மகாளய பட்சம்.. நவராத்திரி.. புண்ணியம் நிறைந்த புரட்டாசி விரத நாட்கள்.. எந்த நாளில் என்ன விஷேசம்

சென்னை: புரட்டாசி மாதம் ராசிச் சக்கரத்தின் கன்னி மாதத்தில் வருகிறது இது கன்னி மாதம். கன்னி மூலையில் அமைந்திருக்கும் விநாயகரை வழிபடுவது கூடுதல் பலன்களைத் தரும். புரட்டாசி மாதத்தில் சனிக்கிழமை மட்டுமின்றி திங்கள், புதன்கிழமையும் பெருமாள் வழிபாட்டுக்கு உகந்த நாட்களாகும். புரட்டாசி மாதத்தில் மகாளயபட்சம், நவராத்திரி போன்ற பண்டிகைகள் வரும் நாட்களை தெரிந்து கொள்வோம்.

புரட்டாசி மாதம் முன்னோர்கள் வழிபாடு, இறை வழிபாடு, சக்தி வழிபாடு என அனைத்து அம்சங்களையும் அடக்கியிருக்கிறது. பித்ருக்களை வழிபடும் மகாளயம், பெண்களுக்கு மகிழ்ச்சி தரும் நவராத்திரி இவையும் சேர்ந்து புரட்டாசிக்குப் பெருமை சேர்க்கிறது. கடவுளுக்கு காணிக்கை மற்றும் நேர்த்திக்கடன்கள் செலுத்த புரட்டாசி மாதமே சிறந்த மாதமாகக் கருதப்படுகிறது.

புண்ணியம் மிக்க புரட்டாசி மாதம் பிறந்து விட்டது. இந்த மாதத்தில் அசைவ உணவுகளை தவிர்த்து சைவ உணவுகளை சாப்பிட்டு விரதங்கள் கடைபிடித்தால் அதிக புண்ணியம் கிடைக்கும். இந்த மாதத்தில் வரும் மகாலட்சுமி விரதம், தசாவதார விரதம், கதளி கவுரிவிரதம், அநந்த விரதம், பிரதமை, நவராத்திரி பிரதமை, ஷஷ்டி, லலிதா விரதம் போன்றவை விசேஷமானவை.

ஜாதக அமைப்பின்படி சனி, புதன் திசை நடப்பவர்கள் நல்லெண்ணெய் தீபம் போட்டு வழிபட தடைகள் அனைத்தும் நீங்கும். பாவங்கள் நீங்கி புண்ணியமும் சுபயோக சுபங்களும் கூடி வரும். எமபயம் நீங்கவும், துன்பங்கள் விலகவும் புரட்டாசி மாதத்தில் காக்கும் கடவுளான விஷ்ணுவை வணங்க வேண்டும்.

புரட்டாசி மாதம் பவுர்ணமி தினத்தன்று லட்சுமியை இந்திரன் வணங்குவதாக புராணங்களில் குறிப்பிடப்பட்டுள்ளது. அன்று வலம்புரி சங்கில் பசும்பால் ஊற்றி மலர்களால், அலங்கரித்து வழிபட்டால் சகல செல்வங்களும் வந்து சேரும். புரட்டாசி பவுர்ணமி தினத்தன்று அம்பாளுக்கு 4 வண்ணங்களில் ஆடையும் ரத்தினக்கல் ஆபரணமும் அணிவித்து வழிபட வேண்டும். அன்று அம்பாளுக்கு நைவேத்தியமாக இளநீர் படைக்க வேண்டும். இந்த பூஜையால் குடும்பத்துக்கு தேவையான செல்வங்கள் வந்து சேரும் என்பது ஐதீகம்.

புரட்டாசி மாதம் அதிக வழிபாடுகள் நடத்த வேண்டிய மாதமாகும். அம்மன் வழிபாட்டிற்கு உகந்த நவராத்திரி பண்டிகை கொண்டாடப்படுவதும் இந்த மாதத்தில்தான் புரட்டாசி மாதம் அமாவாசைக்கு மறுநாள் பிரதமை தொடங்கி தசமி வரை பத்து நாட்களும் விரதம் இருந்து அம்மனை வணங்குவதன் மூலம் அருளோடு பொருளும், தைரியம் தன்னம்பிக்கை அதிகரிக்கும்.

புரட்டாசி மாதத்தில் விரத நாட்கள் , விஷேச நாட்களை தெரிந்து கொள்வோம்:

புரட்டாசி 1 விநாயகர் சதுர்த்தி திருக்கணித பஞ்சாங்கப்படி புரட்டாசி 2 விநாயகர் சதுர்த்தி. அங்காரக சதுர்த்தி. புரட்டாசி 3 ரிஷி பஞ்சமி. குமார சஷ்டி, புரட்டாசி 5 மகாலட்சுமி விரதம் ஆரம்பம். புரட்டாசி 6 முதல் சனிக்கிழமை கேதார கௌரி விரதம் ஆரம்பம். புரட்டாசி 8 விஷ்ணு பரிவர்த்தனை ஏகாதசி. புரட்டாசி 9 திருமூலர் சித்தர் ஜெயந்தி. புரட்டாசி பௌர்ணமி விரதம்.

புரட்டாசி 13 மகாளய பட்சம் ஆரம்பம். புரட்டாசி 15 மகா பரணி சங்கடஹர சதுர்த்தி புரட்டாசி 16 கிருத்திகை விரதம். புரட்டாசி 17 மஹா வியாதிபாதம். புரட்டாசி 19 மத்தியாஷ்டமி இடைக்காடர் சித்தர் ஜெயந்தி புரட்டாசி 22 சுக்கிர ஜெயந்தி. புரட்டாசி 23 அஜ ஏகாதசி புரட்டாசி 24 கல்கி துவாதசி. புரட்டாசி 25 மஹா திரயோதசி, புரட்டாசி 27 சர்வ மஹாலய அமாவாசை புரட்டாசி 28 நவராத்திரி பூஜை விரதம் ஆரம்பம். புரட்டாசி 29 சந்திர தரிசனம்.

English summary

Tamil month of Purattasi comes in the Kanni matham the zodiac which is the Virgo month. Worshiping Ganesha located in the corner of the Kanni Mula ganapathi will bring additional benefits. Not only Saturday but also Monday and Wednesday are auspicious days for Perumal worship. These fasting worships will make the mind of Mahalakshmi happy.