பாரதி பக்கம்

ஜுலை 03, 2001

நல்லதோர் வீணைசெய்தே - அதை

நலங்கெடப் புழுதியில் எறிவதுண்டோ?

சொல்லடி, சிவசக்தி! - எனைச்

சுடர்மிகும் அறிவுடன் படைத்துவிட்டாய்,

வல்லமை தாராயோ, இந்த

மாநிலம் பயனுற வாழ்வதற்கே?

சொல்லடி, சிவசக்தி! - நிலச்

சுமையென வாழ்ந்திடப் புரிகுவையோ? (1)

விசையுறு பந்தினைப்போல் - உள்ளம்

வேண்டியபடி செல்லும் உடல் கேட்டேன்,

நசையறு மனங்கேட்டேன் - நித்தம்

நவமெனச் சுடர்தரும் உயிர்கேட்டேன்.

தசையினைத் தீச்சுடினும் - சிவ

சக்தியைப் பாடும்நல் அகங்கேட்டேன்,

அசையறு மதிகேட்டேன், இவை

அருள்வதில் உனக்கெதுந் தைடயுளதோ? (2)