சீனாவை எதிர்க்கும் டிரம்ப்.. ஆனா அவரது செயலாளர் போட்டுள்ள டிரஸ் கூட சீனாவில் தயாரிக்கப்பட்டது தானாம்
வாஷிங்டன்: அமெரிக்கா சீனா வர்த்தகப் போரில் மாறி மாறி வரிகளை விதித்து வருகிறது. இதற்கிடையே வெள்ளை மாளிகை பத்திரிக்கை செயலாளராக உள்ள கரோலின் லீவிட் என்பவர் அணிந்திருந்த ஆடை கூட சீனாவில் தயாரிக்கப்பட்டது என சீன தூதர் தெரிவித்துள்ளார். இது இணையத்தில் மிகப் பெரிய புயலைக் கிளப்பியுள்ளது. லீவிட்டிற்கு ஆதரவாகவும் எதிராகவும் பலரும் பலவிதக் கருத்துகளைக் கூறி வருகிறார்கள்.
அமெரிக்கா சீனா இடையேயான வர்த்தகப் போர் இப்போது சமூக வலைத்தளங்களுக்கும் வந்துவிட்டது. இதில் இணையத்தில் இப்போது சிக்கியுள்ளவர் தான் வெள்ளை மாளிகையின் பத்திரிகை செயலாளர் கரோலின் லீவிட். இவர் சமீபத்தில் செய்தியாளர்களைச் சந்திக்கும்போது சிவப்பு நிறத்தில் ஓர் ஆடையை அணிந்திருந்தார். அதுதான் இப்போது சர்ச்சையில் சிக்கியுள்ளது.
அதிபர் மாளிகை செயலாளர்
அதாவது டிரம்ப் நிர்வாகத்தில் உள்ள கரோலின் லீவிட் அணிந்திருந்த ஆடை சீனாவில் தயாரிக்கப்பட்டதாம். இந்தக் குற்றச்சாட்டை சீன தூதர் ஒருவர் முன்வைத்துள்ளார். இது தொடர்பாக அந்த நபர் பதிவிட்ட ட்வீட் இணையத்தில் வேகமாகப் பரவி வருகிறது. சும்மா பேச்சுக்கு சீன தயாரிப்புகளை எதிர்த்தால் போதாது. முதலில் டிரம்ப் நிர்வாகத்தினர் அதைப் பின்பற்ற வேண்டும் என்ற விமர்சனங்கள் எழுந்துள்ளன.
சீன உடை
இந்தோனேசியாவில் உள்ள சீன தூதர் ஜாங் ஜிஷெங் இது தொடர்பான ட்வீட்டை பகிர்ந்துள்ளார். டிரம்ப் நிர்வாகத்தில் உள்ள லீவிட்டின் போட்டோவை ஜிஷெங் பகிர்ந்துள்ளார். அதில் லீவிட் சிவப்பு மற்றும் கருப்பு நிற உடையை அணிந்திருக்கிறார். மேலும், அத்துடன் அவர் சீன தளமான வெய்போவின் ஸ்கிரீன்ஷாட்களையும் இணைந்துள்ளார். அதில் லீவிட்டின் ஆடையில் உள்ள சரிகை சீனாவின் மாபுவில் உள்ள ஒரு தொழிற்சாலையில் தயாரிக்கப்பட்டதாக நெட்டிசன் குறிப்பிட்டிருந்தார்.
இதைப் பகிர்ந்த அவர், "சீனாவை சும்மா குறைகூறுவது தான் இவர்கள் வேலை.. ஆனால், சீன பொருட்களைத் தொடர்ந்து வாங்குவார்கள். நீங்கள் அணிந்துள்ள உடையை அழகாக மாற்றும் சரிகை சீன நிறுவனம் தயாரித்தது. அதைத் தயாரித்த சீன ஊழியரே அதைச் சொல்கிறார் பாருங்கள்" எனப் பதிவிட்டுள்ளார். ஜிஷெங்கின் இந்த ட்வீட் இணையத்தில் டிரெண்டாகி வருகிறது.
நெட்டிசன்கள்
நெட்டிசன்கள் இது தொடர்பாகப் பல்வேறு கருத்துகளைப் பதிவிட்டு வருகிறார்கள். வேலைக்காக அவர் சீனாவை பொதுவெளியில் திட்டி வருகிறார். ஆனால், அவரது வாழ்க்கைக்குச் சீன தயாரிப்புகள் தான் தேவைப்படுகிறது" என்று தெரிவித்துள்ளார். ஐரோப்பாவைச் சேர்ந்த பல முன்னணி நிறுவனங்கள் கூட சீனாவில் தான் தங்கள் ஆலையை வைத்துள்ளன. எனவே, சீன தயாரிப்பைத் தவிர்க்கவே முடியாது என மற்றொரு நெட்டிசன் பதிவிட்டுள்ளார்.
அதேநேரம் லீவிட்டிற்கு ஆதரவாகவும் பலரும் கருத்துகளைப் பதிவிட்டு வருகிறார்கள். இது ஒரிஜினல் தான் என்றும் வேண்டும் என்றே குற்றஞ்சாட்ட வேண்டும் என்பதற்காக இதுபோல சொல்லி வருவதாகவும் நெட்டிசன்கள் கூறி வருகிறார்கள். இன்னும் சிலர், வேறு நிறுவனத்தின் ஒரிஜினல் தயாரிப்பை சீனா காப்பி அடித்து இருக்கலாம் என்றும் அதை ஒரிஜினல் என சொல்வதில் லாஜிக்கே இல்லை என்றும் பதிவிட்டு வருகிறார்கள்.
வர்த்தகப் போர்
மற்றொருபுறம் அமெரிக்கா சீனா இடையேயான வர்த்தகப் போர் தொடர்ந்தே வருகிறது. ஏற்கனவே சீன தயாரிப்புகளுக்கு அமெரிக்கா 145% வரிகளை விதித்துவிட்டது. சீனாவும் அதற்குப் பதிலடியாக அமெரிக்க தயாரிப்புகளுக்கு 125% வரி விதித்துள்ள நிலையில், அமெரிக்க தயாரிப்புகளுக்குக் கட்டுப்பாடுகளையும் விதித்து வருகிறது.
Click it and Unblock the Notifications
Sign in with Google