Robert Master: தாயின் இறுதி ஊர்வலத்தில் கண்ணீருடன் நடனமாடிய ராபர்ட் மாஸ்டர்! குவியும் ஆறுதல்

Updated: Friday, August 1, 2025, 14:40 [IST]

Subscribe to Oneindia Tamil

சென்னை: தமிழ் சினிமாவின் மிகவும் பிரபலமான நடன இயக்குநர்களில் ஒருவரான ராபர்ட் மாஸ்டர், தனது தாயாரின் மறைவால் ஆழ்ந்த துயரத்தில் இருக்கிறார். சமீபத்தில் காலமாகிய அவரது தாயின் இறுதி ஊர்வலத்தில், ராபர்ட் மாஸ்டர் கண்ணீருடன் நடனமாடி வந்த வீடியோ சமூக வலைத்தளங்களில் வைரலாகி, பலரையும் நெகிழ வைத்துள்ளது.

தாய் மீது கொண்ட அன்பின் வெளிப்பாடு

சமூக வலைத்தளங்களில் பரவி வரும் வீடியோவில், ராபர்ட் மாஸ்டர் தனது தாயின் உடலைச் சுமந்து கொண்டு, அவரது நினைவாகக் கண்ணீருடன் நடனமாடியபடி வருகிறார். இந்த வீடியோ அவரது ரசிகர்களை உலுக்கியுள்ளது. தன் தாயின் பிரிவைத் தாங்க முடியாமல், அவர் மீது கொண்ட அன்பை நடனத்தின் மூலம் வெளிப்படுத்திய ராபர்ட் மாஸ்டரின் இந்த செயல் பலரையும் உருக்கமடையச் செய்துள்ளது. "தன் வாழ்வின் மகிழ்ச்சியான தருணங்களில் எல்லாம் நடனத்தால் ரசிகர்களை மகிழ்வித்தவர், தனது வாழ்வின் சோகமான தருணத்திலும் நடனத்தையே வெளிப்பாட்டு மொழியாகக் கொண்டிருக்கிறார்," எனப் பலரும் அவருக்கு ஆறுதல் கூறி வருகின்றனர்.

ராபர்ட் மாஸ்டர் - ஒரு சுருக்கமான சினிமா பயணம்

ராபர்ட் மாஸ்டர், தமிழ் சினிமாவின் முன்னணி நடன இயக்குநரான பிரபுதேவாவின் நடனக் குழுவில் இருந்து வந்தவர். ஆரம்பத்தில் பிரபுதேவா நடித்த பல படங்களில் அவருக்குப் பின்னால் நடனமாடியவர் இவர். அதன் பிறகு, தானாகவே நடனம் அமைக்கத் தொடங்கி, பல படங்களுக்கு நடனம் அமைத்துக் கொடுத்தார். அவர் நடனம் அமைத்த பல பாடல்கள் பெரிய அளவில் ஹிட்டாகியிருக்கின்றன.

பிக் பாஸ் பயணம்

ஒரு சில காலம் கோலிவுட்டில் இருந்து விலகியிருந்த ராபர்ட் மாஸ்டர், பின்னர் விஜய் டிவியின் பிரபலமான ரியாலிட்டி ஷோவான பிக் பாஸ் நிகழ்ச்சியில் போட்டியாளராகக் களம் இறங்கினார். அந்த நிகழ்ச்சியில் அவர் தனக்கென ஒரு ரசிகர் பட்டாளத்தை உருவாக்கிக்கொண்டார். சக போட்டியாளரான சின்னத்திரை நடிகை ரட்சிதாவுடன் ராபர்ட் மாஸ்டரின் கெமிஸ்ட்ரி ரசிகர்களை வெகுவாகக் கவர்ந்தது. இதனால் இருவருக்கும் காதல் கிசுகிசுக்கள் எழுந்தன. ஆனால், பிக் பாஸ் நிகழ்ச்சிக்குப் பிறகு இருவரும் அவரவர் வேலைகளில் பிஸியாகி விட்டனர்.

குவியும் ஆறுதல்

பிக் பாஸ் நிகழ்ச்சிக்குப் பிறகு, ராபர்ட் மாஸ்டர் நடிகை வனிதாவுடன் இணைந்து 'மிஸ்ஸஸ் அண்ட் மிஸ்டர்' என்ற திரைப்படத்தில் நடித்தார். வனிதாவே இயக்கி, அதில் லீடு ரோலிலும் நடித்திருந்தார். இதற்கு முன்னரே ராபர்ட் மாஸ்டருக்கும் வனிதாவுக்கும் இடையே திருமணம் குறித்த செய்திகள் வெளியாகி, பின்னர் கருத்து வேறுபாடுகளால் இருவரும் பிரிந்திருந்தனர். இந்தத் திரைப்படத்தின் மூலம்தான் இருவரும் மீண்டும் இணைந்தனர். இருப்பினும், படத்தின் ப்ரோமோஷன் நிகழ்ச்சிகளுக்கு ராபர்ட் மாஸ்டர் வரவில்லை.

தனது நடனத்தாலும், கலகலப்பான பேச்சாலும் ரசிகர்களைக் கவர்ந்த ராபர்ட் மாஸ்டருக்கு, அவரது தாயின் மறைவுக்குப் பலரும் சமூக வலைத்தளங்களில் இரங்கல்களைத் தெரிவித்து வருகின்றனர்.