நடிகர் பவர் ஸ்டார் சீனிவாசன் மருத்துவமனையில் அனுமதி.. காரணம் இதுதானா?
சென்னை: பிரபல நடிகர் பவர் ஸ்டார் சீனிவாசன் உடல்நல குறைவு காரணமாக கிண்டி அரசு மருத்துவமனையில் அனுமதிக்கப்பட்டுள்ளார். அவருக்கு என்ன பிரச்சனை என்பது பற்றி பார்க்கலாம்.
நடிகர் பவர் ஸ்டார் சீனிவாசனுக்கு சில நாட்களாகவே சிறுநீரக கோளாறு ஏற்பட்டதை தொடர்ந்து கடந்த சில நாட்களாக வீட்டில் இருந்தபடியே சிகிச்சை பெற்று வந்ததாக கூறப்படுகிறது.
இந்த நிலையில் இன்று மதியம் அவருக்கு திடீரென்று உடல்நிலை கடுமையாக பாதிக்கப்பட்டதால் கிண்டி அரசு மருத்துவமனையில் அனுமதிக்கப்பட்டுள்ளார். அங்கு அவருக்கு மருத்துவர்கள் தீவிர சிகிச்சை அளித்து வருகின்றனர்.
சீனிவாசன் சினிமாவிற்காக தன்னுடைய பெயரை பவர் ஸ்டார் என்று மாற்றிக்கொண்டார். தமிழ் திரைப்பட நடிகராகவும், தயாரிப்பாளராகவும், இயக்குனராகவும் பல திரைப்படங்களில் பணியாற்றி இருக்கிறார். ஆனாலும் 2013ஆம் ஆண்டு நடிகர் சந்தானத்தின் தயாரிப்பில் வெளியான கண்ணா லட்டு தின்ன ஆசையா திரைப்படத்தில் மூலமாகத்தான் சினிமாவில் அறிமுகமானார்.
அதுபோல கண்ணா லட்டு தின்ன ஆசையா திரைப்படத்திற்கு பிறகு ஐ, ஒன்பதுல குரு உள்ளிட்ட பல திரைப்படங்களில் நடித்திருந்தார். இவருடைய காமெடி மக்கள் மத்தியில் அதிகமாக பேசப்பட்டது. சமீபத்தில் கூட நடிகை வனிதாவோடு இவர் மாலையும் கழுத்துமாக எடுத்த போட்டோ பெரிய அளவில் பேசப்பட்டது. வனிதாவை பவர் ஸ்டார் திருமணம் செய்து கொள்ளப் போகிறாரா? என்று கூட பலர் கேள்வி எழுப்பி இருந்தனர்.
ஆனாலும் சமீபத்தில் இவர் நடித்த இரண்டு படங்கள் இன்னும் வெளியாகவில்லை. அதுபோல திரைப்படங்களில் மட்டுமல்லாமல் அரசியலிலும் ஈடுபட்டுள்ளார். 2019 ஆம் ஆண்டு மக்களவைத் தேர்தலில் சுயேச்சை வேட்பாளராக தென் சென்னை தொகுதியில் போட்டியிட்டு இருந்தார்.
2020இல் ஒரு நிகழ்ச்சியில் பேசும்போது ரஜினிகாந்தை சீண்டும் வகையில் பேசி இருந்தார். அதாவது "சீக்கிரமா கட்சி தொடங்குங்க ரஜினி இல்லை என்றால் நான் கட்சி ஆரம்பிக்கிறேன் நீங்கள் வந்து சேர்ந்து விடுங்கள்" என்று அவர் பேசியது அந்த நேரத்தில் பெரிய அளவில் பரபரப்பை ஏற்படுத்தியது.
நடிகராகவும், அரசியல் பிரமுகராகவும், தொழில் அதிபராகவும் இருக்கும் பவர் ஸ்டார் இன்று உடல்நிலை சரியில்லாமல் மருத்துவமனையில் அனுமதிக்கப்பட்டிருக்கும் நிலையில் மருத்துவர்கள் அவர் ஒரு வார காலம் மருத்துவமனையில் தங்கி சிகிச்சை எடுத்துக்கொள்ள வேண்டும் என்று கூறி இருக்கிறார்கள். விரைவில் அவர் நலம் பெற வேண்டும் என்று ரசிகர்கள் கருத்து தெரிவித்து வருகிறார்கள்.
Click it and Unblock the Notifications
Sign in with Google