தந்தை வழி உறவினர்கள் சிலர் பெங்களூருவில் இருப்பதால், குழந்தை அங்கே கடத்தப்பட்டிருக்கலாமோ என்ற சந்தேகத்தில் கர்நாடக மாநிலம் வரை தனிப்படை விரைந்தது. சிறுமியின் தாயாருக்கு அவ்வப்போது பணம் கொடுத்து உதவிய நடுப்பட்டு கிராம முன்னாள் ஊராட்சி மன்ற தலைவரை விசாரித்ததில், அவமானம் தாங்காமல் அவர் விஷம் குடித்து மருத்துவமனையில் தீவிர சிகிச்சை பெறும் அளவுக்கு நிலைமை முற்றியது.
ஊருக்குள் துப்பு கிடைக்காததால் செஞ்சி வனத்துறையினரை உடன் சேர்த்துக்கொண்டு பாறை இடுக்குகளிலும் மலைக் குகைகளிலும் சல்லடை போட்டனர்.
இத்தனை கோணங்களில் 600-க்கும் மேற்பட்ட செல்போன் கோபுர அழைப்புகளை ஆய்வு செய்தும், "இன்னும் மூன்று நாட்களில் முடிப்போம்" என்று அதிகாரிகள் காலக்கெடு விதித்தும் கூட, இறுதியில் சிபிசிஐடி மீண்டும் முதல் நாளுக்கே திரும்பி தந்தையிடமும் தாயிடமுமே வந்து நின்றுவிட்டது.
3. சட்டம் ஒழுங்கு சீர்குலைவா? ஆட்சி அதிகாரத்தின் மீதான மக்களின் கோபம்
தேர்தல் காலங்களில் "குழந்தைகள் தங்கள் பெற்றோரிடம் சொல்லி தனக்கு வாக்களிக்க வைக்க வேண்டும்" என்று மேடைகளில் உருக்கமாகப் பேசி மக்களின் பெரும் ஆதரவோடு ஆட்சிப் பொறுப்பிற்கு வந்த ஒரு அரசு, இன்று அதே பிஞ்சுக் குழந்தையின் உயிரைப் பாதுகாக்க முடியாமல் தவிப்பது சாமானிய மக்களிடையே பெரும் கொந்தளிப்பை ஏற்படுத்தியுள்ளது.
சம்பவம் நடந்து 23 நாட்கள் ஆகியும், முதலமைச்சரிடமிருந்தோ அல்லது உயர் அமைச்சர்களிடமிருந்தோ பாதிக்கப்பட்ட ஏழைக் குடும்பத்திற்கு நேரில் சென்று தைரியம் சொல்லவோ, முறையான நேரடி உத்தரவுகளைப் பிறப்பிக்கவோ எவ்வித நடவடிக்கையும் இல்லை. "20 நாட்களுக்கும் மேலாக வேலைக்குப் போகாமல் பசி பட்டினியில் கிடக்கிறோம்; எங்களுக்கு வதந்திகள் வேண்டாம், குழந்தையை மீட்டுத் தாருங்கள்" என்று தாய் பவானி கதறி அழுது வீடியோ வெளியிடும் நிலைக்குத் தள்ளப்பட்டுள்ளார்.
ஒரு ஏழைக் கூலித் தொழிலாளியின் குழந்தை என்பதால் தான் இத்தனை அலட்சியமா? மாநில அரசின் உளவுத்துறையும், சிறப்புப் படைகளும் ஒரு கிராமத்து எல்லைக்குள் நடந்த கடத்தலைக்கூட கண்டுபிடிக்கத் தகுதியற்றவையா என்ற ஆவேசக் குரல்கள் தமிழகமெங்கும் எதிரொலிக்கின்றன.
4. இனி ஒரே தீர்வு சிபிஐ தானா? வலுக்கும் நியாயங்கள்
உள்ளூர் போலீசார் வழக்கை திசைதிருப்பியதும், மாநில சிபிசிஐடி பல முட்டுச்சந்துகளில் முட்டி மோதி மீண்டும் சுழல் வட்டத்திற்குள்ளேயே நிற்பதும் தெளிவான ஒரு உண்மையை உணர்த்துகிறது,
இந்தச் சூழலில், வழக்கை உடனடியாக மத்திய புலனாய்வுத் துறையான சிபிஐயிடம் ஒப்படைக்க வேண்டும் என்று பல்வேறு அரசியல் கட்சிகளும், சமூக அமைப்புகளும் தீர்மானங்களை நிறைவேற்றி வருகின்றன. இதற்கான முக்கிய காரணங்கள்:
கர்நாடகா, ஆந்திரா போன்ற அண்டை மாநிலங்களில் உள்ள சர்வதேச அல்லது மாநிலங்களுக்கு இடையேயான குழந்தை கடத்தல் நெட்வொர்க்குகளை சிபிஐயால் எவ்வித அதிகார எல்லைத் தடையுமின்றி உடனடியாகக் கண்காணிக்க முடியும்.
உள்ளூர் அரசியல் பிரமுகர்கள், முன்னாள் பஞ்சாயத்து தலைவர்கள், உள்ளூர் காவல்துறையினரின் ஆரம்பக்கட்ட தவறுகள் அனைத்தையும் எந்தவித தயவுதாட்சண்யமும் இன்றி நடுநிலையாக சிபிஐயால் தோண்டி எடுக்க முடியும். சிபிஐ வசம் உள்ள உயர் மட்ட சைபர் ஆய்வு மற்றும் சர்வதேச புலனாய்வு உத்திகள், 23 நாட்களாக முடிக்கப்படாத இந்த மர்ம முடிச்சுகளை மிகத் துல்லியமாக அவிழ்க்க உதவும்.
கால தாமதம் ஒரு பிஞ்சு குழந்தையின் உயிருக்கு ஆபத்து!
வழக்கமான அறிக்கைகளையும், அதிகாரிகளை மாற்றி அமைக்கும் கண்முடைப்பு நடவடிக்கைகளையும் தாண்டி ஒரு குழந்தையின் உயிரைக் காப்பாற்றுவதே இப்போது முதன்மையான கடமை. உள்ளூர் போலீசார் கைவிரித்துவிட்டார்கள்; சிபிசிஐடியும் நாளுக்கு நாள் புதிய கதைகளை மட்டுமே சொல்லிக் கொண்டிருக்கிறது.
இனியும் "நாங்களே விசாரிப்போம்" என்று தனது போலி கௌரவத்தைப் பிடித்துக்கொண்டு அரசு பிடிவாதம் பிடித்தால், அது அந்த 7 வயதுக் குழந்தைக்கு இழைக்கப்படும் மன்னிக்க முடியாத அநீதியாக மாறும். தமிழக அரசு உடனடியாகத் தனது தோல்வியை ஒப்புக்கொண்டு, இந்த வழக்கின் ஆவணங்களை முழுமையாக சிபிஐயிடம் ஒப்படைக்க வேண்டும். அது ஒன்றே செஞ்சி ஆலம்பூண்டி சிறுமி ஹேமலதாவை உயிருடன் மீட்டுப் பெற்றோரிடம் கொண்டுவந்து சேர்க்கும் ஒரே வழியாக இருக்கும்.
Click it and Unblock the Notifications
Sign in with Google
