சென்னையை நோக்கி நகரும் மேகங்கள்.. தீபாவளி நாளில் ‘செஞ்சுரி’ அடிக்குது? தமிழ்நாடு வெதர்மேன் அப்டேட்
சென்னை: தீபாவளி பண்டிகை தினமான இன்று சென்னையில் பலத்த காற்றுடன் கனமழை கொட்டித் தீர்த்து வருகிறது. அதிகாலை முதலே இடைவிடாமல் பெய்து வரும் மழையால் சென்னை மக்களின் தீபாவளிக் கொண்டாட்டங்கள் பாதிக்கப்பட்டு உள்ளன.
இந்நிலையில், தற்போதைய மழை நிலவரம் மற்றும் அடுத்தகட்ட வானிலை குறித்து பிரபல தனியார் வானிலை ஆய்வாளர் 'தமிழ்நாடு வெதர்மேன்' பிரதீப் ஜான் தனது சமூக வலைத்தளப் பக்கத்தில் முக்கியத் தகவல்களைப் பகிர்ந்துள்ளார்.
சென்னையில் பல ஆண்டுகளுக்குப் பின் மழை தீபாவளி
அனைவருக்கும் இனிய தீபாவளி நல்வாழ்த்துகளைத் தெரிவித்த அவர், பல ஆண்டுகளுக்குப் பிறகு சென்னை மக்களுக்கு ஒரு 'மழை தீபாவளி'யாக இன்றைய நாள் விடிந்திருப்பதாகக் குறிப்பிட்டுள்ளார். மழை மேகங்கள் வடசென்னை, மத்திய சென்னை நோக்கி நகர்கிறது. தென் சென்னைக்கும் மழை வாய்ப்பு உள்ளதாக தெரிவித்துள்ளார்.
பொதுவாக தீபாவளி நாட்களில் வடகிழக்குப் பருவமழை இடைவெளி விடுவது வழக்கம். ஆனால், இந்த முறை பண்டிகை நாளின் தொடக்கமே கனமழையோடு ஆரம்பித்திருப்பது பலரையும் ஆச்சரியத்தில் ஆழ்த்தியுள்ளது.
சென்னையின் வடக்கு மற்றும் மத்தியப் பகுதிகளில் நள்ளிரவு முதல் விடிய விடிய பெய்த கனமழை, ஒட்டுமொத்த தமிழகத்தின் மழைப் பட்டியலிலேயே முதலிடத்தைப் பிடிக்கும் அளவுக்கு மிகத் தீவிரமாகப் பதிவாகியுள்ளது. இந்த அடர்ந்த மழை மேகங்கள் தொடர்ந்து நகர்ந்து வருவதால், மக்கள் கூடுதல் விழிப்புடன் இருக்குமாறு அவர் கேட்டுக்கொண்டுள்ளார்.
மழை செஞ்சுரி அடிக்குமா? அடுத்த மேகக்கூட்டம் தயார்!
தீபாவளி பண்டிகை நாளில் சென்னையில் 100 மி.மீ (செஞ்சுரி) அளவுக்கு மழை பதிவாகி பல ஆண்டுகள் ஆகிவிட்டன என்று அவர் சுட்டிக்காட்டியுள்ளார். காலை 8.30 மணி வரையிலான அதிகாரப்பூர்வ கணக்கீட்டு நேரத்திற்குள் சென்னை இந்த வரலாற்றுச் சாதனையான 100 மி.மீ அளவைத் தொடுமா என்பதைப் பொறுத்திருந்துதான் பார்க்க வேண்டும் எனத் தெரிவித்துள்ளார்.
மேலும், தற்போது மேலும் ஒரு அடர்ந்த மேகக்கூட்டம் வட சென்னை மற்றும் மத்திய சென்னை பகுதிகளை நோக்கி வேகமாக நகர்ந்து கொண்டிருக்கிறது. இதனால் அப்பகுதிகளில் மீண்டும் பலத்த மழை தொடர அதிக வாய்ப்புள்ளது. அதேநேரத்தில், தென் சென்னை பகுதிகளிலும் ஆங்காங்கே சில நல்ல மழைப் பொழிவுகள் கிடைக்க வாய்ப்புள்ளது என அவர் குறிப்பிட்டுள்ளார்.
நுங்கம்பாக்கம் மழை நிலவரம் மற்றும் பருவமழை நிலை
இந்திய வானிலை ஆய்வு மையத்தின் (IMD) நுங்கம்பாக்கம் மையம், இன்று காலை 7.00 மணி நிலவரப்படி 72 மி.மீ மழையைப் பதிவு செய்துள்ளது. இதன் மூலம் இந்த ஆண்டின் வடகிழக்குப் பருவமழை காலத்தில் நுங்கம்பாக்கம் பகுதி தனது பருவகால மொத்த இலக்கான 600 மி.மீ அளவை எட்டுவதற்கு மிக அருகில் சென்று கொண்டிருக்கிறது.
இந்த ஆண்டின் வடகிழக்குப் பருவமழையைப் பொறுத்தவரை, வட சென்னை மற்றும் மத்திய சென்னை பகுதிகள் தொடக்கம் முதலே மிகச் சிறப்பான மற்றும் அதிகளவிலான மழையைப் பெற்று வருகின்றன. ஆனால், அதே வேளையில் தென் சென்னை பகுதிகள் போதிய மழையின்றி தொடர்ந்து திணறி வருகின்றன என்றும் அவர் தனது பதிவில் எளிய முறையில் விளக்கியுள்ளார்.
தொடர்ந்து வடசென்னை, மத்திய சென்னை நோக்கி நகரும் மேகக்கூட்டங்கள் காரணமாக, நகரின் முக்கியச் சாலைகளில் தண்ணீர் தேங்கும் சூழல் ஏற்பட்டுள்ளது. இதனால் தீபாவளிப் பண்டிகையை ஒட்டி வெளியில் செல்வோரும், பட்டாசு வெடிக்கத் திட்டமிட்டிருக்கும் பொதுமக்களும் வானிலையைக் கவனித்து எச்சரிக்கையோடு செயல்படுமாறு அறிவுறுத்தப்படுகிறார்கள்.
Click it and Unblock the Notifications
Sign in with Google
