அமெரிக்க ராணுவத்தில் வரலாறு காணாத பூகம்பம்.. 50 அதிகாரிகளுக்கு உண்மை கண்டறியும் சோதனை!ஏன்?
வாஷிங்டன்: ஈரான் நாட்டுடன் நடக்கும் போரால், அமெரிக்க ராணுவத்திடம் இருக்கும் முக்கியமான ஆயுதங்கள் குறைந்து வருவதாகப் பத்திரிகைகளில் செய்திகள் வெளியாகின. இந்த ரகசியத் தகவல்களைப் பத்திரிகையாளர்களுக்கு யார் சொன்னார்கள் என்பதைக் கண்டுபிடிக்க, அமெரிக்க ராணுவத்தின் 50 பெரிய அதிகாரிகளுக்கு ஒரே நேரத்தில் 'பாலிகிராப்' எனப்படும் உண்மை கண்டறியும் சோதனை நடத்தப்பட்டுள்ளது.
அமெரிக்க வரலாற்றிலேயே இவ்வளவு பெரிய அதிகாரிகளுக்கு இப்படிச் சோதனை நடப்பது இதுவே முதல்முறை..
என்ன நடந்தது?
ஈரான் போரில் எதிரி நாட்டு ஏவுகணைகளைத் தடுத்து அழிக்கப் பயன்படும் பாட்ரியாட் ஏவுகணைகளும், நீண்ட தூரம் பாயும் ஏவுகணைகளும் அமெரிக்காவிடம் வேகமாகத் தீர்ந்து வருவதாகத் தொடர்ந்து தகவல்கள் வந்தன. நாட்டின் பாதுகாப்பு தொடர்பான இந்த முக்கியமான விஷயம் ஊடகங்களுக்கு எப்படித் தெரிந்தது என்ற கேள்வி எழுந்தது.
இதையடுத்து, கடந்த ஆகஸ்ட் மாதம் அமெரிக்க முப்படைகளின் தலைமை அலுவலகத்தில் வேலை செய்யும் உயர் அதிகாரிகள் மற்றும் முக்கிய ஊழியர்களிடம் விசாரணை நடந்தது. "ரகசியத் தகவல்களை நீங்கள்தான் பத்திரிகையாளர்களுக்குச் சொன்னீர்களா?" என்று அவர்களிடம் கேள்விகள் கேட்டு, பொய் சொல்வதைக் கண்டுபிடிக்கும் கருவி மூலம் சோதனை செய்தனர். தகவல்களை வெளியே சொன்னவர்களைப் பிடிக்கவும், இனிமேல் யாரும் இப்படிச் செய்யக் கூடாது என்று மற்றவர்களை எச்சரிக்கவுமே இந்தச் சோதனை நடத்தப்பட்டதாகத் தெரிகிறது.
அமெரிக்க பாதுகாப்புத் துறை சொன்ன பதில்
இந்த விவகாரம் குறித்துப் பேசிய பென்டகன் செய்தித் தொடர்பாளர் சீன் பார்னெல், "எங்கள் துறைக்குள் நடக்கும் விசாரணைகள் பற்றி வெளிப்படையாகப் பேச முடியாது. ஆனால், நாட்டின் பாதுகாப்பு தொடர்பான ரகசியங்கள் வெளியே போவதை நாங்கள் சாதாரணமாக எடுத்துக்கொள்ள மாட்டோம். இதுகுறித்து தீவிரமாக விசாரிப்போம். நாட்டின் பாதுகாப்புக்கும், உலக நாடுகளில் களத்தில் இருக்கும் நமது ராணுவ வீரர்களின் உயிருக்கும் இந்த ரகசியங்களைப் பாதுகாப்பது மிகவும் முக்கியம்" என்று கூறினார்.
பத்திரிகையாளர்கள் மீது நடவடிக்கை
ஈரான் போர் தொடங்கிய பிறகு, அமெரிக்கப் பாதுகாப்புத் துறை அமைச்சர் பீட் ஹெக்செத் கடந்த மே 5-ஆம் தேதிக்குப் பின் செய்தியாளர்களைச் சந்திக்கவே இல்லை. பத்திரிகையாளர்கள் ராணுவ அலுவலகத்திற்குள் சென்று செய்தி சேகரிப்பதற்கும் பல தடைகள் போடப்பட்டன.
இதற்கிடையில், அமெரிக்காவின் 'யுஎஸ்எஸ் ஆபிரகாம் லிங்கன்' போர்க்கப்பலில் நிலவரம் சரியில்லை என்று செய்தி வெளியிட்டதற்காக, அமெரிக்க ராணுவ நாளிதழான 'ஸ்டார்ஸ் அண்ட் ஸ்ட்ரைப்ஸ்' பத்திரிகையின் முதன்மை ஆசிரியர் எரிக் ஸ்லாவின், அதன் வெளியீட்டாளர் மேக்ஸ் லெடெரர் மற்றும் மத்திய கிழக்கு நிருபர் லாரா கோர்டே ஆகிய மூன்று பேரையும் கடந்த மாதம் ராணுவத் தலைமை அதிரடியாக வேலையை விட்டு நீக்கியது.
டொனால்ட் டிரம்ப் ஆத்திரம்
ஆயுதங்கள் குறைந்துவிட்டதாக வரும் செய்திகளை அமெரிக்க அதிபர் டொனால்ட் டிரம்ப் திட்டவட்டமாக மறுத்துள்ளார். இது தொடர்பாகத் தனது சமூக வலைதளப் பக்கத்தில் தொடர்ச்சியாகக் கோபமான பதிவுகளை அவர் வெளியிட்டுள்ளார்.
அமெரிக்கா எளிதாக வெற்றி பெற்று வரும் ஒரு போரில், தான் வெற்றி பெறுவதை விரும்பாத சில துரோகிகள்தான் இதுபோன்ற 100 சதவீதம் தவறான தகவல்களைப் பரப்புகிறார்கள் என்று டிரம்ப் குற்றம் சாட்டினார். அப்படிச் செய்தி வெளியிடுபவர்களை அவர் மிகவும் கடுமையான வார்த்தைகளால் திட்டினார்.
"ஈரான் மீதான நமது ராணுவ நடவடிக்கை குறித்து தவறான செய்தி வெளியிடும் துரோகிகளுக்கு ஒன்று சொல்லிக் கொள்கிறேன். அமெரிக்காவிடம் கணக்கில் அடங்காத அளவுக்குத் தரமான ஆயுதங்களும் வெடிமருந்துகளும் உள்ளன. இந்தப் போருக்கு மட்டுமல்ல, அடுத்து வேறு எந்தப் போர் வந்தாலும் சமாளிக்கும் அளவுக்கு நம்மிடம் தேவையானதை விட மிக அதிக ஆயுதங்கள் இருக்கின்றன" என்று டிரம்ப் கூறினார்.
மேலும், அமெரிக்காவில் இதுவரை இல்லாத அளவுக்கு வேகமாகப் புதிய ஆயுதங்கள் தயாரிக்கப்பட்டு வருவதாகவும், எந்தச் சூழ்நிலையையும் சமாளிக்க ராணுவம் தயாராக இருப்பதாகவும் அவர் கூறினார். இப்போது நம் நாட்டுப் பாதுகாப்புக்குத்தான் முக்கியத்துவம் தருகிறோம் என்றும், விரைவில் மற்ற நட்பு நாடுகளுக்கு ஆயுதங்களை விற்பனை செய்யும் வேலை மீண்டும் தொடங்கும் என்றும் டிரம்ப் தெரிவித்துள்ளார்.
Click it and Unblock the Notifications
Sign in with Google
